Маркус Рашфорд и Букајо Сака и официјално го напуштија тренинг кампот на репрезентацијата на Англија.
Тие нема да можат да настапат на следните два натпревари, против Албанија во гости и потоа против Полска во Англија.
Се очекува Рашфорд и Сака да бидат на располагање на Солскјер и Артета по завршувањето на репрезентативната пауза.
Англија гостува на Албанија во недела во 18. часот, а потоа ја дочекува Полска веќе во среда со почеток во 21. часот.

Резервниот голман на фудбалскиот состав Баерн Минхен, Александар Нубел, сака да замине на позајмица во друга средина за да може да добие поголема минутажа, објави неговиот агент задолжен за трансфери.
24-годишниот голман кој во изминатата година пристигна од Шалке 04 и потпиша договор до 2025 година има одиграно само три меча за Баварците.
„Алекс сака да игра. Втора година по ред добива мала минутажа и затоа не може да напредува. Тој е млад и треба да се развива. Затоа ќе бараме опции да оди во друг клуб“, изјави Стефан Бакс кој му е агент задолжен за трансфери на младиот чувар на мрежата на Баерн Минхен.

Селекцијата на Белгија ќе замине без седум стандардни репрезентативци на мечот со Чешка во квалификацииите за Светското првенство.
Пет од нив играат во германскиот шампионат и нема да патуваат поради ограничувањата околу Ковид -19. Имено, сите што живеат во Германија можат да патуваат во Чешка само откако по нивното враќање ќе се подложат на 14-дневен карантин.
Петте играчи кои играат во Германија и нема да бидат на располагање селекторот се Дедрик Бојата (Херта Берлин), Кун Кастелс (Волфсбург), Торган Азар (Борусија Дортмунд), Орел Мангала (Штутгарт) и Томас Муние (Борусија Дортмунд). Покрај нив, селекторот Роберто Мартинез ќе ги нема и повредените: Томас Вермален и Јаник Фереира Караско.

Борусија Дортмунд подготви одговор за сите заинтересирани клубови кои ова лето ќе се обидат да го доведат Ерлинг Халанд.
ЕСПН дојде до сознанија дека Дортмунд ќе бара 180 милиони евра доколку некој сака да го доведе Халанд по крајот на оваа сезона.
Норвежанецот е желба на Барселона, Реал Мадрид, Манчестер Сити, Јувентус, Челзи, па останува прашање кој би можел да го доведе за оваа сума.
По систем на елиминација, Барселона ги нема тие средства, исто и Јувентус, Реал Мадрид побрзо би го довел Мбапе, па можеби остануваат Челзи и Сити, секако доколку продадат некоја од своите ѕвезди.
Трката поради цената веројатно ќе биде „бавна“, веројатно клубовите ќе чекаат до 2022. година, кога ќе биде активна клаузулата од само 75 милиони евра.

Поранешниот француски фудбалер Тиери Анри соопшти дека поради сеприсутниот расизам на социјалните мрежи, тој ќе ги избрише своите профили.
Анри изјави дека компаниите кои стојат зад социјалните мрежи, не направија доволно да го сопрат насилничкото однесување, кое редовно на мета ги има спортистите со црна боја на кожата.
„Ги бришам своите профили од социјалните мрежи додека надлежните не ги регулираат своите платформи со иста енергија како што тоа го прават кога се кршат авторските права.“ – вели Анри.
Французинот на Инстаграм и Твитер има 2,7, односно 2,3 милиони следбеници.

Поранешниот фудбалер на Хамбург и младата репрезентација на Германија, Мустафа Кучуковиќ е уапсен под сомневање дека тргувал со дрога, пишуваат германските медиуми. Во Хамбург и Гелзенкирхен се уапсени две личности поради трговија, а еден од нив е Кучуковиќ. Биле уапсени бидејќи продавале недозволени средства во Хамбург, а кај нив се пронајдени 230 килограми марихуана, 30 килограми хашиш и 50 килограми кокаин.
Кучуковиќ е роден во Босански Нови, а 2004. година настапуваше за младата репрезентација на Германија заедно со Мануел Нојер и Матс Хумелс. Беше голем талент, но не направи голема кариера. По заминувањето од Хамбург во 2007. година, настапуваше за, помеѓу другите, Гренобл, Сондерјиске, Котбус и Ханза Росток.

Андре Силва е голема желба на Барселона за следниот трансфер период, открива германски Билд. Португалскиот напаѓач блеска во дресот на Ајнтрахт сезонава, во 24 натпревари во Бундеслигата има 21 погодок и е втор стрелец во лигата со Ерлинг Халанд. Силва пред четири години од Порто премина во Милан за 38 милиони евра, но во Италија не се снајде, па прво беше на позајмица во Севиља, а потоа и продаден на Франкфурт како дел од трансферот на Анте Ребиќ. Билд наведува дека 25-годишниот Силва е желба на Барса бидејќи претходно веќе настапувал во Шпанија и знае каков е шпанскиот фудбал. Во 41 настап за Севиља постигна 11 погодоци. Се верува дека каталонскиот клуб би можел да го купи за 40 милиони евра, но Барселона ги нема тие средства, па најпрво ќе треба да продаде неколку играчи.

Дефанзивецот на Реал Мадрид и Шпанија, Серхио Рамос е близу до постигнување на светски рекорд. На натпреварот против Грција, шпанскиот капитен беше на теренот како дел од националниот тим по 179-ти пат. Најмногу настапи за својата репрезентација има египетскиот играч за врска Ахмед Хасан, кој има пет натпревари повеќе од Рамос. На 179 натпревари Рамос има постигна 23 погодоци и според овој податок е осми во историјата на шпанската репрезентација и најдобар меѓу сегашните играчи. Во групата Б од квалификацискиот циклус СП 2022, репрезентацијата на Шпанија игра против Грција, Шведска, Косово и Грузија. На 28 март, Шпанците ќе на гостуваат кај Грузија, а на 31 март ќе бидат домаќини на Косово.

Фудбалерот на Борусија Дортмунд, Дан-Аксел Загаду ќе го пропушти остатокот од сезоната поради повреда на коленото, соопшти германскиот клуб. Клубот соопшти дека на дефанзивецот ќе му биде потребна нова операција на коленото, откако веќе претходно имаше проблеми со лигаментите. Во јануари и февруари годианва, 21-годишниот Французин пропушти осум натпревари поради повреда на мускул, а вкупно сезонава одигра само 13 натпревари. Неговата повреда доаѓа во момент кога Борусија се подготвува за натпреварот од четвртфиналето од Лигата на шампионите против Манчестер Сити, а на табелата во Бундеслигата е на петтото место со 43 бодови, 18 помалку од првопласираниот Баерн.

Манчестер Јунајтед се наоѓа далеку од нивото кое со години го држеше додека беше предводен од Алекс Фергусон и далеку е од трката за титула во Премиерлигата. Сепак, се чини дека во клубот се задоволни со моменталната ситуација, па размислуваат на сегашниот менаџер да му понудат нова повеќегодишна соработка. Англискиот медиум „Мирор“ објави дека директорот на Јунајтед, Ед Вудворд подготви договор од 35 милиони евра за Оле Гунар Солскјер. Новиот договор би бил потпишан на вкупно три години, што значи дека Солскјер би заработувал скоро 10 милиони евра по сезона и би станал еден од најплатените тренери на светот. На клупата на Јунајтед е уште од 2018. година, кога го наследи Жозе Мурињо.