Челниците на Интер оствариле контакт со играчот за врска на Интер и италијанската репрезентација, Николо Барела, пренесуваат италијанските медиуми.
Клоп е во потрага по квалитетен играч за врска кој ќе може да го замени Вајналдум, па во Барела гледа идеално засилување.
Барела одигра одлична сезона во Интер и покажува одлични партии на Европското првенство, па Ливерпул е одлучен во намерата да го донесе на „Енфилд“.
Интер има финансиски проблеми и веќе го продаде Хакими, но ќе направи се за да го задржи Барела.
Крос се повлече од дресот на германската репрезентација
Фудбалерот на Реал Мадрид, Тони Крос, официјално ја објави својата одлука дека ја завршува кариерата во репрезентацијата на Германија.
По 106 натпревари за Бундес-тимот, 31-годишниот играч за врска целото внимание ќе го насочи кон своите настапи во својот клуб. Крос објави дека ја донел својата одлука многу пред Евро 2020, за каде се надеваше дека ќе стигне до титулата.
„Одиграв 106 натпревари за Германија. Нема повеќе. Се надевав дека ќе завршам со 109 и уште еден голем трофеј – оној од Европското првенство. Направив се што е можно за тоа да се случи. Одамна решив дека овој турнир ќе биде последниот и дека нема да имам за цел да играм на Светското првенство во Катар во 2022 година. Во следните години сакам целосно да се фокусирам на своите цели со Реал Мадрид, отсега сакам да имам можност да одморам не како до сега како во последните 11 години кога бев репрезентативец. Исто така, сакам да бидам многу поприсутен како сопруг и татко во животот на мојата сопруга и трите деца. Ми беше голема чест да го носам овој дрес и тоа го правев со гордост и страст. Благодарам на сите фанови за поддршката, како и на критичарите што ме мотивираа понатаму. На крај, би сакал да му изразам благодарност на Јоги Лев, кој ме направи репрезентативец и светски шампион. Тој ми веруваше и заедно напишавме долга приказна за успех. Тоа беше чест за мене. Со среќа и успех на Ханзи Флик“, се вели во писмото кое Тони Крос го објави за својата одлука.
Џеко пред потпис со турскиот шампион Бешикташ
Актуелниот шампион на Турција, екипата на Бешикташ, исто така е во игра за потписот на босанскиот голгетер Един Џеко. Според информациите во турските медиуми, интересот на Бешикташ за Џеко е огромен и трката со Фенербахче за неговиот потпис се заострува.
Потпретседателот на Бешикташ, Емре Кочадаќ, во интервју за националната телевизија ја потврди веста.
„Главната цел на клубот е да донесе квалитетен напаѓач. Кога имате таква цел, тогаш Един Џеко е играчот што го сакате во тимот”, рече Кокадаќ.
Чешка без свои навивачи во Баку
Репрезентацијата на Чешка на четвртфиналната средба против репрезентацијата на Данска нема да може да смета на своите навивачи, откако беше донесена одлука дека чартер летовите за Баку се откажани поради КОВИД-19 ситуацијата.
Во Азербејџан на сила се строги мерки во борбата против коронавирусот, а во истовреме, чешките навивачи по враќање во својата земја ќе мораат да останат во домашен карантин.
Чешките медиуми јавија дека првично интерес за патување на натпреварот во Баку покажале околу 300 навивачи, но бројката потоа драстично се редуцирала, поради што летовите кон азербејџанската престолнина се откажани.
Дешамп останува на клупата на Франција
Дидие Дешамп ќе остане селектор на Франција иако разочара на Европското првенство, каде Франција по пенали беше елиминирана од Швајцарија во осминафиналето, пишува „Ле Парисиен“.
Овој извор наведува дека Дешамп ќе ја предводи Франција на Светското првенство идната година во Катар, а не е исклучено да остане и по СП на кормилото.
Договорот на Дешамп истекува на крајот од 2022. година, а тој наскоро на раководството на францускиот фудбалски сојуз ќе мора да им објасни што се случи на ЕУРО.
Тимот предводен од Дешамп на ЕУРО пристигна како актуелен светски првак и најголем фаворит за титулата европски шампион, па нивното испаѓање беше најголема сензација на турнирот.
По Санчо – уште едно големо име во Манчестер Јунајтед!
ЕСПН пренесува дека извори блиски до Манчестер Јунајтед потврдиле дека дефанзивецот на Реал и Француската репрезентација Рафаел Варан е на чекор до преселба во клубот од „Олд Трафорд“.
Варан има важечки договор со Реал до летото 2022. година, но тој јасно му стави до знаење на Флорентино Перез дека истиот не сака да го продолжи, па Реал сега е подготвен да го продаде за играчот да не оди бесплатно следното лето.
Варан рече дека одлуката за продолжување на кариерата ќе ја објави по ЕУРО, а се пишуваше дека е најблизу до преселба во ПСЖ. Сепак, се чини дека Јунајтед е најконкретен. Реал бара 70 милиони, а Јунајтед е подготвен да исплати 50.
Серхио Рамос две сезони во ПСЖ!
Серхио Рамос има нов клуб – култниот дефанзивец и икона на шпанскиот и европскиот фудбал, кариерата ја продолжува во Париз Сен Жермен.
Претставниците на Рамос се договорија за сите детали од двегодишниот договор, пренесоа француските медиуми, а презентацијата се очекува да биде за неколку дена.
35-годишниот Рамос го напушти Реал по 16 години и доаѓа во ПСЖ како слободен агент.
Одигра 671 натпревар за Реал и постигна 101 гол, а играше 180 пати за репрезентацијата на Шпанија.
Горецка е замената за Погба на „Олд Трафорд“
Манчестер Јунајтед ќе се насочи кон Леон Горецка од Баерн Минхен доколку Пол Погна си замине од „Олд Трафорд“.
„Црвените ѓаволи“ се убедени во квалитетите на германскиот репрезентативец и веруваат дека ќе биде идеална замена за Пол Погба.
Погба влезе во последната година од договорот и се уште одбива да ја продолжи соработката, па Јунајтед е спремен да го стави на продажба. Слична е ситуацијата и со Горецка, кој има уште една година од договорот со Баерн и е спремен да ја промени средината ова лето.
Доколку Погба замине, Јунајтед е спремен да понуди 50 милиони евра за потписот на Германецот.
Манџукиќ пред потпис во шампионатот на Индија
Хрватскиот фудбалер Марио Манџукиќ кариерата ќе ја продолжи во Индија. Манџукиќ e блиску до реализација на неочекуван трансфер и во иднина ќе го носи дресот на АТК Мохун Баган. Наскоро се очекува и официјална потврда.
Хрватскиот голгетер минатата сезона се врати во Европа во тимот на Милан, но не играше многу. Се зборуваше за негово враќање во Динамо, потоа се споменуваше и Бундеслигата, но тој реши кариерата да ја продолжи во Индија, што ќе биде уште еден предизвик во неговата богата кариера.
Познат календарот за новата сезона во шпанскиот шампионат
Шпанската фудбалска лига, ја објави програмата за претстојната сезона 2021/22 која ќе започне на 15 август.
Тогаш шампионот Атлетико Мадрид ќе гостува кај Селта додека Реал Мадрид ќе игра во Баскијa со Алавеш. Барселона ќе го започне првенството дома против Реал Сосиедад. Првото – „Ел Класико“ меѓу Реал Мадрид и Барселона ќе се случи на 24 октомври кога домаќини ќе бидат Каталонците а второто ќе биде на 20 март во 2022, на стадионот во Мадрид.
Градските дерби мечеви во шпанската престолнина меѓу Реал и Атлетико се закажани на 12 декември и 8 мај.
