Аргентинските медиуми јавуваат дека Серхио Агуеро добил понуда од Барселона да и се приклучи пред почетокот на идната сезона. Аргентинскиот напаѓач, кој е најдобар стрелец во историјата на Манчестер Сити, има важечки договор со англискиот клуб до крајот на сезонава, а неговиот евентуален трансфер во Барселона многумина го гледаат како обид на клубот да се задржи Лионел Меси. Агуеро оваа сезона не се наигра, делумно поради повреди и поради тоа што Манчестер Сити и без него има сјајни резултати. Разделбата е на повидок, а и самиот Агуеро неодамна потврди дека би сакал да заигра со Меси. Шпанските медиуми ја продолжуваат оваа приказна и тврдат дека тоа е можно, но само доколку Агуеро се согласи на драстично намалување на платата. Барселона е во финансиски проблеми, се најавуваат нови намалувања на платите и нов голем терет врз буџетот не доаѓа предвид. Агуеро има плата од 15 милиони евра по сезона, а доколку сака да заигра во Барселона, ќе мора да се согласи на намалување на платата од 50 отсто.

Фудбалерот на Интер, Милан Шкринијар изјави дека неговата екипа веќе не е „лудиот Интер“. Интер е во серија од седум победи по ред во италијанското првенство, односно 10 натпревари без пораз и е прв на табелата со шест бодови повеќе од второпласираниот Милан. „Ова веќе не е лудиот Интер. Ова е Интер на Конте. Оваа година Серија А е поизрамнета во однос на минатата сезона. Среќни сме што сме први, но мораме тука да останеме до крајот.“ – изјави Шкринијар. Шкринијар го постигна победоносниот погодок во натпреварот против Аталанта, а Интер сезонава е доста критикуван поради дефанзивната игра. „Не им се допаѓа на сите нашиот стил на игра, но во овој момент најважно е да се победува. Мораме да освојуваме бодови дури и ако играме лошо.“ – наведува словачкиот фудбалер. Тој рече и дека на своето тело ќе го истетовира шампионскиот трофеј доколку Интер го освои. „Мораме да се концентрираме како би правеле што помалку грешки. Ако го освоиме Скудетото, ќе го истетовирам на мојата кожа. Тоа ќе биде момент за паметење.“ – заклучи Шкринијар.

Актуелниот италијански шампион Јувентус пред три години го доведе Кристијано Роналдо во обид да ја освои Лигата на шампионите, а со славниот Португалец во три сезони не стигна ниту до полуфинале. Роналдо во три години за Јувентус постигна 14 погодоци во ЛШ, еден помалку од учинокот во последната година во Реал. Освен тоа, Јувентус до неговото доаѓање во последните десет години два пати играше финале, а со најскапиот играч во клупската историја не отиде подалеку од четвртфинале. Се уште не се знае каква е иднината на 36-годишниот Роналдо во Јувентус, а италијанскиот новинар Фабрицио Романо јавува дека клубот наскоро ќе решава за тоа. Договорот на Роналдо со Јувентус трае до крајот на идната сезона. Романо наведува и дека Јувентус ќе прави „ремонт“ на екипата, а Вестон Меккени, Федерико Киеза, Матијс Де Лихт и Војчех Шчешни ќе бидат играчите околу кои ќе се гради новиот Јувентус. Извесно е дека клубот ќе го напушти Арон Ремзи, кој не се покажа како засилување, а тренерот Андреа Пирло веќе најави дека останува на клупата и нема намера да си замине по неуспехот во Лигата на шампионите.

Реал Мадрид започна преговори за нов договор со еден од нивните главни дефанзивци – Рафаел Варан. Актуелниот договор на централниот дефанзивец со Реал Мадрид истекува летото 2022 година. Од „Сантијаго Бернабеу“ се надеваат дека ќе ја избегнат можноста да го загубат овој фудбалер без никакво обештетување за помалку од една година и се решени да му се посветат на играчот за многу подолг временски период. Според „Марка“, преговорите течат добро и наскоро се очекува договор меѓу двете страни. Во последно време се почести се шпекулациите за иднината на 27-годишниот дефанзивец, па дури имаше информации дека играчот им рекол на управата на Реал Мадрид дека сака да замине на лето. Сепак, доколку се согласи на нов договор со актуелниот шпански шампион, Варан сигурно ќе ги олади амбициите на другите големи европски клубови да го привлечат во нивните редови. Французинот игра во Реал Мадрид од 2011 година, кога го купија од неговиот матичен клуб Ленс. Оваа сезона Варан има 33 натпревари во сите натпреварувања и постигна два гола.

По барање на раководството на Премиерлигата, стопирани се повеќе интернет апликации и веб сајтови кои се занимаваат со нелегално пренесување на телевизиите кои ги имаат правата за вршење пренос на натпреварите во повеќе европски фудбалски првенства, меѓу кои и оние од елитата на Англија.
Според неофицијални информации, повеќе од 43 милиони гледачи во светот ја користеле апликацијата Мобдро, преку која може да се гледаат повеќе од 50 светски познати спортски ТВ канали.
Во целата акција за згаснување на оваа апликација биле вклучени: агенцијата за интернет криминал во Англија и полициите на Шпанија, Англија и Италија.
Сопствениците на Мобдро во минатата година од рекламите кои ги емитувале преку апликацијата заработиле 5 милиони евра.

Диего Коста веќе некое време е без клуб, откако го раскина договорот со Атлетико Мадрид.
Италијанските медиуми пренесуваат дека голема е веројатноста 32- годишниот напаѓач да ја продолжи кариерата во Серија А.
Коста има понуда од Бенфика, но тој ги чека италијанските гиганти Милан и Јувентус, кои веќе стапиле во контакт со неговиот агент.
Двата клуба се во потрага по квалитетен напаѓач за следната сезона и се заинтересирани за Диего Коста, кого можат да го донесат без обештетување.
Официјални понуди се уште нема, но јасно е зошто напаѓачот ги одбива сите други клубови, бидејќи сака кариерата да ја продолжи во Серија А.

Претседателот на клубот Насер Ал-Келаифи е убеден дека Нејмар и Мбапе ќе останат во Париз.
После синоќешната елиминација на Барселона во ЛШ, претседателот истакна дека двете ѕвезди ќе останат во Париз засекогаш. „Мбапе и Нејмар се парижани и ќе останат во Париз засекогаш“, категоричен беше Ал Келаифи, кој за прв пат јавно проговори за иднината на двете ѕвезди.
Потоа тој го коментираше натпреварот како и пласманот во четвртфинале во Лигата на шампиони. „Голема чест е да се пласирате во четвртфинале во Лигата на шампионите.
Веќе заборавив што се случи пред четири години, тоа ќе остане во историјата. Елиминиравме одличен тим и сега сме меѓу најдобрите осум екипи“.

Миралем Пјаниќ минатото лето се пресели во Барселона како големо засилување, но засега не ги оправда очекувањата.
Босанскиот плејмејкер е во втор план на кај тренерот Куман и често ја грее клупата за резерви, па не е задоволен од својот статус на „Камп Ноу“.
Пјаниќ не се снајде најдобро во Барселона, па е спремен да ја промени средината после само една година.
Барселона има потреба од финансии, па го стави 30-годишниот плејмејкер на продажба. Најсилен интерес за Пјаниќ покажуваат неколку италијански клубови, а и самиот фудбалер сака да се врати во Серија А.