Роберто Манчини пред неколку дена призна дека се уште го прогонува поразот од Македонија од месец март и се уште не може да се помири што Италијанците ќе гледаат уште едно Светско првенство преку ТВ приемниците, второ во низа по огромното разочарување кое го доживеаја пред четири години.

Италијанскиот селектор верува дека е време за титула на Меси и сите останати аргентински фудбалери, од кои останал импресиониран на последната пресметка која ја одиграа на „Вембли“ (гаучосите славеа 3-0).

„Има многу силни тимови на Светското првенство, таму се најдобрите. Ако треба да изберам само еден, ќе речам Аргентина. Навистина многу ме импресионираа кога игравме против нив на Финалисима“, порачува Манчини.

На отворањето на Мундијалот во Катар присуствувале 67.372 гледачи. Тоа е бројот на навивачи запишани во официјалните протоколи и објавени од најавувачот на стадионот.

Интересно е што капацитет на арената Ел-Бајт, каде се одигра воведниот натпревар на Светското првенство е 60.000 гледачи. Како биле сместени уште речиси 7,4 илјади луѓе не се знае.

Селекторот на Белгија, Роберто Мартинез, нема да ризикува со напаѓачот, Ромелу Лукаку и ќе го изостави од списокот за првите два меча со Канада и Мароко на Светското првенство во Катар.

Црномурестиот играч кој е најдобриот стрелец кај „црвените ѓаволи“ со 68 голови на 102 средби, се уште не е фит од повредата заработена во дресот на Интер.

Медиумите наведуваат дека Лукаку може да биде на спискот дури за средбата со Хрватска на 1 декември во последното коло по групи.

Карим Бензема и официјално ќе го пропушти Светското првенство. Бензема на тренингот на „триколорите“ ја обновил повредата на бутниот мускул што ја заработи на натпреварот од Лигата на шампионите против Селтик.

Ова дефинитивно е големо разочарување за освојувачот на „Златната топка“, кој испрати порака преку социјалните мрежи.

„Во животот никогаш не сум се откажал, но морам да мислам на тимот вечерва. Морам да го отстапам моето место на некој кој може да му помогне на тимот“, напиша Бензема.

Интернет порталот Трансфермаркт ги прогласи десетте најскапи репрезентации по вкупна вредност на Светското фудбалско првенство во фудбал во 2022 година кое ќе почне утре во Катар.

Во првата тројка се најдоа репрезентациите на Англија, Бразил и Франција. Вреди да се напомене дека вредноста на составот на само овие три тима надминаа една милијарда евра.

Целосната топ десет изгледа вака:

1. Англија (1,26 милијарди евра).

2. Бразил (1,14 милијарди евра).

3. Франција (1,03 милијарди евра).

4. Португалија (937 милиони евра).

5. Германија (886 милиони евра).

6. Шпанија (872 милиони евра).

7. Аргентина (645 милиони евра).

8. Холандија (587 милиони евра).

9. Белгија (563 милиони евра).

10.Уругвај (450 милиони евра).

Светското првенство во Катар ќе започне утре, 20 ноември, со воведниот натпревар меѓу Катар и Еквaдор.

Аргентинскиот напаѓач Лионел Меси е единствениот од репрезентацијата кој ќе биде сам во соба во Доха, пишува „Оле“.

Интересно е тоа што ова му се случува на 35-годишниот капитен на аргентинската репрезентација за прв пат на големи натпреварувања. Претходно, на собирот на тимот, тој секогаш бил со Серхио Агуеро, но напаѓачот стави крај на кариерата. После тоа, Меси секогаш беше сам додека е во националниот тим – на пример, за време на квалификациите за Светското првенство во 2022 година.

На Светското првенство во 2010 година, Меси ја делеше собата со Хуан Себастијан Верон, а на следните два турнири – со Агуеро. Во моментов Николас Отаменди и Родриго де Пол ќе бидат во соседната соба со Меси, а Леандро Паредес и Анхел Ди Марија ќе се наоѓаат во собата спроти Меси.

Претседателот на УЕФА, Александар Чеферин, изјави дека дека е сигурен оти Светското првенство во Катар ќе биде одлично организирано, но се надева дека во иднина нема повеќе да има „зимски “ Мундијали.

„Не чека спектакл, еден месец на извонреден фудбал, и верувам дека повторно европска репрезентација ќе биде освојувач на шампионската титула. Од 2006.година шампионите на СП доаѓаат од Европа, а пред четири години во Русија, сите полуфиналисти беа од нашиот континент. Единствени селекции кои можат да парираат се Бразил и Аргентина“, изјави првиот човек на УЕФА.