Италијанските медиуми пренесуваат дека Јувентус и Интер се сериозно заинтересирани за играчот на Баерн Минхен и француски репрезентативец, Корентин Толисо. 26-годишниот играч за врска на лето ќе влезе во последната година од договорот со Баерн Минхен, а нема најави за негово продолжување. Баварците се спремни да го продадат, а италијанските гиганти сакаат да ја искористат таквата ситуација. Толисо пристигна на „Алијанц Арена“ во 2017 година од Лион за 40 милиони евра, а Баерн за неговата слобода ќе бара 25 милиони евра.

Фудбалерот на Ливерпул, Џеорџино Вајналдум и дефинитивно ќе си замине од „Енфилд“ по крајот на оваа сезона. Холандскиот репрезентативец нема да го продолжи договорот со „црвените“ и како слободен агент ќе направи трансфер во некој од заинтересираните клубови за неговиот потпис. Желбата на Вајналдум е да потпише за Барселона, клуб кој се интересира за неговите услуги, но се уште не е познато дали ќе тргне по него со оглед на фактот што не е позната судбината на Роналд Куман кој вчера го донесе трофејот од Купот на Кралот во витрините на „Камп Ноу“.

Иако сè уште нема официјално соопштение во врска со намерата на дел од најдобрите клубови во Европа (12 во моментов) да формираат Супер лига, УЕФА веќе подготвува контра удар. Според „Газета дело Спорт“, европската фудбалска централа, заедно со некои од федерациите на Стариот континент, подготвуваат мега- тужба против клубовите кои имаат намера да учествуваат во Суперлигата, што може да достигне финансиско побарување од повеќе од 50 милијарди евра. Покрај тоа, сите оние кои имаат намера да учествуваат во новото натпреварување ќе бидат исклучени од натпреварите на УЕФА, а можно е да бидат исклучени и од локалните шампионати. Според различни извори, во моментов се одржува кризен состанок на Главниот штаб, кој мора да донесе итни одлуки. Според други информации, Суперлигата треба официјално да биде објавена вечерват. Со новата лига се очекува да претседава Флорентино Перез, а заедно со него треба да се појават Џон Анри, Андреа Ањели и уште неколку други сопственици на екипите кои треба да бидат дел од Суперлигата.

Ханси Флик после натпреварот против Волфсбург соопшти дека на крајот на сезоната ќе го напушти Баерн Минхен. Флик не ја откри причината за неговото заминување, но потврди дека спогодбено ќе го раскине договорот со Баварците на крајот на сезоната. Баерн Минхен веќе ја започна потргата по негов наследник, а германските медиуми пренесуваат дека изборот ќе биде меѓу двајца тренери. Прв кандидат за нов тренер е Макс Алегри. Италијанските медиуми пренесуваат дека челните луѓе на Баерн веќе оствариле контакт со Алегри, кој е слободен после заминувањето од Јувентус. Румениге верува дека трофејниот Италијанец би бил идеално решение за клупата на Баварците. Другиот кандидат е Јулијан Нагелсман, кој подолго време се поврзува со клупата на Баварците. 33-годишниот стратег со успех го води Лајпциг и смета дека е вистински момент да направи чекор напред во кариерата.

Германскиот шампион Баерн Минхен планира да му го продолжи договорот нанапаѓачот Ерик Максим Чупо-Мотинг. 32-годишниот Камерунец излезе како добра резерва за Левандовски особено на последните неколку средби за баварците. Баерн сака да има искусен играч за резерва на Полјакот и следната сезона, па затоа планира да го продолжи неговиот договор. Ситуацијата со неговиот договор, кој истекува ова лето, се очекува да се реши пред крајот на сезоната.

Ханс Дитер Флик одлучи да стави крај на неизвесноста и на сите шпекулации поврзани за неговата иднина во Баерн Минхен, соопштувајќи и на јавноста дека лично побарал раскинување на договорот со европскиот и светски шампион откако тимот доживеа елиминација од ПСЖ во Лигата на шампионите. Флик веќе извесно време има интерна „војна“ со Хасан Салихамиџиќ и по се изгледа истата ја доби популарниот Брацо, но од друга страна, се верува дека Ханси има навистина добра причина за заминување. „Ова беше емотивна приказна за нас во соблекувалната. Како тим, имавме незаборавно време заедно и истото беше навистина успешно. За нас играчите беше навистина важно оваа вест да ја дознаеме од тренерот, тој ни го кажа тоа лично пред да излезе со изјава во јавноста, тоа е за почит. Тоа е знак дека нашиот однос со тренерот е извонреден“, изјави капитенот Мануел Нојер.

Иднината на Лионел Меси е тема која понатаму е актуелна во Барселона од едноставна причина што договорот му завршува во месец јуни и останува неизвесно дали ќе остане на „Камп Ноу“ и по тој период. Според Гаизка Мендиета се ќе зависи од една работа-дали клубот ќе му даде гаранции на Лео дека ќе биде конкурентен за освојување на титули. „Сакаме да бидеме конкурентни и да освојуваме трофеи. Мислам дека Меси тоа го сака. Секако, важен е договорот и семејните околности. Ама само како играч, мислам дека тој сака да освојува трофеи. Ако види дека Барса може да победува и да се натпреварува за трофеи, тогаш сигурно ќе остане во Барселона. Ако не види дека се случува, ќе погледне на друго место. Се надевам исто како многу фанови на Барса дека Меси ќе остане. Сигурен сум дека останатите луѓе би сакале да го видат како игра на друго место во друга лига или клуб. Ама јас сум романтичар, особено во денешно време со играчи кои толку често менуваат клуб, што тој би ја имал целата своја кариера на тоа ниво во истиот клуб. Мислам дека би било неверојатно за него и Барселона“, вели Мендиета.

Една од целите на Јувентус за следната сезона е да заштеди на платите на играчите, па затоа клубот би можел да го напушти Алекс Сандро. Италијанските медиуми пренесуваат дека 30 годишниот Бразилец би можел да се пресели во Челзи. Томас Тухел се обидуваше да го дсоведе Сандро и додека беше тренер на ПСЖ, но тогаш францускиот и италијанскиот клуб не постигнаа договор. Сега Сандро би можел да се пресели во Челзи, а кон Торино да тргне Емерсон Палмери. Челзи Палмери го доведе пред три години од Рома, па така играњето во Серија А не му е непознато.

Toмас Тухел не му верува на Тами Абрахам кој сезонава постигна 12 гола и тој не се најде на клупата за мечот против Манчестер Сити во полуфиналето од ФА Купот. Поради ситуацијата на Абрахам од кога дојде Тухел се пишува за можно заминување на напаѓачот. Ситуацијата со него ја следат Лестер и Вест Хем. Кај Френк Лампард Абрахам беше еден од клучните играчи. Со 18 гоола минатата натпреварувачка сезона беше најдобар стрелец на екипата, повторно го носи тој епитетет, меѓутоа не се вклопува во плановите на Тухел. „Не носам одлуки врз основа на личната статистика на играчи. Нема влијание на играта какво што се бара од него. Потоа се повреди и ја изгуби можноста да се бори за место во екипата. Се наоѓаме во клучен дел од сезоната кога не е едноставно да се врати формата на одреден играчи. На него останува да напраи се што може“, изјави Тухел.

Ливерпул е подготвен да тргне во финална офанзива за потписот на 23 годишниот Осман Дембеле од Барселона, и тоа како замена за Садио Мане за кого се верува дека на лето може да си замине од „Енфилд“. Актуелната сезона е доста разочарувачка за Мане, откако досега успеа да постигне 12 погодоци во сите конкуренции, а само пет во 2021 година, па големи се очекувањата дека „Редсите“ на лето ќе се обидат да заработат добро на негов трансфер, иако неговиот договор истекува за две години. Шпански „Фихајес“ тврди дека Дембеле е наследникот на Мане во тимот на Ливерпул, Французинот има уште само една година од својот договор со Каталонците, а самиот тој потврди дека преговори за продолжување на соработката воопшто не започнале помеѓу обете страни.