Американскиот магазин „Форбс“ објави податок според кој, ѕвездата на ПСЖ и аргентинската фудбалска репрезентација, Лионел Меси е најплатен светски спортист во 2022 година, со заработка од 130 милиони американски долари.

Иако на фудбалски план, неговата сезона во ПСЖ не е баш на завидно ниво, сепак Меси од финансиска гледна точка оставрува огромни заработки.

На второто место од листата се најде Леброн Џејмс од ЛА Лејкерс со 121 милион долари, додека третата позиција му припаѓа на Кристијано Роналдо кој успеа да инкасира 115 милиони долари.

Холандскиот шампион Ајакс официјално објави дека тренерот на Бриж, Алфред Шредер ќе го замени Ерик тен Хаг на позицијата главен тренер на екипата. 

49-годишниот тренер на белгискиот тим ќе се приклучи на екипата по завршувањето на оваа сезона, а неговиот договор ќе биде на две години.

Тен Хаг веќе и официјално е назначен како нов тренер на Манчестер Јунајтед, а ќе ја преземе функцијата по завршувањето на актуелната кампања.

Шредер има работено во Ајакс и претходно, како асистент во Тен Хаг во 2018 и 2019 година.

Французинот, Клемен Турпин, ќе го суди финалето во Лигата на фудбалските шампиони меѓу Ливерпул и Реал Мадрид закажано на 28 мај на стадионот во Париз.  Тој беше во улога на четврти судија во пресметката на двата клуба во финалето пред четири години во Киев кога Шпанците победија со 3-1.

Турпин досега се покажа како „таличен “ за Реал Мадрид бидејќи се појави на дуелите со Челзи победа 3-1, потоа со Лудогорец (4-0), Рома (2:0) и Интер (3-2). Французинот им судел и на „црвените“ и тоа против Спартак (Москва) (1-1) и против РБ (Лајпциг) (2-0).

Романецот, Иштван Ковач, ќе биде судија на дуелот Рома – Феенорд во Лигата на конференциите (25 мај) а Славко Винчич од Словенија на финалето во Лига Европа меѓу Ајнтрахт – Ренџерс на 18 мај.

Фудбалерите на Интер се освојувачи на 75. издание на „Копа Италија“. Играчите предводени од тренерот Инзаги, на Олимпискиот стадион во Рим го победија Јувенус со резултат 4:2 после одигрување на продолженија. Во регуларниот дел од средбата, резултатот беше 2:2.

Јунак во тимот од Милано беше Хрватот Иван Перишиќ, кој во продолженијата ги постигна двата гола за екипата. Јувентус имаше водство на натпреварот од 2:1 до 80. минута. 

Ова е прв трофеј во Купот за Интер уште од 2011 година, а вкупно осми во клупската историја. Повеќе трофеи имаат само Јувентус, 14, и Рома со 9.

Македонскиот голгетер, Илија Несторовски, во сабота ќе го одигра својот последен натпревар во дресот на Удинезе. Неговиот договор со клубот истекува на крајот од сезонава и истиот нема да биде продолжен.

Несторовски пристигна во тимот на Удинезе во 2019 година, а неговата следна фудбалска дестинација ќе биде позната во периодот што следува. За напаѓачот постои интерес од неколку клубови кои се членови на италијанската Серија А и Серија Б.

Роб Едвардс кој деновиве ја освои титулата во Лига 2 со екипата на Форест Грин и веднаш потоа го напушти клубот ќе биде новиот менаџер на фудбалерите на Ватфорд.

Тој ќе го наследи Рој Хоџсон кој ќе си замине на крајот на сезоната откако неговиот тим не успеа да обезбеди опстанок во Премиер Лигата.

Според англиските медиуми, Едвардс во договорот со Форест Грин имал клаузула која му овозможувала да си замине кога ќе заврши првенството иако луѓето од клубот реагираат, дека 39 годишниот тренер тајно преговарал со Ватфорд.

Менаџерот на Тотенхем, Антонио Конте вели дека се согласува со Гвардиола за тежината да се освои англиската Премиер лига.

„Освојувањето на лигата во Англија не е лесно. Гвардиола рече дека Ливерпул освоил само една титула во последните 30 години. Можеби понекогаш е полесно да се освои Лигата на шампионите или некое друго натпреварување отколку лигата во Англија“, смета италијанскиот стратег.

Фудбалерите на Ајакс пред крајот на холандското првенство ја обезбедија 36-та шампионска титула во својата историја. 

Избраниците на Ерик Тен Хаг убедливо со 4-0 на „Амстердам Арена“ го победија Херенвен и со тоа ги задржаа недостижните четири бода предност пред ПСВ.

Клубот од Амстердам на крајот на сезоната ќе остане без тренерот Тен Хаг, кој ќе се пресели во Манчестер Јунајтед, додека десниот бек Нусаир Мазрауи ќе замине во Баерн Минхен.

Ајакс е рекордер со 36 шампионски титули, ПСВ има 24, а двоцифрен број трофеи имаат и Феенорд 15 и Ден Хаг 10.

Марсело Петинати, агентот кој го застапува напаѓачот на Манчестер Сити, Габриел Жесус, проговори за евентуалната преселба на неговиот клиент во Арсенал.

„Имавме разговори со Арсенал за Габриел Жесус, ни се допаѓа проектот на овој клуб и разговараме за можноста за трансфер. За Габриел се заинтересирани уште шест клубови. Тој е фокусиран на последните натпревари од сезоната за Манчестер Сити. Да видиме што ќе се случи“, изјави агентот на Габриел Жесус.

Претходно беше објавено дека Манчестер Сити е подготвен да го пушти бразилскиот напаѓач откако го ангажираше Норвежанецот Ерлинг Халанд од Борусија Дортмунд. Габриел Жесус оваа сезона одигра 39 натпревари за Манчестер Сити, постигнувајќи 13 гола и 12 асистенции.

УЕФА заедно со Германија како организатор на следното Европско фудбалско првенство во 2024 година, ги објави градовите кои ќе ја имаат улогата на домаќини на натпреварите.

Европското првенство во Германија ќе се игра во десет градови: Берлин, Хамбург, Лајпциг, Дизелдорф, Франкфурт, Дортмунд, Гелзенкирхен, Франкфурт, Штутгарт, Келн и Минхен.

Интересно, ова се истите градови кои беа домаќини и на Светското првенство во 2006 година, со исклучок на Кајзерлсаутерн и Нирнберг.

Отворањето и првиот меч ќе бидат на 14 јуни на „Алијанц Арена“ во Минхен, додека финалето ќе се игра на 14 јули на Олимпискиот стадион во Берлин.

На првенството ќе учествуваат 24-те најдобри европски селекции кои ќе бидат поделени во шест групи со по четири селекции, а титулата ќе ја брани репрезентацијата на Италија.