Претставништвото на Панини во Македонија кој го произведува албумот со самолепливи сликички за големите фудбалски собири објави дека на 5 април, официјално ќе стартува со продажбата албумот за Европското првенство каде ќе настапи и македонската фудбалска репрезентација.
Колекционерите на албумот Панини во нашата земја ќе имаат голема причина за уживање и предизвик, затоа што прв пат во фудбалската историја Македонија ќе биде дел од ЕП или СП и во албумот, кој останува засекогаш.
Се уште не е познато колку ќе чини едно пакетче и колку сличиња ќе има внатре. Но јасно е дека македонските фудбалски репрезентативци ќе бидат најпосакувани во пакетчињата.

Лукас Васкез ги одби сите понуди на Реал Мадрид, на лето заминува како слободен играч, а заинтересиран е Баерн Минхен?
Ова е помалку неочекувана вест, Васкез отсекогаш бил универзален војник за сите тренери, посебно за Зинедин Зидан, но далеку од тоа дека беше меѓу првите ѕвезди на екипата.
Реал изрази непочитување со понудата за договор од една година, Васкез одамна ги стопираше преговорите и ја бара најдобрата опција.
Баш таква и се појави, а весникот Ас пренесува дека договорот би можел да биде постигнат веќе во наредните неколку денови.
Васкез во Баерн скоро сигурно би играл на позицијата десен бек, на која Ханси Флик не смета на последното засилување Сар од Марсеј.
Васкез по потреба може да игра и како крило, што беше негова примарна позиција, но со време, како Хесус Навас, и тој „израсна“ во одличен бек.

Селекторот на македонската репрезентација, Игор Ангеловски и репрезентативецот, Бобан Николов на официјалната прес-конференција пред натпреварот против Романија во Букурешт ги истакнаа своите очекувања за првиот наш натпревар од квалификациите за Светското првенство.
„Најпрвин, наискрени желби за брзо опоравување од вирусот со КОВИД-19 до мојот колега од романската репрезентација. Ова се времиња кога мора да бидеме солидарни еден со друг и посакувам селекторот Радои да има негативен тест и да ја предводи својата репрезентација.
Ние имаме одредени проблеми со повредени и фудбалери кои недостасуваат, но за Македонија е најважно да функционираме како тим. Јас како селектор посакувам да ги имам најдобрите, но и во вакви околности ќе се обидеме да го извадиме максимумот од фудбалерите.
Ја респектираме романската селекција, имаат одлични фудбалери, но ние повтрдивме и во Лига на нации и во претходните квалификации дека можеме да се носиме со силни противници и не гледам причина да не биде така и на овој натпревар.
Доаѓаме во една пријателска земја, носиме и емоции затоа што Букурешт ќе биде наш дом и на Европското првенство и верувам дека тоа ќе ни биде добар мотив за квалитетен натпревар. Со Романија ќе бидеме противници на терен, но Букурешт како наш дом за Европското првенство посакувам да ни ја даде сета поддршка во јуни. Посакувам како наш пријателски народ, романците да ни дадат безрезервна поддршка на ЕП. Сега сме фокусирани на овој дуел и желбата позитивно да ги стартуваме новите квалификации.“ – изјави Игор Ангеловски на прес конференцијата.
„Се радувам на можноста да се видам и да настапувам против моите поранешни соиграчи кои ги знам долго време, јас дојдов во Романија на 12-13 години. Но, и покрај тоа што сме одлични пријатели, на терен ќе бидеме вистински противници и нека победи подобриот. Може да кажам дека сум среќен што Букурешт ќе биде и наш домаќин на Европското првенство, имам многу пријатели тука кои знам дека ќе бидат наша вистинска поддршка.“ – вели Бобан Николов.

Напаѓачот на фудбалскиот состав Јувентус, Кристијано Роналдо, може да го напушти Торино во текот на летото иако неговиот договoр е валиден до 2022 година.
Како што информира весникот -„АС“, „старата дама“ сè уште нема добиено предлози за Португалецот, но, доколку 36-годишниот играч изрази желба да си замине, Јувентус ќе биде отворен за дијалог и нема да му прави проблем.
Торинскиот клуб е подготвен да ги разгледа предлозите за Роналдо од најмалку 25 милиони евра. Доколку нема конкретни понуди, Бјанконерите ќе го задржат во составот.

Интер Мајами, клубот на Дејвид Бекам, се подготвува за новата сезона во МЛС.
Бекам за тренер го постави поранешниот соиграч Фил Невил, а воочи почетокот на сезоната, даде интервју во кое говореше за можното доаѓање на мегаѕвезда во МЛС.
„Кога влегувавме во оваа приказна со Интер во МЛС, секогаш се зборуваше за потенцијалното доаѓање на големи играчи откако ќе ја завршат кариерата во Европа. За тоа секогаш ќе се зборува, а искрено мислам дека за нив тоа нема да биде тешка одлука. Мајами е одлично место за живот, одличен град, а нашиот клуб има голем број на навивачи. Базата на домашни фудбалери е добра и мислам дека Мајами е доста привлечен за ѕвездите од Европа.“ – вели Бекам.
Меси и Роналдо се повеќе се споменуваат како можни доаѓања во САД, баш како што Бекам пристигна во Лос Анџелес во 2007. година. Тогаш не се знаеше, но Бекам по доаѓањето во МЛС со лигата договори ексклузивен попуст при купување на франшиза, доколку се одлучи на таков потег, што на крај и се оствари.

Една вест од Малдиви денеска предизвика големо внимание во фудбалската јавност и на овие простори.
Во главна улога е црногорскиот голман Милан Јеловац, кој сезонава настапуваше за Иглс од Малдиви, но деновиве доби отказ бидејќи одбил да прими вакцина против коронавирусот.
Поточно, тој не сакал да ја прими онаа која беше понудена, барал друга вакцина, но бидејќи друга немаше на располагање, му беше врачен отказ!
„Во прашање беше Астра Зенека, вакцина која не сакав да ја примам. Не бев единствениот кој тоа го направи. Од четворица странци во мојот клуб, тројца не сакаа да ја примат таа вакција. Слична беше ситуацијата и во други клубови. Не одбив вакцинација, туку не сакав да се вакцинирам со таа вакцина.
Следеа бројни уцени, но не прифативме Астра Зенека. За разлика од домашните играчи кои мораа да ја примат вакцината, 90% од странците добија отказ.“ – објаснува Јеловац за црногорските медиуми.

Тренерот на Барселона, Роналд Куман, ќе продолжи да работи во каталонскиот клуб и следната сезона.
Според изворот, вчера, Куман одржал неформален состанок со новиот претседател на Барселона, Жоан Лапорта. Лапорта ја изрази својата поддршка кон холандскиот тренере и рекол дека сака да продолжи да го гледа Куман како главен тренер на Барселона.
Куман го презеде тимот на Барселона во август 2020 година. Претходно, како тренер работеше во клубови како Витезе, Ајакс, Бенфика, ПСВ Ајндховен, Валенсија, АЗ Алкмар, Феенорд, Саутемптон, Евертон, а исто така беше на чело на репрезентацијата Холандија.
Барселона до овој момент има освоено 62 поени на 28 натпревари и се наоѓа на второто место на табелата во Примера.

Милан испрати нова понуда до голманот Џанлуиџи Донарума со цел продолжување на договорот со клубот, кој истекува за само три месеци.
Според понудата, 22-годишниот Донарума би добивал 8 милиони евра по сезона, додека се верува дека неговиот агент Мино Рајола бара плата од 10 милиони евра и вклучување на откупна клаузула во договорот.
Младиот голман е категоричен во својата желба да остане на „Сан Сиро“, но бидејќи сè уште нема договор меѓу двете страни директорите на клубот составија список на потенцијални наследници на Донарума. На овој список се наоѓаат две имиња на голмани од Италија, Хуан Мусо од Удинезе и Пјерлуиџи Голини од Аталанта.

Бурата се уште не застанува. Случувањата од Шкотска и елиминацијата на Глазгов Ренџерс од страна на Славија Прага имаше и свое трето полувреме.
Се судрија играчот на Глазгов Камара и играчот на гостите Кундела. Фудбалерот на Славија во еден момент му пријде на Камара и му упати неколку зборови кои баш го изнервираа фудбалерот на Стивен Џерард. Шкотскиот тим наведува дека се работи за расизам, додека Славија ги демантира тврдењата.
По крајот на натпреварот, двајцата се судрија и во тунелот. Отворена беше истрага, шкотската полиција има отворен случај, а се наведува дека Кундела ќе мора да оди на испитување.
„Доколку се докажат тврдењата против господинот Кундела, УЕФА има моќ драстично да го казни играчот. Во овој случај, 10 натпревари суспензија не се доволни, би требало да биде казнет на минимум една година, додека и клубот треба да сноси последици. Вклучувајќи одземање на бодови и/или дисквалификација.“ – вели адвокатот на Камара.

Предводникот на Интер, Антонио Конте може да си даде оставка доколку клубот не му гарантира нови трансфери.
Според информацијата која е објавена, во случај на напуштање на Интер, тренерот може да ги предводи Манчестер Јунајтед или Тотенхем. Платата на Антонио Конте во миланскиот клуб е 12 милиони евра по сезона и никој друг италијански клуб нема да му ја исплати таа сума, па враќањето во Премиерлигата е пореално решение за тренерот кој претходно беше на чело на Челзи.
Конте го презеде Интер летото 2019 година. Под негово водство, „нероазурите“ завршија на второто место во шампионатот во првата сезона. Тимот не можеше да ја помина групната фаза од Лигата на шампионите, но се пласираше во финалето на Лигата на Европа. Во италијанскиот шампионат Интер е лидер со 65 бода и е на добар пат да ја освои титулата и да го симне од тронот Јувентус.