Британската влада разгледува различни опции за да го спречи почетокот на Европската Суперлига во фудбал, изјави портпаролот на британскиот премиер Борис Џонсон. „Видов голем број предлози што беа изнесени како потенцијални решенија. Разгледуваме голем број можности и премиерот сака да разгледа сè што можеме да сториме за да се осигураме дека тие предлози нема да бидат спроведени како што е предложено“ рече портпаролот. Реакциите доаѓаат откако 12-те најмоќни фудбалски клубови од Англија, Шпанија и Италија објавија дека создаваат Суперлига.

Голманот на Ајакс од Амстердам, Андре Онана е близу до напуштање на клубот. „Преговорите се стопирани. Можеби тој ќе се обиде да замине во јули. Штета е што не го решивме ова прашање“, рече Овермарс. Во февруари, Онана беше суспендиран на една година поради кршење на антидопинг правилото. Оваа сезона, Камерунецот одигра 26 натпревари во сите натпреварувања, прими 22 гола и го сочува својот гол недопрен на девет натпревари. Во март, Трансфермаркт го состави список на највредни фудбалери надвор од најдобрите пет европски лиги. Двајца играчи на Ајакс беа на врвот на списокот: Давид Нерес (36 милиони евра) и Андре Онана (36 милиони евра).

Манчестер Сити планира да му понуди нов договор на својот играч за врска Фил Фоден. Овој 20-годишник оваа сезона има постигнато 13 голови и девет асистенции на 42 натпревари. Според изворот, клубот има намера да го продолжи рокот на договорот на Фоден за две сезони – до летото 2026 година и да ја зголеми за повеќе од тројно платата на играчот – од 30 000 на 100 000 фунти неделно. Фил Фоден го постигна победничкиот гол во реваншот од четвртфиналето во Лигата на шампионите против Борусија Дортмунд. Тој стана вториот фудбалер кој постигнал гол во две четврт-финалиња во Лигата на шампионите на УЕФА пред неговиот 21 роденден. Претходно ова достигнување беше направено од напаѓачот на ПСЖ, Килијан Мбапе. Фоден исто така постави рекорд на голови во Лигата на шампионите за англиски играчи на возраст под 21 година.

Кевин Де Брујне заработи повреда на скочниот зглоб и не можеше да помогне до крајот на средбата со Челзи во полуфиналето на ФА Купот. Белгискиот офанзивец ја напушти играта во 48. минута, кога побара лекарска помош. Според првичните имформации, состојбата на 29- годишникот не е добра. По еден дуел со Н’Голо Канте играчот на Манчестер Сити се пожали на болка во скочниот зглоб, а денес беше објавено дека тој ќе мора да пропушт неколку важни натпревари во претстојниот период. Манчестер Сити се надева дека ќе може да смета на Де Брјне за полуфиналните дуели против ПСЖ во Лигата на шампионите. Претходно екипата од Манчестер ќе треба да ја потврди титулата во Премиер лигата, а потоа ќе игра со Тотенхем во полуфиналето од Лига Купот. Кевин Де Брујне беше надвор од теренот осум натпревари во јануари и февруари. Во тој период неговите соиграчи играа одлично и ги добија сите натпревари, а носители на играта беа Гундоган, Бернардо Силва и Фоден.

Манчестер Јунајтед е клуб со голема традиција со многу трофеи и успеси, но откако легендарниот сер Алекс Фергусон си замина премиерлигашот има доста проблеми да се врати на победнички патеки, да освојува трофеи од сезона во сезона. „Црвените ѓаволи“ последниот пехар го освоија во 2017 година, а тоа Пол Погба сака да се промени, поточно тој и соиграчите да донесат титула на „Олд Трафорд“. „Како нешто да ни недостасува, мора нешто да освоиме. Јас сум лош губитник, отсекогаш сум бил. Када и да играм, сакам да победувам. Мислам дека сме се поблиску до трофејот, напредокот е очигледен. Клубот има големи амбиции и цели, ние сакаме да ги оствариме што значи дека сакаме трофеј. Сè уште имаме шанси во Лигата на Европа, имаме за што да се бориме. И во лигата. Се додека не го предадат трофејот на Сити, ние ќе продолжиме да работиме. Оваа година сè уште имаме шанса да освоиме нешто, зошто да не“, истакна Погба.

Италијанските медиуми пренесуваат дека Јувентус и Интер се сериозно заинтересирани за играчот на Баерн Минхен и француски репрезентативец, Корентин Толисо. 26-годишниот играч за врска на лето ќе влезе во последната година од договорот со Баерн Минхен, а нема најави за негово продолжување. Баварците се спремни да го продадат, а италијанските гиганти сакаат да ја искористат таквата ситуација. Толисо пристигна на „Алијанц Арена“ во 2017 година од Лион за 40 милиони евра, а Баерн за неговата слобода ќе бара 25 милиони евра.

Фудбалерот на Ливерпул, Џеорџино Вајналдум и дефинитивно ќе си замине од „Енфилд“ по крајот на оваа сезона. Холандскиот репрезентативец нема да го продолжи договорот со „црвените“ и како слободен агент ќе направи трансфер во некој од заинтересираните клубови за неговиот потпис. Желбата на Вајналдум е да потпише за Барселона, клуб кој се интересира за неговите услуги, но се уште не е познато дали ќе тргне по него со оглед на фактот што не е позната судбината на Роналд Куман кој вчера го донесе трофејот од Купот на Кралот во витрините на „Камп Ноу“.

Иако сè уште нема официјално соопштение во врска со намерата на дел од најдобрите клубови во Европа (12 во моментов) да формираат Супер лига, УЕФА веќе подготвува контра удар. Според „Газета дело Спорт“, европската фудбалска централа, заедно со некои од федерациите на Стариот континент, подготвуваат мега- тужба против клубовите кои имаат намера да учествуваат во Суперлигата, што може да достигне финансиско побарување од повеќе од 50 милијарди евра. Покрај тоа, сите оние кои имаат намера да учествуваат во новото натпреварување ќе бидат исклучени од натпреварите на УЕФА, а можно е да бидат исклучени и од локалните шампионати. Според различни извори, во моментов се одржува кризен состанок на Главниот штаб, кој мора да донесе итни одлуки. Според други информации, Суперлигата треба официјално да биде објавена вечерват. Со новата лига се очекува да претседава Флорентино Перез, а заедно со него треба да се појават Џон Анри, Андреа Ањели и уште неколку други сопственици на екипите кои треба да бидат дел од Суперлигата.

Ханси Флик после натпреварот против Волфсбург соопшти дека на крајот на сезоната ќе го напушти Баерн Минхен. Флик не ја откри причината за неговото заминување, но потврди дека спогодбено ќе го раскине договорот со Баварците на крајот на сезоната. Баерн Минхен веќе ја започна потргата по негов наследник, а германските медиуми пренесуваат дека изборот ќе биде меѓу двајца тренери. Прв кандидат за нов тренер е Макс Алегри. Италијанските медиуми пренесуваат дека челните луѓе на Баерн веќе оствариле контакт со Алегри, кој е слободен после заминувањето од Јувентус. Румениге верува дека трофејниот Италијанец би бил идеално решение за клупата на Баварците. Другиот кандидат е Јулијан Нагелсман, кој подолго време се поврзува со клупата на Баварците. 33-годишниот стратег со успех го води Лајпциг и смета дека е вистински момент да направи чекор напред во кариерата.