Осман Дембеле го привлече вниманието откако откри кој му е омилен тренер. Во моментов иднината на Дембеле во Барселона е главна тема бидејќи се уште нема ставено потпис на нов договор. Барселона му нуди договор до 2025 година, но Дембеле на лето влегува по последната година од договорот и може да биде продаден. „Томас Тухел е мојот омилен тренер. Под негово водство играв повеќе на десната страна, сè додека не бев префрлен на позиција десет. Да останеше во клубот, ќе одбиев да ја напуштам Борусија Дортмунд“, изјави Дембеле.

УЕФА планира да направи големи промени во правилото за гостински гол за следната сезона, објави весникот „Сан“. Да потсетиме, според важечките прописи, со изедначен резултат во елиминациските натпревари по одиграни два натпревари, екипата што постигнала повеќе голови на гостински терен оди во следната рунда. Според изворот, според новите правила, головите на гости ќе се бројат само во регуларното време на двата натпревари. Доколку на крајот од двата натпревари се игра дополнително време, гостинскиот тим нема да има предност со гол на гостински терен. Се најавува дека овој предлог веќе е поддржан од водечките клубови во Европа. Гласањето за измени и дополнувања на правилата ќе се одржи на состанок на комитетот на УЕФА за натпревари, кој ќе се одржи на 16 април. Забележано е дека предлогот за целосно укинување на правилото за гостински гол беше одбиен.

Извршниот директор на Атлетико Мадрид – Мигел Анхел Хил Марин е категоричен дека Саул Нигес и Хозе Хименез нема да заминат во друг клуб. Вчера беше објавена информација дека двајцата ќе бидат дел од чистката што екипата ќе ја спроведе ова лето. Сепак, тие се меѓу играчите на кои најчесто се потпира тренерот Диего Симеоне. „Саул и Хименез се меѓу капитените на тимот. Тие се во клубот многу години и затоа го добија правото сами да одлучуваат кога и како да ја прекинат соработката со Атлетико. Јас лично не мислам дека дојде тој момент. Во секој случај, клубот ќе ја цени желбата и перформансите на секој играч. Само тогаш ќе бидат донесени одлуките. Информациите дека клубот сака двајцата играчи да заминат се сосема погрешни. Сè што Атлетико сака во моментов е да размисли за освојување на Ла Лига. Со оглед на тоа што сега, на шест недели и осум кола пред крајот на шампионатот, ние сме лидери и се бориме да ја задржиме првата позиција, не е време да се зборува за трансфер пазарот. Да се стори тоа сега е неодговорност што води само до нестабилност. Ова е нешто кон што некој се стреми“, изјави Хил Марин.

Италијанските медиуми јавуваат дека Јувентус и Интер подготвуваат договори за доведување на Мојс Кин од Евертон, кој годинава игра како позајмен во ПСЖ. Италијанскиот напаѓач призна дека сè уште не знае каде ќе игра следната сезона по синоќешниот настап за ПСЖ во Лигата на шампионите. Според Тутоспорт, и Јувентус и Интер го имаат 21 годишникот како една од нивните примарни цели за следната сезона. Торинскиот весник објави дека „нероаѕурите“ би можеле да го понудат Матиас Весино во договор за размена со Евертон плус- готовина, бидејќи Карло Анчелоти го сакаше уругвајскиот репрезентативец и претходно. „Старата дама“, пак, размислува да го понуди Мерих Демирал во договор за размена со Кин.

Лотар Матеус најави дека тренерот на Баерн Минхен, Ханси Флик, ќе си замине нa крајот на сезоната. Неговата најава доаѓа по вчерашната елиминација на Баварците во Лигата на шампионите од францускиот ПСЖ. „Ханси Флик ќе замине бидејќи има понуди други тимови и од германската репрезентација. Баерн сака да го донесе Јулијан Нагелсман“, потенцираше Матеус. Тимот од Минхен откако е елиминиран од елитата на Европа, сега ќе се насочи само кон одбрана на титулата во Бундес-конкуренцијата.

Италијанската влада дозволи присуство на гледачи за време на натпреварите на Европско фудбалско првенство во текот на летото. Тоа значи дека Рим е деветтиот град што ќе овозможи на трибините да има ограничен број на фанови или 25 проценти да биде исполнет капацитетот на стадионот. Претходно тоа со направија: Амстердам, Баку, Букурешт, Будимпешта, Копенхаген, Глазгов, Лондон и Санкт Петербург. УЕФА им остави простор на Билбао, Даблин и Минхен да одговорат до 19 април дали ќе дозволат фанови на трибините, во спротивно, може да бидат одредени нови градови-домаќини за натпреварите на континеталниот собир.

Англискиот фудбалски репрезентативец и напаѓач на Евертон, Доминик Калверт-Луин, може да биде „фантастично засилување“ за Манчестер јунајтед во текот на летото, проценува поранешниот дефанзивец на „црвените ѓаволи“, Рио Фердинанд. Различни медиуми во Европа тврдат дека Јунајтед е заинтересиран и за Хари Кејн и Ерлинг Халанд, но, тие трансферите можат да бидат премногу компликувани. „За мене, вистинскиот избор е Доминик Калверт-Луин. Гледам многу натпревари на Евертон и очигледно е дека тој им создава многу главоболки на противниците”, вели Фердинанд.

Дали ова е последна сезона за Џанлуиџи Буфон? Во овој момент одговорот на прашањето веројатно не го знае ниту тој самиот. Буфон има 43 години, но и понатаму брани во одлична форма. Пред него сега се три опции. Првата опција е преговори со Јувентус за нов договор на дополнителна една година, втората преговори со друг тим, а третата – пензија. Јувентус го чека, но клубот мора да биде спремен и да бара негова замена за наредната сезона ако Џиџи се реши да не продолжи.

Италијанските и шпанските медиуми тврдат дека Реал Мадрид е заинтересиран за доведување на Сергеј Милинковиќ Савиќ. Савиќ игра одлична сезона во италијанското првенство и веќе од поодамна е мета на „кралевите“. Во Савиќ Реал гледа замена за Лука Модриќ кој исто така игра добро, но наскоро ќе наполни 36 години. Според информациите, Реал на Лацио ќе мора да му плати 70 милиони евра. Савиќ сезонава постигна седум гола и додаде девет асистенции. Покрај Реал, интерес за Савиќ покажаа ПСЖ и Манчестер Јунајтед.

Напаѓачот на фудбалскиот состав Милан, Златан Ибрахимовиќ, заработи казна од еден меч од страна на Дисциплинската комисија за Серија А, поради исклучувањето на средбата со Парма одиграна во изминатиот викенд. Ветеранот од Шведска дополнително ќе мора да плати и 5.000 евра. Тој ќе ја одлежи санкцијата во наредното коло во текот на викендот на мечот со Џенова. Ќе потсетиме, 39-годишниот ветеран на средбата со „млекарите“ имаше вербална расправија со главниот судија, Фабио Мареска, во 60. минута од натпреварот по што заработи црвен картон.