Кристијано Роналдо го постигна стотиот погодок во дресот на Јувентус, но ова лето би можел да го промени клубот. Јувентус би можел да остане без Лига на шампиони наредната година, а тоа не ги задоволува амбициите на Роналдо. Со тоа, Јувентус тогаш не би можел да си ја дозволи платата на Роналдо во висина од 30 милиони евра. На почетокот од неделава, Роналдо со сопственикот на Јувентус, Андреа Ањели беше во посета на фабриката на Ферари. Тој се „почасти“ со автомобил вреден 1,6 милиони евра. Сопствениците на Јувентус на тој начин се обидоа да ја расположат својата најголема ѕвезда, бидејќи познато е дека Роналдо е голем љубител на скапи автомобили. Роналдо во својата гаража веќе има два скапи Бугати (Чирон и Вејрон), Мекларен Сена, Ламборџини Авентадор, Шевролет Камаро, Мерцедес АМГ ГЛЕ, Ролс Ројс Кулинан, Континентал ГТ, Ферари Ф12 ТДФ и Мерцедес Класа Г Брабус. Неговите автомобили вкупно вредат околу 18 милиони евра. Португалецот за околу 10 милиони евра купи и Бугати Чентодиечи. Такви постојат само десет во светот, а еден од сопствениците е Роналдо.

Легендата на шпанскиот фудбал, Чави Ернандес сепак нема да го наследи Роналд Куман на клупата на Барселона за новата сезона. Ова е потврдено откако легендарниот Чави ја прифати понудата од Ал Сад за нов двегодишен договор. „Заедно постигнавме многу, победуваме и даваме голови. Оваа поддршка е најдоброто што еден тренер може да посака. Не постои клаузула за предвремен раскин на договорот на сметка на Барселона. Имам двегодишен договор и го почитувам.“ – вели Чави.

Јувентус изгледа конечно пронајде клуб за Даглас Коста и тоа клубот од младоста на Бразилецот. Кога минатиот месец првпат се појави можноста Коста да се гласи во Гремио навивачите на овој клуб беа воодушевени. Потоа се огласи од клубот и соопштија дека финансиите не дозволуваат да размислуваат во тој правец. Но, изгледа дека во последните денови работите се промениле – Даглас Коста е на чекор од Гремиo! Бразилските медиуми пренесуваат дека утрово бил одржан клупски состанок во Порто Алегри на кој присуствувал и самиот Коста. На состанокот биле најважните луѓе на Гремио и менаџерот кој го застапува фудбалерот на Јувентус, Жорж Машадо.

Душан Влаховиќ оваа сезона прикажува фантастични настапи во дресот на Фиорентина. Влаховиќ оваа сезона успеа да се избори за место во стартниот тим, a својата шанса и тоа како знаеше да ја искористи. Овој 21 годишен напаѓач во досегашниот дел од сезоната одигра 37 натпревари и постигна 21 гол во сите натпреварувања со што го привлече вниманието на себе на повеќе европски клубови. Во Фиорентина се свесни дека тешко ќе го задржат Влаховиќ во своите редови и сакаат да извлечат што е можно повеќе пари за неговиот трансфер. „Газета“ денес објави дека челниците на Фиорентина одредиле цена за овој 21 годишен напаѓач и дека Влаховиќ може да го напушти клубот ако некој за него плати 80 милиони евра.

УЕФА донела конечна одлука за местото каде што ќе се игра финалето во Лигата на шампионите. Имено, како и што се најавуваше Истанбул нема да биде домаќин, а финалето ќе се игра на „Драгао“ во Порто. Според информациите на „Скај“ ова е конечна одлука на УЕФА. Причината поради која Челзи и Манчестер Сити нема да играат на „Ататурк“ стадионот во Истанбул е ситуацијата со коронавирусот во Турција. Се шпекулираше дека мечот може да се игра на „Вембли“ затоа што во прашање се две англиски екипи, сепак тоа нема да се случи. Многу брзо се очекува и официјалната потврда од УЕФА.

Оливие Жиру може да го смени клубот во текот на летниот преоден рок. Според „Калчомеркато“, два италијански клуба Интер и Лацио се заинтересирани за францускиот фудбалер.
Договорот на фудбалерот со Челзи истекува на крајот на сезоната, па тој ќе може да се приклучи на новиот клуб како слободен агент. За играчот е заинтересиран и турскиот Фенербахче. Оваа сезона, Жиру одигра 28 натпревари во сите натпреварувања, постигнувајќи 11 гола.
Французинот е во Челзи од 2018 година, со клубот ги освои ФА купот 2017/2018 и Лигата на Европа 2019 година. Пред тоа, Оливие Жиру играше за друг тим од Лондон, повеќе од пет години ги бранеше боите на Арсенал.

Роберто Манчини ќе го продолжи договорот со репрезентацијата до 2026 година.
Според изворот, платата на Манчини во националниот тим ќе биде 3 милиони евра годишно. Манчини го предводи италијанскиот национален тим од 2018 година. Претходно беше тренер во Зенит, Интер, Галатасарај, Манчестер Сити, Лацио и Фиорентина. На Европското првенство, италијанската репрезентација е во групата А и ќе игра натпревари со Швајцарија, Турција и Велс.
Исто така, репрезентацијата на Италија ќе игра во полуфиналето од Лигата на нации со шпанскиот тим. Во квалификациите за СП 2022 година, Италијанците играат со Швајцарија, Северна Ирска, Бугарија и Литванија.

Лионел Меси може да остане во каталонскиот клуб. Според „Диарио Спорт“, претседателот на Барселона, Жоан Лапорта, во неколку наврати се сретнал со таткото на фудбалерот и агентот Хорхе Меси. Забележано е дека веќе во текот на првите преговори, двете страни се блиску до договор за продолжување на соработката.
Лапорта објасни какви услови е подготвен да му понуди на Меси, а овој предлог беше одобрен од семејството на фудбалерот. Во исто време, и покрај постигнатиот напредок, деталите сè уште треба да се допрецизираат. Меси, наводно, е поблиску до одлуката да остане, иако конечниот договор е уште далеку.
Претходно беше кажано дека Меси е близу до продолжување на договорот со Барселона до 2023 година. Наводно, Лео е подготвен да ја намали тековната плата за 50% доколку клубот потпише двегодишен договор со него, кој ќе вклучува подоцна преселување во МЛС и улогата на претставник на клубот во САД. По враќањето од САД, Аргентинецот сака да добие позиција во структурата на Барселона.

Џанлуиџи Буфон потврди дека на крајот од сезоната ќе го напушти Јувентус и во таа прилика додаде дека се уште не е сигурен дали тоа значи крај на кариерата или во евентуална нова понуда ќе најде мотивација за продолжување понатаму.
Трофејниот 43-годишен голман кариерата ја започна во Парма, а покрај една помината сезона во ПСЖ, бранеше за Јувентус од 2001. до 2018. година, односно од 2019. па до денес. Доколку информациите кои кружат низ медиумите се точни, тој од следната сезона би можел да биде нов играч на Барселона.
Каталонскиот клуб го контактираше Буфон и му нуди место на резервен голман, кој по потреба ќе биде поддршка за Марк-Андре Тер Штеген. Истовремено се тврди дека Барселона е подготвена да го продаде Нето, како би ја олеснила финансиската ситуација.
Нето сезонава бранеше на три натпревари во Лигата на шампионите, во шест првенствени и во два натпревари од Купот на кралот.
Буфон собра 12 настапи за Јувентус, на шест од нив не прими ниту еден гол, а вкупно седум пати ја вадеше топката од својата мрежа.

Оливер Бироф, директорот на германската репрезентација, потврди дека наредниот германски селектор би требало да биде Ханси Флик.
Флик на крајот од сезоната го напушта Баерн и на клупата на Германија ќе го наследи Јоаким Лев, кој на Германија во 2014. година му ја донесе титулата светски првак.
„Не мислам дека одлуката ќе биде донесена во наредните неколку денови, но би сакал се да биде решено пред Европското првенство:“ – вели Бироф одговарајќи на прашање за именувањето на Флик.
„Имам доверба во него и знам колку му е важен националниот тим. Намерно не ги интензивиравме нашите разговори пред Баерн да ја освои титулата, но сега ќе можеме да разговараме.“
Флик би требало да потпише тригодишен договор со фудбалскиот сојуз на Германија и да ја преземе репрезентацијата по Европското.