Првиот човек на францускиот шампион ПСЖ, Насер Ал-Келаифи, кој немаше намера да се приклучи на Суперлигата, е новиот претседател на Европската асоцијација на клубови (ЕЦА). Катарскиот магнат го замени на позицијата досегашниот претседател и прв човек на Јувентус, Андреа Ањели, кој беше еден од иницијаторите на неуспешниот проект. „На фудбалот му требаат вистински луѓе на лидерските позиции, а Насер е личност која во минатото докажа дека е во состојба да ги штити не само своите, туку и интересите на другите клубови, што е предуслов за позицијата претседател на Здружението на Европски клубови“, рече првиот човек на Европската фудбалска асоцијација (УЕФА), Александар Чеферин.

Шведскиот фудбалски интернационалец во редовите на Милан, Златан Ибрахимовиќ, го продолжи договорот до летото во 2022 година или практично до крајот на неговата кариера, објавија медиумите во Италија. Миланезите му понудија нова соработка на популарниот Ибра со што на некој начин му ја исполнија желбата. „Росонерите“ со интересен пост на Твитер „навестија“ дека договорот е потпишан и дека Ибрахимовиќ ќе остане на „Сан Сиро“ и за наредната сезона.

Играчот за врска на Реал Мадрид, Федерико Валверде, бил позитивен на тестот за коронавирус, објави денеска клубот. Реал Мадрид додаде дека Федерико Валверде бил изолиран штом излегоа резултатите. Тестот беше направен пред мечот со Хетафе. Во оваа ситуација, 22-годишниот Уругваец го пропушти натпреварот со Кадиз, а ќе го нема и на престојното гостување кај Бетис. Во оваа ситуација, тренерот Зинедин Зидан остана без седум играчи поради повреди, казни или ковид-19. Капетанот Серхио Рамос исто така има коронавирус. Неговиот колега во средината на одбраната, Рафаел Варан, само што се опорави и треба да излезе од карантин.

Шпанските медиуми објавија дека Лионел Меси донел одлука за својата иднина. Меси минатото лето беше разочаран од резултатите на каталонскиот клуб, но и потезите кои ги направи тогашниот претседател Хозе Марија Бартомеу и поднесе барање да го раскине договорот. Аргентинецот бараше од Барселона спогодбено да го раскине договорот и да си замине без оштетан. Сепак, Барса тоа не го дозволи. Меси остана, а договорот му завршува ова лето кога ќе може да си замине како слободен играч. Меѓутоа ситуацијата се промени кога Бартомеу одлучи да си поднесе оставка после силните критики. На претседателските избори одржани минатиот месе победи Лапорта кој така после девет години се врати во клубот и им вети на навивачите дека ќе даде се од себе да го убеди Меси да остане.

Менаџерот на Лестер Сити, Брендон Роџерс ги демантираше гласините дека може да го наследи Жозе Мурињо во Тотенхем. Роџерс рече дека е задоволен од неговиот сегашен клуб и има уште многу да се работи на овој проект. „Тоа е фудбал, секогаш има гласини за секое слободно место што се појавува. Тотенхем е фантастичен, огромен клуб, но мојот фокус е насочен кон Лестер. Имаме многу работа да направиме на нашиот проект. Сè додека имам енергија и сум среќен ќе останам овде. Вие не можете да ги контролирате гласините, но јас не размислувам за тоа”, изјави Брендон Роџерс.

Јулијан Дрекслер би можел да се врати во Германија и да го облече дресот на Баерн Минхен, пренесува „Калчомеркато“. Договорот на 27-годишниот Германец со ПСЖ истекува на крајот на сезоната, а „светците“ не планираат да му понудат продолжување на соработката. Дрекслер е слободен да преговара со заинтересираните клубови, а неговите агенти веќе оствариле контакт со Баерн Минхен. Бавраците се спремни да го донесат Дрекслер како слободен агент, па се очекува двете страни брзо да најдат заеднички јазик околу финансиските аспекти. Дрекслер оваа сезона одигра 27 меча за ПСЖ на кои постигна 4 гола и запиша 4 асистенции.

Напаѓачот на Тотенхем, Хари Кејн на крајот на сезоната ќе побара да си замине од клубот бидејќи не е задоволен од постигнатите резултати, најавија денеска англиските медиуми. Договорот на Кејн со „спарси“ е валиден до 2024 година што значи дека Англичаните сигурно нема лесно да се откажат од неговите услуги. Одредени информации наведуваат дека Манчестер Јунајтед е меѓу главните кандидати да ја искористи целата ситуација иако тука се споменува и Манчестер Сити како и неколку тимови од Шпанија и Италија.

Чедомир Јаневски се избори за финале со Олимпијакос во Купот на Кипар. Колку е голем овој успех на Јаневски најдобро зборува податокот дека клубот на едно финале во купот чекаше цели 30 години. Олимпијакос славеше против АЕЛ Лимасол на гости со 1-0, претходно имаа победа од 4-2 во првиот натпревар и така со вкупни 5- 2 дојдоа до шанса да се борат за пехарот. Јаневски работи одлично и Олимпијакос е во една победничка серија. Овој клуб купот го освои само еднаш и тоа во 1977 година, има и уште три порази во финалињата.

Италијанските медиуми пренесуваат дека примарна трансфер цел на Интер во летниот преоден рок ќе биде Леандро Паредес од ПСЖ. Приоритет за Конте ќе биде доведување на играч за врска, кој ќе биде алтернатива за Брозовиќ, а Паредес е прв на листата желби. Паредес е голема желба на Антонио Конте кој смета дека идеално ќе се вклопи во неговиот стил на игра, притоа има големо искуство во Серија А. Италијанските медиуми не исклучуваат како дел од трансферот да биде вклучен Кристиан Ериксен, кој е голема желба на тренерот на ПСЖ, Покетино. Паредес е отворен за преселба во Милано, па се очекува наскоро да започнат преговорите за трампа.

Фудбалската Федерација на Македонија објави дека ќе ги покрие трошоците за сите ПЦР тестови за ковид-19 откако Владата донесе одлука истите да се прават задолжително пред секој натпревар. Тоа значи дека ФФМ одлучи за сите мечеви од првата и втората лига кои ќе бидат одиграни во текот на викендот да ги плати трошоците за тестирање. Секој клуб мора да пријави по 25 лица за секој натпревар, покрај играчите и тренерите тука се вбројуваат и службените лица од клубот. Тестирањето ќе биде направено утре и в петок. Воедно, ФФМ ќе ги покрие трошоците и за тестовите на судиите, делегатите и контролорите.