Романскиот судија Себастијан Колтеску е суспендиран до крајот на сезоната, објави УЕФА. Да потсетиме, Колтеску предизвика голем скандал за време на натпреварот во ЛШ помеѓу ПСЖ и Башакшехир во Париз на 8 декември минатата година. Тогаш Романецот го искористи зборот “негро“ додека се обидуваше да му објасни на еден од играчите на Башакшехир, по што сите играчи на турскиот првак го напуштија теренот. Натпреварот продолжи следниот ден, а ПСЖ славеше убедливо. Иако Колтеску упати извинување и убедуваше дека немал намера да навреди некој, УЕФА го суспендираше и тој нема да биде на фудбалските терени до крајот на сезона 2020/21.

Работнички оствари важна гостинска победа (0-2) против второпласираниот тим на табелата, Шкупи. Тимот на Александар Влахо одигра одличен натпревар, а славеше со головите на Кристијан Стојкоски и на Никола Прелчец. Шефот на стручниот штаб е задоволен од изданието на тимот, заслугите им ги припишува на фудбалерите, а вели дека ова е само почеток на еден нов проект на клубот за европски Работнички. „Честитки за фудбалерите, одиграа одличен натпревар, ги исполнија сите поставени задачи, максимално ги испочитуваа и тактичките замисли кои ги договоривме пред мечот. Тоа веднаш даде резултат, мислам дека го изненадивме Шкупи со офанзивниот пристап и со високиот пресинг уште на самиот почеток од натпреварот. Кога ќе се оствари триумф против Шкупи на гости, тоа секако предизвикува задоволство. Но, морам да напоменам дека се уште сме на самиот почеток. Ова е проект на кој треба да работиме сериозно во наредниот период и постепено да го надградуваме, а крајната цел е тим на Работнички со еден европски и модерен лик. Стратегијата на клубот секако останува да се форсираат млади и талентирани играчи кои ќе треба да израснат во фудбалери од европски калибар. Работнички има голем фудбалски потенцијал, среќен сум што заедно со спортскиот директор Горан Станковски и со претседателот Драган Поповски направивме една добра селекција, која треба да ја усовршуваме. Мислам дека сме на вистинскиот пат, но ќе треба да се докажуваме и да се подобруваме на секој нареден натпревар“, вели тренерот Александар Влахо. Работнички на стартот од третиот круг на натпреварувањето во Првата фудбалска лига в сабота на домашен терен ќе го пречека составот на Академија Пандев.

Екипата на Челзи синоќа го победи Евертон со 2-0 во меч од 27. коло од Англиското фудбалско првенство со што германскиот тренер, Томас Тухел, успеа да влезе во историјата на Премиер лигата. Тој е првиот што воведните пет домашни натпревари ги завршил без примен гол. Одличната серија на „сините“ под диригентската палка на Тухел започна против Вулверхемптон на 27 јануари кога беше 0-0. Потоа лондончани победија со 2-0 против Барнли и Њукасл и ремизираа без голови со Манчестер Јунајтед.

Преговорите помеѓу Баерн Минхен и Кингсли Коман за продолжувње на договорот се замрзнати, пренесува германски „Кикер“.
24-годишниот Французин ја одбил првата понуда на Баварците и брза да одлучи за својата иднина. Весникот открива дека Баерн му понудил 12 милиони евра годишна плата, но Коман се надева дека може да добие повеќе.
Неговиот договор истекува во 2023 година, па поради тоа двете страни не брзаат околку продолжување на соработката.

Марек Хамшик се врати во Европа. Легендарниот словачки фудбалер и официјално стана нов член на шведскиот клуб Гетеборг.
На официјалниот сајт на клубот е потврдено дека Хамшик потпишал договор на шест месеци до 30. август 2021. година.
Марек Хамшик е легенда на Наполи, за кој настапуваше од 2007. до 2019. година, кога одлучи да се пресели во Кина и да го облече дресот на Далиан.
Во Наполи испиша историја со 121 погодок и 100 асистенции на 520 натпревари.
„Пресреќен сум што сум овде, дојдов и пријатно сум изненаден со условите за работа. Едвај чекам да им се придружам на новите соиграчи и да ги запознаам. Имам краток договор, но ќе дадам се од себе да и помогнам на екипата да ги оствари своите цели.“ – вели Хамшик.

View this post on Instagram

A post shared by IFK Göteborg (@ifkgoteborg)

Македонската футсал репрезентација денес од 19:00 часот во СЦ „Јане Сандански“ го игра можеби најважниот натпревар од квалификациите за Европското првенство. По одличното реми на првиот натпревар против Србија, нашата селекција ќе се обиде по вторпат да го изненади силниот противник и да го направи клучниот чекор кон пласман на континенталниот шампионат.
Селекторот Васко Скендеровски вели дека доколку одиграме со истата борбеност и тактички бидеме на високо ниво, можеме да се надеваме на позитивен резултат.
„После одличниот резултат остварен во Врање, не очекува можеби најважниот меч во нашата футсал историја. Со победа речиси ќе бидеме пласирани на Европското првенство во Холандија. Но, како што реков и пред натпреварот во Србија и на овој меч мора да влеземе со ладна глава и со добра, пред сѐ тактичка поставеност на играта да го надмудриме поквалитетниот и посилен противник од нас.
Добро е што во составот се враќа нашиот капитен Ранготов и ќе имаме поголем избор, но истовремено морам да напоменам дека голем хендикеп е неиграњето на Даниел Де Соуса, играч со големо искуство во вакви натпревари. Се надевам дека со голема борбеност и пожртвуваност ќе успееме по втор пат да го изненадиме најголемиот фаворит во нашата група и ќе ги израдуваме сите љубители на футсалот во Македонија“, изјави селекторот на македонската футсал репрезентација, Васко Скендеровски.
Македонија неколку пати беше блиску, но никогаш не се квалификувала за големо футсал натпреварување.

Тренерот на Барса, Роналд Куман не се откажува од можниот пласман во четвртфиналето на Лигата на шампионите. Овие две екипи знаат да предизвикаат драма во елитното натпреварување, а предводникот на Каталонците смета дека неговиот тим има потенцијал да го неутрализира поразот на „Камп Ноу“. „Најважно е да се рехабилитираме по тешкиот натпревар. Не сакам да размислувам дека не е изводливо да направиме пресврт во Париз. Одиме таму и ќе се бориме до последната минута за да се пласираме во следната рунда“, изјавил Куман. Реваншот е закажан за 10 март, а ПСЖ на првата средба победи со 1- 4.

Катарскиот тум Ал-Сад, чиј тренер е легенда на Барселона и шпанскиот фудбал, Чави Ернандез, стана шампион на Катар. Ал Сад го победи Ум-Салал со 3:0 како гостин во натпревар од 18-тото коло на шампионатот на Катар. Така, Ал-Сад е недостижен на врвот на табелата со 16 победи и 2 нерешени натпревари, а оваа екипа има импресивна гол разлика 69- 12. Ова е шести трофеј за Чави во неговата тренерска кариера. Поранешниот играч за врска на Барселона го презеде Ал-Сад во мај 2019 година.

Фудбалерот на Арсенал, Александер Лаказет е понуден на Јувентус кој на лето планира да доведе напаѓач, пренесува Калчомеркато. Договорот на францускиот фудбалер истекува во 2022. година и мали се шансите и во наредната сезона да настапува на „Емирати“. Минатото лето беше на чекор од трансфер во Атлетико Мадрид, но сепак остана во северен Лондон, но овој пат тоа ќе биде тешко замисливо. Како што се пренесува, поранешниот напаѓач на Олимпик Лион е во потрага по нов предизвик, на крајот од месец мај полни 30 години и смета дека е вистинско време за промена. Се додава дека, судејќи по профилот на играчот, трите најдобри клубови за продолжување на кариерата се – Атлетико, Барселона и Јувентус. Лаказет е член на Арсенал од 2017. година и за тоа време постигна 59 погодоци во сите натпреварувања во 157 натпревари.