На натпреварот од плејофот за шампион на лигата во Кувајт одигран синоќа, видена е веројатно најлошата одлука откако се користи ВАР во светскиот фудбал.
Ал Кувајт во гости го победи Ал Сахел со 3:2 со гол од пенал во 11. минута од судиското продолжение, иако до 87. минута губеше со 2:1. Домаќините добија црвен картон во 77. минута, во 87. примија гол за 2:2, а во 101. минута гостите стигнаа до победа по комично досуден пенал.
Играчот на Ал Кувајт го помина својот чувар во казнениот простор и замавна во празно, по што падна на земја. Судијата во истата секунда досуди пенал, а потоа, за се да биде регуларно, отиде да ја провери снимката.
До екранот за ВАР помина покрај неколку доста лути личности, меѓу кои беше и Калид Ал Ганим, сопственикот на Ал Кувајт кој е пратеник во кувајтскиот парламент. Пред да ја погледне снимката, судијата подели уште неколку жолти картони, па погледна во екранот.
Таму јасно се виде дека гостинскиот играч бесрамно симулираше, но судијата мртов ладен ја потврди своајта одлука и покажа на белата точка.

Милан сака да го откупи дефанзивецот на Манчестер Јунајтед, Диого Далот. Според „Скај Спорт“, управата на „росонерите“ е задоволна од играта на 21-годишниот Португалец, кој игра за италијанскиот тим на позајмица и има намера целосно да ги откупи правата на младиот дефанзивец летото 2021 година. Во сезоната 2020/2021, Далот одигра 8 натпревари во Серија А, како и 6 натпревари во Лигата на Европа. Успеа да постигне 1 гол и 2 асистенции. Милан е лидер во Серија А со 46 поени од 20 одиграни натпревари. Диого Далот дојде на „Олд Трафорд“ летото 2019 година. За неговиот трансфер, Манчестер Јунајтед му плати на Порто 22 милиони евра, а во моментов неговата вредност се проценува на 12 милиони евра.

Манчестер Јунајтед врза два меча без победа во Премиер лигата, откако најпрво беше изненаден од Шефилд Јунајтед на домашен терен, а потоа одигра реми против Арсенал. Откако направи два кикса, Манчестер Јунајтед почна да ја губи битката за титулата, а легендарниот Рој Кин смета дека „црвените ѓаволите“ се исплашиле од титулата. „Ова е загрижувачко, им недостигаше верба за победа. Замислете дека сте Манчестер Јунајтед и не верувате во победа. Може да бараме изговори, ама ни недостигаше квалитет. Фудбалерите се исплашени од предизвикот“, кажа Кин. Манчестер Јунајтед во моментов има три бода помалку од лидерот Сити, кој има и натпревар помалку.

Лионел Меси проговори за важноста на фудбалот во неговиот живот. „Парите ми дозволуваат да живеам подобар живот, но тоа не е она што ме инспирира. Живеам за да играм фудбал, а не финансиски. Не играм за себе, туку за тимот“, изјави Меси за „Ел Мундо“. Договорот на Меси со Барселона важи до 30 јуни 2021 година. Минатото лето, аргентинскиот напаѓач се обиде да го напушти каталонскиот клуб, но сепак реши да остане. Главни претенденти за потписот на 33-годишниот играч се сметаат Манчестер Сити и ПСЖ. Оваа сезона, капитенот на Барселона учествуваше на 23 средби за Барселона, на кои постигна 15 погодоци и 6 асистенции.

Сами Кедира го напушта Јувентус и кариерата ќе ја продолжи во Бундеслигата, во дресот на Херта Берлин. Германецот не беше во плановите на Пирло и Јувентус му ја отвори излезната врата шест месеци пред истекот на договорот. За Кедира интерес покажуваа неколку клубови ширум Европа, но тој избра да се врати во Бундеслигата. Тој се договори со Херта Берлин каде ќе потпише две и пол годишен договор. Играчот веќе го минал лекарските прегледи и денес ќе стави потпис на договорот.

Жерар Деулофеу, потпиша договор со Удинезе, соопшти прес- службата на италијанскиот клуб. Договорот важи до 30 јуни 2024 година. Претходно, напаѓачот играше за тимот на позајмица. Деулофеу потекнува од школата на Барселона, во која се приклучи во 2003 година. Од каталонскиот клуб замина на позајмица во Евертон и Севиља, а во2015 година се врати во тимот од Ливерпул, но со постојан договор. Откако мина дел од сезоната 2016/2017 на позајмица во Милан, се врати во Барселона, но шест месеци подоцна замина во Вотфорд на позајмица. Летото 2018 година, англискиот клуб ги откупи правата на играчот. Оваа сезона, на 12 натпревари за Удинезе во сите натпреварувања, напаѓачот постигна еден гол и една асистенција.

Јувентус наводно одбил голема понуда од Ливерпул за турскиот дефанзивец Демирал. Црвените се во потрага за стопер поради големиот број повредени дефанзивци, а раководството на тимот од Енфилд го контактирале Јувентус. За 22 годишниот Демирал понудиле дури 45 милиони фунти. Сепак, Јувентус таа понуда ја одбил бидејќи сметаат дека турскиот дефанзивец вреди повеќе. Останува да видиме дали Ливерпул ќе испрати нова понуда за дефанзивецот на Старата дама или до крајот на преодниот рок ќе се обидат да најдат друго решение.

Серхи Роберто веќе неколку дена тренира со првиот тим и е се поблизу до враќање во игра, пишува Марка. 28-годишникот се опорави од повредата на десниот бут заработена на мечот против Атлетико Мадрид во ноември и веќе се подготвува со полна брзина. Тренерот Роналд Куман дури сериозно размислува да го вклучи и за натпреварот кој следи со Билбао. Опоравувањето на Серхио Роберто е одлична вест за тренерот на Каталонците, кој во негово отсуство имаше сериозни проблеми со десната бековска позиција.

Стефан Ел Шарави се враѓа во Рома. Договорот на напаѓачот со кинескиот клуб беше со важност до летото 2022 година, но предвидуваше клаузула што му овозможува на Стефан Ел Шарави да ја напушти Кина пред предвидениот рок.„Кога дојдов во Рим за првпат, сфатив дека на овој град и на клубот не им треба многу време да станат сакани. Напуштајќи го клубот, сфатив дека тие засекогаш ќе останат во моето срце. Сега со нетрпение очекувам да се вратам на натпреварите во овој дрес“, изјави Ел Шарави за прес-службата на клубот. За потсетување, италијанското крило ја напушти Рома летото 2019 година. За „волчицата“ тој одигра 139 натпревари, постигна 40 гола и 26 асистенции. Неговата вредност во моментов се проценува на 8 милиони евра.

Јирген Клоп ги разочара навивачите на тимот со веста дека Џо Гомез нема да се врати во игра оваа сезона. Дефанзивецот кој се опоравува од операцијата, нема да биде способен за игра до следната сезона. „Опоравувањето на Џо оди добро, но тој е сè уште далеку од враќање. Тој не е подготвен да истрча на теренот, дури и да оди во теретана. Тој има сериозна повреда. Не мислам дека ќе се врати во игра оваа сезона. Би бил многу изненаден во добра смисла на зборот ако тој успее, но не верувам во тоа“, изјави Клоп.