Дебела премија на фудбалерите за успешниот старт на мундијалските квалификации
Управниот одбор на Фудбалската федерација на Македонија на денешната седница одржана во „Куќа на фудбалот“ донесе одлука за финансиски награди за репрезентативците за успешните настапи во квалификациите за Светското првенство, но најави и какви премии ќе добијат фудбалерите за евентуален успех на ЕП 2020. УО донесе одлука да се исплати парична награда за македонската А репрезентација во износ од 150.000 евра за мартовските натпревари (Романија, Лихтенштајн и Германија) од квалификациите за Светското првенство. Исто така, секоја победа од групната фаза на Европското првенство, ФФМ ќе ја вреднува со 300.000 евра како парична награда за македонската репрезентација. Секој нерешен резултат на натпреварите од групната фаза на Европското првенство ќе се вреднува со 150.000 евра како парична награда.
Баер Леверкузен го претстави новиот тренер
Во најголемиот дел од европските лиги преостана да се одигра уште едно коло. Во Бундеслигата последното ќе се игра во сабота, а сите натпревари ќе започнат во ист термин од 15:30 часот. Баер Леверкузен не може да оди ниту погоре, ниту подоле и сезоната ќе ја заврши на шестата позиција која наредната сезона ги води во Лигата на Европа. Денес од овој клуб е објавено дека Швајцарецот Херардо Сеоне ќе го води тимот по завршувањето на сезоната. На клупата на Баер во овој момент Ханс Волф кој го наследи Питер Бош во март месец. Сеоне до сега го водеше тимот на Јанг Бојс со кој освои титула во Суперлигата на Швајцарија. Со Баер потпиша договор до 2024 година.
Силекс е освојувач на Купот на Македонија
Фудбалерите на Силекс славеа победа со 4:3 по пенали на Академија Пандев и се радуваа на трофејот од Купот на Македонија. Во регуларниот дел, натпреварот заврши нерешено, без голови. И во продолжението, два пати по 15 минути немаше погодок. Двете екипи одиграа доста тврд натпревар, неефикасен. Во пенал серијата, екипата на Силекс покажа поголема концентрација и решителност и успеа да слави со 4:3. Кај Академија Пандев во последната серија промаши Велиновски, а Карчевски претходно ги постави конечните 4:3. По 24 години, екипата предводена од тренерот Горан Симов успеа да го освои трофејот во Купот на Македонија.
Алаба и Арнаутовиќ ја предводат Австрија на Европското првенство
Селекторот на фудбалската репрезентација на Австрија, Франко Фода, го објави поширокиот список на репрезентативци кои се надеваат дека ќе добијат шанса да настапат на претстојното Европското првенство во текот на летото. На истиот се запишани имињата на Алаба кој од Баерн Минхен ќе замине во Реал Мадрид, потоа Арнаутовиќ, Шалгер, Сабицер итн. Познато е дека Австрија ќе и биде првиот противник на Македонија на дебитантскиот настап на континеталниот собир. Мечот против Австрија ќе го одиграме на 13 јуни на стадионот во Букурешт во Романија.
Барса и Атлетико подготвуваат трампа Гризман-Жоао Феликс
Барселона и Атлетико можат да разменат фудбалери во летниот преоден рок. Според изворот, каталонскиот клуб сака да го размени Антоан Гризман со напаѓачот на Атлетико, Жоао Феликс. Французинот ги бранеше боите на Атлетико од 2014 до 2019 година по што се пресели во Барселона за 120 милиони евра. Португалецот пак, се пресели во Атлетико од Бенфика во 2019 година за 127 милиони евра. 21-годишниот играч во тековнава сезона има седум погодоци (еден од пенал) и пет асистенции на 30 натпревари во шпанскиот шампионат.
Србинот Митровиќ желба на Мурињо во Рома
Српскиот репрезентативец Александар Митровиќ, по се изгледа, ова лето ќе си замине од фулам кој испадна од Премиер лигата и на повидок е негова преселба во Италија. Српските медиуми пишуваат дека Митровиќ добил повик од новиот тренер на Рома, Жозе Мурињо, кој сака да го донесе во редовите на „римската волчица“. „Митрогол“ не беше задоволен од настапите под диригентската палка на Скот Паркер, затоа што имаше само 13 старта на мечевите на Фулам сезонава, иако постигна 26 гола сезоната претходно. Мурињо е навистина заинтересиран за Митровиќ, кого сакаше да го донесе и претходно во Тотенхем. За српскиот центарфор интерес има од Вест Хем.
Роналдо за двајца играчи рече дека ќе ги наследат него и Меси
Кристијано Роналдо веќе има 36 години. Претходните 13 години во светскиот фудбал ги одбележаа доминацијата на Португалецот и Лионел Меси. Двоецот освои 11 од 12 Златни топки во тој период, а доминацијата накратко ја прекина само Лука Модриќ. Роналдо и Меси и понатаму се важни карики во своите екипи, но се чувствува дека се се подалеку од врвот во својата кариера. Новинарите кои го интервјуираа Роналдо ги интересираше кого Португалецот гледа како играч кој ќе го замени него и Меси, односно ќе го преземе приматот во светскиот фудбал. „Тешко е да се впери прстот во само еден играч, но возбудливо е да се види оваа нова генерација која доаѓа. Ерлинг Халанд и Килијан Мбапе се играчите кои доаѓаат и се фантастични. Некои играчи може да имаат една или две одлични сезони, но оние најголемите се способни да го држат високото ниво доста долго. За тоа е потребно многу труд и работа.“ – вели напаѓачот на Јувентус. „Се надевам дека ќе ме паметат како голем играч, како некој кој напорно работеше и секогаш даваше се од себе да помогне на екипата. Сметам дека со тоа го заслужив своето место во историјата.“ – заклучи Роналдо.
Одредени бараж натпреварите за ПМФЛ
Ренова – Охрид и Тиквеш – Силекс се бараж натпреварите за Првата македонска фудбалска лига кои ќе се одиграат на Националната арена „Тодор Проески“, односно на тренинг центарот „Петар Милошевски“ во Скопје. Двојките и местата на одигрување беа одредени по направената ждрепка во прес центарот на Националната арена. Ренова и Охрид својот меч ќе го одиграат на стадионот во комплексот „Куќа на фудбалот“, додека Тиквеш и Силекс ќе се соочат на Националната арена „тодор Проески“. Натпреварите се играат во 25. мај (вторник) од 16.00 часот. Се игра еден натпревар, а доколку во регуларните 90. минути нема победник, веднаш ќе решава пенал серијата.
ЕУРО2020 – 02. Украина одблиску
Украина е „нагазна мина“, Шевченко има селекција која секого може да победи. По украинската независност и отцепот на земјата од Советскиот сојуз, Украинците го одиграа својот прв натпревар против Унгарија на 29 април 1992 година. Најголем успех на оваа селекција на светската сцена е четвртфиналето на Светското првенство во 2006 година. Како нација домаќин, Украина автоматски се квалификувала за шампионатот на Европа во 2012 година. Четири години подоцна, Украина се квалификуваза Европското првенство во 2016 година, преку плеј-оф. Украина се смета за специфичен случај на успешна младинска фудбалска елита во Европа и светот, но сепак не успева да го донесе истиот успех во сениорска фаза. Селекцијата до 20 години е актуелен светски шампион, додека екипата на до 21 години освои сребрен медал на Европскиот шампионат.
Најголем успех 15 јуни 2019 година Украина е актуелен светски првак за фудбалери до 20 години откако оваа селекција успеа да се закити со златниот медал на шампионатот што се одржуваше во Полска. Во младинскиот мундијал преполн со изненадувања фаворитите испаднаа во раната фаза од првенството, а во големото финале се сретнаа Украина и Јужна Кореја (3-1). Интересно, Корејците први поведоа со пенал во 5. минута, но потоа пресврт на Украинците со два гола донесе Суприаха. Јужна Кореја се обиде да израмни, но одличен на голот на Украина беше младиот голман на Реал Мадрид, Лунин. Казната за промашените шанси стигна во 89. минута, кога Цитаишвили ги постави конечните 3-1 и го запечати најголемиот успех во историјата на украинскиот фудбал.
Најзаслужен за успехот: Шевченко ја препороди Украина Легендарниот украински напаѓач Андриј Шевченко на функцијата го наследи Михаил Фоменко, кој поднесе оставка поради лошиот резултат кој го оствари со репрезентацијата на ЕУРО 2016. Украина е единствената репрезентација која на ЕП го загуби сите три натпревара и која не постигна гол. Шевченко професионалната кариера ја заврши по Европското првенство во 2012 година. Играчката кариера ја мина во Динамо Киев, Милан и Челзи, а за националниот тим настапил на 111 натпревари на кои постигнал 48 голови. Во 2004 година ја освои „Златната топка“, а во 2005 година „Златната копачка“. Украина во квалификациите за Светското првенство во 2018 година блесна во И групата, каде играше заедно со Хрватска, Исланд, Финска, Турција и Косово. Потоа без пораз ги мина и евро- квалификациите и на овој шампионатот доаѓа со големи амбиции.
Македонија секогаш поразена против Украинците Украина – Македонија 1-0 13 октомври 2014 Македонската репрезентација загуби со 1-0 од Украина во натпреварот од третиот круг од квалификациите за пласман на ЕП 2016. Во Лвов, Украина ја доби фудбалската битка со единствениот погодок на дуелот на Сидорчук во судиското надополнување на првото полувреме. Македонските репрезентативци беа рамноправен противник, не искористивме неколку одлични шанси за гол и по три кола од Ц групата имаме биланс од победа и два порази. Адис Јаховиќ, Адеми и Ивановски во првиот дел, Александар Трајковски и Бесарт Абдурахими во второто полувреме имаа одлични можности, но не ја погодија мрежата на Пјатов. Сидорчук со вториот гол за Украина во вториот настап го одлучи победникот, а домаќините можеа да зголемат на 2-0 на стартот од вториот дел кога Јармоленко промаши пенал. Македонските репрезентативци се бореа до максимум за секоја топка, што сепак не беше доволно за успех. Во завршницата висеше голот на Украина, неколку корнери во серија за Македонија, но, сепак, мечот заврши со минимален триумф за противникот. Сепак, останува впечатокот дека Македонија во Лвов го одигра најдобриот натпревар во овие квалификации, а Украинците можат да бидат повеќе од среќни затоа што остварија триумф. Македонија заслужи најмалку бод.
Македонија – Украина 0-2 10 октомври 2015 година Македонската фудбалска репрезентација загуби од Украина со 2-0 на последниот домашен натпревар од квалификациите за Европското првенство. Првиот гол за гостинската репрезентација го постигна Селезњов во 58. минута со удар од белата точка откако во петерецот со рака играше Жута. Во 88. минута гостинските фудбалери преку Кравец ја потврдија победата. Во првото полувреме игравме солидно. Потоа следуваше пеналот и истиот го промени текот на играта. Се обидовме со замени. Заигравме пофанзивно, но примивме втор гол. Хасани се повреди во првата фаза од средбата. Украина има голем број на играчи и разликата во класа е очигледна. За жал не ја повторивме играта со Шпанија. Момците се борат но успеавме да нападнеме“-изјави селекторот Љубинко Друловиќ.
Распродажба во Реал – Перез „брка“ дури девет играчи
Шпанскиот реномиран весник „Марка“ објави текст под наслов „Планот на Мадрид: Продажби да, позајмици не“, во кој детално ги опишува плановите на Флорентино Перез и Реал за претстојниот трансфер период. Целта на Реал ова лето ќе биде максимално да ги намали трошоците, но и со продажбата на играчи да заработи што повеќе пари, кои веднаш ќе се вложат во нови играчи. Главна мета е Килијан Мбапе од ПСЖ, но се споменуваат уште неколку играчи како што се Ерлинг Халанд и Едуардо Камавинга. Планот на Реал всушност е едноставен. Перез и неговите соработници одлучија да се ослободат од дури девет играчи, па со заработката од нивните трансфери да инвестираат во нови играчи. Брахим Диаз, Дани Себаљос, Лука Јовиќ, Хесус Ваљехо, Такефуса Кубо, Иско, Борха Мајорал, Герет Бејл и Реиние се играчите кои се најдоа на пописот. Некои од нив се во клубот, некои на позајмици, а еден играч ќе претставува посебен проблем. Се работи секако за Бејл, кој во моментот е позајмен на Тотенхем, а клубот од Лондон нема намера да го откупи неговиот договор. Веќе неколку трансфер периоди Бејл е главна тема кога е Реал во прашање, но досега не е пронајден ниту еден клуб кој би имал желба во целост да ја преземе неговата плата. Истата мисија го очекува Реал и ова лето.
