Матијас Замер е фудбалска легенда на Борусија Дортмунд, а во моментов ја извршува функцијата на советник во клубот, па поради ваквата функција, привлече огромно внимание неговата последната изјава која ја даде за ѕвездата која сите очекуваат да си замине од „Сигнал Идуна Парк“.

Ерлинг Халанд ова лето може да си замине за сума од 75 милиони евра и тоа не треба да претставува проблем за најголемите европски гиганти, кои пак сега се борат да му понудат што е можно подобри услови на Норвежанецот кога се финансиите во прашање, но и времетраењето на договорот.

Медиумите во Англија откриваат дека Манчестер Сити е подготвен да му понуди неделна плата која надминува 500 илјади фунти, вест која во еден дел ја потврди и Матијас Замер кој вели дека паднал во несвест кога видел колку пари нудат „граѓаните“ за младиот напаѓач.

„Знам дека Манчестер Сити го сака Халанд. Кога видов за каква сума станува збор, каква сума му понудиле, се онесвестив. Сопругата мораше да ме подигне од подот. Ако се суди според сумата, може да дојде до реализација на таа зделка, не знам да бројам до толку добро, искрено, сакам да видам соработка меѓу Халанд и Гвардиола. Двајцата ќе имаат бенефит еден од друг, можам да замислам како ќе изгледа овој тим на Манчестер Сити со таков центарфор. Тоа би била интересна комбинација“, изјавил Матијас Замер.

Тренерот на Виљареал Унаи Емери, по победата од 3:0 како гостин над Јувентус во Лигата на шампионите, изјави дека неговиот тим успеа да елиминира еден од фаворитите за титулата во ова натпреварување.

Шпанците вешто се бранеа на стадионот во Торино и во последните 15 минути постигнаа три гола, два пенали со три удари кон голот со што го елиминираа италијанскиот гигант.

Виљареал се пласираше во четвртфиналето на Лигата на шампионите за прв пат по 13 години.

„Нашиот голман имаше одлична партија, имавме среќа после гредата на Влаховиќ во првото полувреме. Се браневме длабоко на својата половина, имавме трпение и на крајот го дочекавме нашиот момент“, изјави Емери на прес-конференцијата по натпреварот.

Играчот од средниот ред на Манчестер Јунајтед, Пол Погба, открил дека неговата куќа била ограбена за време на натпреварот против Атлетико во осминафиналето на Лигата на шампионите. Во тој момент во куќата биле неговите деца.

„Најлошиот кошмар на нашето семејство се случи ноќта кога нашата куќа беше ограбена додека нашите деца спиеја во нивната спална соба. Разбојниците беа во нашата куќа помалку од пет минути, но за тоа време ни зедоа нешто повредно од се што имавме дома… нашето чувство на сигурност е нарушено. Тоа се случи во последните минути од натпреварот кога знаеја дека нема да бидеме дома. Јас и сопругата побрзавме дома, не знаејќи дали нашите деца се добро или не. Како татко, можам да кажам дека нема полошо чувство на овој свет од тоа да не можеш да бидеш таму за да ги заштитиш твоите деца, и искрено се надевам дека никој никогаш нема да го почувствува она што јас го чувствував синоќа. Поради оваа причина би сакал да понудам награда за секој што има некаква информација за да ни помогне“, напиша Погба.

Да потсетиме, по резултатите од два натпревари, Манчестер Јунајтед загуби од Атлетико Мадрид со вкупен резултат 1-2 и испадна од Лигата на шампионите.

Тренерот на Ливерпул, Јирген Клоп беше презадоволен по победата на неговиот тим над Арсенал од 2:0 во одложениот натпревар од англиската Премиер лига.

Успехот во Лондон го остави Ливерпул на второто место во поредокот, но сега тимот заостанува само еден бод зад Манчестер Сити.

Двата тима имаат и директен дуел меѓу себе. Натпреварот чиј домаќин ќе биде Манчестер Сити  се игра на 10 април, и можеби ќе биде одлучувачки за титулата во оваа сезона. 

„Вистината е дека не размислувам многу за Манчестер Сити. Знам дека единствената шанса ни е ако победиме на сите останати натпревари до крајот. Во текот на последните неколку години, играме на екстремно високо ниво. Ова го прави секој натпревар потежок. Треба да уживаме, но и да бидеме подготвени за интензитетот“, изјави Клоп.

Дефанзивецот на Јувентус, Леонардо Бонучи го пропушти поразот од Виљареал со 0-3 поради повреда, но сепак преку пост на Инстаграм тој им се извини на навивачите на „старата дама“ за испаѓањето во осминафиналето од Лигата на шампионите.

„Доживувањето на ваков натпревар надвор од теренот за прв пат во кариерата и неможноста да бидам на теренот ме натера да разберам како се чувствуваат нашите навивачи во вакви моменти. Единственото нешто што можам да го направам во моментов е да им се извинам на сите. Треба да го претвориме ова разочарување во гнев и да го искористиме на нашите преостанати натпревари и да ги постигнеме нашите идни цели“, порача Бонучи.

Роберт Левандовски дефинитивно во овој момент е најважен фудбалер на Баерн Минхен, меѓутоа можеби неочекувано германскиот клуб се уште не му понудил нов договор на полскиот голгетер.

Во последниот период никој од Баер не разговарал со Левандовски на оваа тема, а тоа како што пишува реномираниот „Билд“ почнува да го иритира Левандовски. Во текстот се наведува дека Левандовски ваквото однесување на Баерн го смета за непочитување и размислува да не ја продолжи соработката по истекот.  Левандовски со Баерн има договор до 2023 година и во клубот заработува 24 милиони евра годишно, а германските медиуми шпекулираат дека во Баерн не се сигурни дали Полјакот заслуѕжува подобар договор со оглед на годините.

Однесувањето на Баерн го критикуваше и германската легенда Лотар Матеус кој не може да разбере зошто баварците така се однесуваат кога е тешко да се најде замена за Левандовски.

По елиминацијата на Јувентус од Виљареал во осминафиналето во Лигата на шампионите, Италија остана без учесник во четвртфиналето од елитното натпреварување. Претходно истата судбина го снајде и Интер кој беше елиминиран минатата недела.

Тренерот Масимилијано Алегри, кој се најде на удар на јавноста, изјави дека не ги обвинува фудбалерите, и ја нарече играта на својата екипа наивна.

„Виљареал играше со деветмина зад линијата на топка и дури не сакаа да излезат повисоко. Не се обидуваа  да нѐ нападнат и сакаа да го однесат натпреварот во продолженија. На крајот ние излеговме многу наивни и дозволивме да направиме грешки кои не чинат елиминација. Цели 75 минути игравме добро, но во фудбалот секогаш се можни вакви работи, посебно во Лигата на шампионите. Ќе го прифатиме овој пораз, не ги обвинувам фудбалерите“, изјави Алегри.

Капитенот на Атлетико Мадрид, Коке, не го криеше задоволството откако неговиот тим го победи Манчестер Јунајтед со 1:0 на „Олд Трафорд“,и се пласираше во четврт-финалето на Лигата на шампионите. 

„Сакаме да стигнеме што подалеку во Лигата на шампионите. Оваа победа е многу важна за нас бидејќи доаѓа во сезона полна со подеми и падови. Мислам дека заслуживме да победиме и на првиот натпревар во Мадрид. Денеска напорно се боревме и успеавме да го добиеме заслуженото“, изјави Коке.

Капитенот го коментираше и брилијантниот настап на голманот Јан Облак, кој имаше неколку извонредни интервенции на натпреварот со кои ја зачува недопрена мрежата на својот гол. 

„За мене, Облак е најдобриот голман во светот. Тоа уште еднаш го докажа на овој натпревар“, потенцира капитенот Коке.

Навивачите на Челзи кои допатуваа во Франција за реванш натпреварот од осминафиналето во Лигата на шампиони против Лил, направија неколку инциденти низ градот, искажувајќи ги своите фрустрации околу состојбите во својот клуб.

Според медиумите во Франција, дел од навивачите го скандираа името на Роман Абрамович, по што започнаа тепачка со полицијата која употреби солзавец за смирување на ситуацијата.

https://twitter.com/Ultramaniatics_/status/1504190950892982276?s=20&t=DSZny6SV9nlHXxJBaWk8oQ

Директорите на Интер се сретнаа со претставници на напаѓачот на Ајакс, Себастијан Алер, пишува „Газета дело спорт“.

Сепак, преставниците на Интер биле информирани дека холандскиот гигант бара 35 милиони евра за 27-годишниот играч од Брегот на Слоновата Коска, кој има одлична сезона во дресот на клубот од Амстердам и е еден од најпродуктивните напаѓачи во Европа. Досега оваа сезона Алер ​​има постигнато 32 гола на 34 натпревари во сите натпреварувања. Има 19 гола во шампионатот на Холандија и 11 во Лигата на шампионите.

Интер во моментов не сака да плати толкава сума за играчот, но самиот играч е отворен за трансфер во Серија А и двете страни ќе останат во контакт.