Фудбалската репрезентацијата на Австралија успеа да се пласира на Светското првенство во Катар. Популарните „Сокероси“, во баражот за пласман на СП ја победија селекцијата на Перу и петти пат по ред успеаја да се пласираат на фудбалски мундијал.

Натпреварот после регуларниот дел и продолженијата заврши без голови, па патникот за Катар беше одлучен после изведувањето на пеналите. Херој во селекцијата на Австралија беше голманот Редмејн кој успешно одбрани пенал во шестата серија.

Австралија во Катар ќе игра во групата Д, каде се наоѓаат селекциите на Франција, Данска и Тунис.

Лондонски Арсенал понуди 60 милиони евра за напаѓачот на Наполи, Виктор Осимен, но веднаш беше одбиена оваа понува. Италијанскиот клуб планира да заработи околу 100 милиони евра за играчот, објавија медиумите во Италија.

Интернет порталот Трансфермаркт го проценува Виктор Осимен на 60 милиони евра. Договорот на фудбалерот со Наполи е до јуни 2025 година. Во сезоната 2021/2022, Нигериецот одигра 32 натпревари за тимот во сите натпреварувања, постигна 18 гола и шест асистенции.

Да потсетиме дека претходно медиумите пишуваа за интересот за Осимен од англиски и германски клубови. Конкретно, се работеше за евентуален трансфер на Виктор Осимен во Манчестер Јунајтед, Њукасл Јунајтед или Баерн Минхен.

Лотар Матеус изрази загриженост дека националниот тим не се развива под водство на селекторот Ханси Флик.

Флик, кој имаше многу успешен престој на кормилото на Баерн Минхен, го предводеше Бундестимот од минатата есен, преземајќи ја функцијата на која Јоаким Лев помина 15 години.

Лев ја освои светската титула во 2014 година, но по 2016 година настапот на германската репрезентација опадна, а според Матеус, Флик не бележи големо подобрување.

„Игрите што ги прикажуваат нашите репрезентации во моментов не покажуваат никаков напредок. Досега не сум видел ништо што би ме убедило во тоа“, изјави Матеус, кој има рекордни 150 натпревари за германската репрезентација.

Во саботата Германија стигна до реми 1-1 на гостувањето во Унгарија, а според Матеус, Германците треба да му се заблагодарат на голманот Мануел Нојер, кој „повторно не спаси од пораз“.

Ерик Тен Хаг ќе се сретне со Хари Мегваер на почетокот на јули, кога ќе се врати за да ги започне подготовките за новата сезона, пренесуваат медиумите на Островот.

Тогаш се очекува Холанѓанецот да го извести дефанзивецот дека му ја одзема капитенската лента и одлуката ќе ја подложи на избор на самите играчи. Се верува дека фаворит за нов капитен на тимот е Давид де Геа.

Мегваер е капитен на Манчестер Јунајтед од јануари 2020 година, само неколку месеци откако пристигна од Лестер.

Минатата сезона, беше многу слаба за Мегваер и претрпе голем број критики. Тен Хаг застана во негова одбрана и истакна дека верува во неговите квалитети, но сепак ќе му ја земе капитенската лента.

Фабио Канаваро преговара со полскиот фудбалски сојуз за назначување на селектор на националниот тим.

Во моментов селектор на полската репрезентација е Чеслав Михневич, чиј договор е до крајот на оваа година. Во групата 4 од Лигата на нации на УЕФА, Полска е на третото место со четири бода и три бода зад лидерот Холандија. Да потсетиме дека Канаваро нема искуство како тренер во Европа.

Претходно италијанскиот стручњак работеше за Ал-Али, Гуангжу Евергранде, Ал-Наср и Тијанџин Куанџиан. Последната работа на Канаваро беше во кинеската репрезентација, која селекторот ја напушти во 2019 година.

Реал Мадрид имаше одлична сезона, а сега раководството работи на засилување на тимот.

Во Реал веќе пристигна Антонио Рудигер како слободен агент, а наскоро „кралскиот“ дрес ќе го облече и Орелиен Чуамени, кој доаѓа од Монако за 80 милиони евра.

Медиумите пишуваат дека Реал сака да донесе уште две засилувања ова лето, како и да се ослободи од неколку фудбалери. Реал сака да ги продаде фудбалерите кои немаат иднина во тимот, а тоа се Асенсио, Јовиќ и Себаљос, кои не добиваат премногу шанса кај тренерот Карло Анчелоти.

Приоритет е нов напаѓач, кој ќе биде алтернатива за Бензема, а прво име на списокот е Габриел Жесус од Манчестер Сити. Најтешка мисија ќе биде доведувањето на Рис Џејс од Челзи. Во шпанскиот гигант го гледаат 22-годишниот Џејмс како долгорочно решение за десната бековска позиција и сакаат да го доведат ова лето.

Фатих Карагумрук потврди дека легендарниот фудбалер на Италија и на Јувентус, Андреа Пирло, ќе седне на тренерската клупа.

За 43-годишниот Пирло тоа ќе биде втор ангажман во тренерските води откако една сезона помина во Јувентус (2020/21).  Пирло има одиграно 116 натпревари за Италија и постигнато  13 гола.

Тој е дел од генерацијата што го освои Мундијалот во Германија во 2006 година. Пирло како играч настапуваше за: Бреша, Интер, Реџина, Милан, Јувентус и Њујорк Сити.

Бенфика и официјално ја потврди информацијата дека клубот постигнал договор со Ливерпул и го потврди заминувањето на напаѓачот Дарвин Нуњез.

Како што се наведува во соопштението на Бенфика, трансферот на напаѓачот е вреден 75 милиони евра, а таа сума може да порасне до 100 милиони евра во зависност од настапите на фудбалерот и клаузулите во договорот.

22-годишниот Уругваец, минатата сезона во дресот на Бенфика постигна 34 гола на 41 натпревар во сите натпреварувања.

Се очекува во текот на денот да бидат извршени лекарските прегледи на Нуњез и потоа да следува и неговото официјално претставување како нов фудбалер на Ливерпул.

Македонската фудбалска репрезентација оствари убедлива победа од 4:0 на домашен терен против селекцијата на Гибралтар. Натпреварот беше одигран во рамките на 4.коло од Лигата на нации.

После завршувањето на средбата, селекторот на Македонија изрази благодарност до фудбалерите за нивната желба да настапуваат за репрезентацијата и да одделат 17 денови од нивниот планиран одмор.

„ Никој не знае што ќе се случи до крајот на овие натпревари во Лигата на нации. Јас сум задоволен од пристапот на момците кој е за секоја пофалба. Без разлика против кого игра овој тим има максимален респект кон секого, но на теренот кон никого. Благодарност до сите кои беа дел од овој период на натпревари бидејќи одвоија 17 дена од одморот кој им следува и беа на располагање на тимот и државата“, потенцира Милевски.