Дефанзивецот, Серхио Рамос, може да остане во редовите на фудбалскиос тим Реал Мадрид уште две сезони. Според наведеното, капитенот на „белите“ кој ги одбиваше сите понуди за нов договор и сакаше да си замине, сега се предомислил и најверојатно ќе ја продолжи соработката со клубот. Доколку тоа се случи, искусниот ветеран ќе заработи околу 20 милиони евра за наредните две сезони.

Претседателот на Баерн, Херберт Хаинер тврди дека неговиот клуб може да го доведе Ерлинг Халанд. Напаѓачот на Борусија Дортмунд е еден од најбараните играчи на светот и се поврзува со заминување во некој од најголемите клубови. Тој постигна 27 погодоци и подели седум асистенции во 27 настапи за Дортмунд во сите натпреварувања оваа сезона. Халанд е на мета на Реал Мадрид, Манчестер Сити, Челзи, Манчестер Јунајтед и Барселона, а неговата откупна клаузула наводно изнесува 75 милиони евра. „Ние сме економски силен и здрав клуб. Иако и ние патиме поради пандемијата, секогаш можеме да доведеме играчи кога сме уверени во нивните квалитети.“ – вели Хаинер. Хаинер потврди дека клубот преговара за нови договори со Горецка и Суле, а нивните сегашни договори истекуваат во 2022. година. Баерн веќе го договори доаѓањето на Дајот Упамекано од Лајпциг, па тој од наредната сезона ќе го носи дресот на германскиот шампион.

Оле Гунар Солскјер ќе добие нов договор во јуни, откако управата на клубот била задоволна од прогресот кој го направил во минатата и во тековната сезона. Манчестер Јунајтед е во минус од 60 милиони евра и за ова подигнал нов кредит од банките во Англија, но првиот оперативец на „Ѓаволите“ верува дека Солскјер е идеалното решение и покрај лошите резултати во последно време. „Напредокот е очигледен, Оле и неговите фудбалери оваа сезона заедно со нашата академија и женскиот тим напредуваат. Затоа веруваме во него и со оптимизам гледаме кон иднината.“ – изјави Ед Вудворд. Солскјер во летниот преоден рок ссе очекува да добие 300 милиони евра за нови засилувања, први на листата се дефанзивецот Кунде, крилниот напаѓач Санчо, центарфорот Халанд како и Хари Кејн од Тотенхем.

Интер се надева дека ќе успее да го договори голманот на Јувентус, Матија Перин како ново засилување на лето. „Нероазурите“ бараат играч кој ќе биде алтернатива на капитенот Самир Хандановиќ. Јувентус е подготвен да го продаде голманот, а Интер се надева дека ќе биде постигнат договор за размена, во кој ќе може да го вклучи играчот за врска Матијас Весино. Перин моментално игра на позајмица во екипата на Џенова.

Долго се шпекулираше за евентуалното враќање на Златан Ибрахимовиќ во шведската репрезентација, а сега дојде време тоа и официјално да се објави, наведува шведскиот медиум ФотболДирект. Шведскиот медиум објави дека има потврда од повеќе извори дека Ибрахимовиќ ќе се најде на следниот список на селекторот Јане Андерсон за квалификациите за Светското првенство во Катар. Така, Златан ќе има право на настап на натпреварите против Грузија, Косово и Естонија во првиот репрезентативен циклус кој на распоредот е на крајот на овој месец. За потсетување, Ибрахимовиќ за репрезентацијата не настапува уште од Европското првенство 2016 година, а во своите 116 настапи за репрезентацијата има 62 погодоци, најмногу во историјата на Шведска.

Барселона од наредната сезона би можела да игра во дресови какви што немала баш никогаш во својата историја, а клубот е основан во далечната 1899. година. Судејќи според она што го објави специјализираниот Footy Headlines, медиум кој секогаш прв ги објавува фотографиите од новите дресови на фудбалските клубови кога ќе протечат надвор од кругот на луѓето кои работат на нив, Најк се одлучи на големи промени. Изгледот на дресот повторно е во боите на Каталонија, но има и низа нови детали на себе. Како тој би требало да изгледа, погледнете на фотографиите.

Македонскиот бисер, нашиот репрезентативец Елиф Елмас на крајот од оваа сезона би можел да ја заврши авантурата во Наполи и да се пресели во Португалија и тоа во дресот на Бенфика, пишуваат италијанските медиуми. Според информациите, португалскиот великан нуди 20 милиони евра за услугите на Елмас, а новинарот Емануеле Камарато за „Наполи Магазин“ вели дека останува да видиме дали клубот ќе ја прифати понудата. Еминентниот Трансфермаркт моментално го вреднува Елмас на 18 милиони евра, а со Наполи има важечки договор до 30. јуни 2025. година. Елмас ја игра втората сезона во Наполи, во тековниот шампионат од Серија А има 21 настап и два погодоци. Наполи најавува сериозни промени, не се задоволни од Елмас како се интегрираше во тимот, а не се задоволни и од неговиот учинок и затоа можна е разделба.

Во секој клуб ветувањата за трансфери се составен дел од претседателската кампања. На крајот од неделата Барселона би требало да добие нов претседател, а еден од кандидатите е Хуан Лапорта. Во случај да победи Лапорта веќе даде големо ветување, на Камп Ноу ќе го донесе Серхио Агуеро. После заминувањето на Суарез и извесното заминување на Лео Меси, на Барселона и е потребен врвен стрелец, а Лапорта сите карти ги фрли на Агуеро.

Меѓународниот борд на фудбалски асоцијации задолжен за промена на фудбалските правила одлучи дека случајното играње со рака на играч во акција со прилика за постигнување погодок веќе нема да биде казниво. По оваа одлука, гол нема да биде поништен кога играч, според проценка на судијата, случајно игра со рака во акција и прилика за постигнување на погодок или ако со рака постигне погодок. Промената на правилото стапува на сила од 1. јули, но наведено е дека натпреварувањата имаат можност да го променат и порано. Уредбата е прменета по се поголемото незадоволство на играчите, тренерите и навивачите по престрогото поништување на голови, откако правилото беше воведено пред две години. „По анализите, постоеше чувство дека можеби е претерано. Тоа беше перцепцијата на јавноста и перцепцијата која и ние ја имавме. Затоа ја променивме оваа уредба.“ – вели Џани Инфантино.

Фудбалерите на Борусија Дортмунд отпатуваа ослабени во Минхен на дербито Класикер против Баерн, кое се игра денеска во 18.30 на Алијанц Арената. Тренерот на „милионерите“ Един Терзиќ истакна дека до пред почетокот на натпреварот нема да се знае дали ќе може да смета на Џејдон Санчо и Рафаел Гереиро. Надежта траеше се до денес, кога англиско-португалскиот двоец дефинитивно отпадна, а на нив му се придружи и Џовани Рејна, кој исто така остана во Дортмунд. Нема сомнеж дека Баерн е голем фаворит во саботното дерби, а веќе сега е голема бодовната разлика помеѓу двата тима. Додаваме на тоа и дека „милионерите“ последен пат во Минхен славеа во април 2017. година, така што патуваат на денешното дерби со прилично мали шанси за успех.