Од Манчестер Јунајтед пристигна потврда дека Мајкл Карик ќе ја води екипата на средбата против Арсенал која е закажана за во четврток.

Иако во понеделникот за нов привремен тренер на „црвените ѓаволи“беше поставен Ралф Рангник, тој сепак нема да биде во можност веднаш да седне на клупата на тимот од Олд Трафорд поради процедурата за добивање на работна дозвола во Англија.

Германскиот тренер се очекува да ги добие потребните документи пред почетокот на викендот со што конечно ќе може и официјално да ја предводи екипата на Манчестер Јунајтед на дуелот со Кристал Палас во неделa.

Новиот тренер на Астон Вила, Стивен Џерард планира во јануарскиот преоден рок да ја засили одбраната на тимот со доведување на дефанзивец од Ливерпул.

Според англискиот весник Мирор, популарниот Стиви Џи бил сериозно заинтересиран за Џо Гомез кој настапува за тимот од Енфилд.

24-годишниот англиски репрезентативец ретко добива шанса за настап од тренерот Клоп, после неговото враќање од тешката повреда поради која пропушти голем дел од минатата сезона.

Најверојатно Ливерпул и Јирген Клоп ќе се согласат со испраќање на Гомез во Астон Вила но само како позајмен играч до крајот на оваа сезона.

И покрај годините, Лука Модриќ игра одлична сезона за Реал Мадрид. Тој лани го продолжи договорот за една година, па во јуни е слободен играч. Реал Мадрид има политика да им дава краткорочни договори на фудбалерите кои имаат повеќе од 30 години.

Модриќ оваа сезона игра одлично, постојано е стартер кај Карло Анчелоти, но преговите со Реал Мадрид за нов договор немаат прогрес.

Според информациите на „Супер Депорте“, раководството на Реал Мадрид стравува дека може да се повтори ситуацијата на Серхио Рамос, и Модриќ како него да си замине како слободен фудбалер на лето.

Се шпекулира дека Манчестер Сити сака да го ангажира Модриќ, Пеп Гвардиола сака да додаде искуство во средниот ред на тимот.

Модриќ сака да игра на Светското првенство со Хрватска, па неговата цел е и следната сезона да ја помине во клуб кој ќе игра на највисоко ниво.

Од Италија стигнуваат информации дека екипата на Јувентус може да заврши во втората италијанска лига и да остане без последното освоено скудето поради сомневањата за нелегални трансфери и прикривање на остварените добивки.

Финансиската полиција на Италија по барање на обвинителството пред неколку дена изврши упад во канцелариите на клубот од Торино и започна со проверување на книговодствената документација.

Марко Донецели кој е претставник на Асоцијата за заштита на потрошувачите во Италија, излезе со свое мислење за целиот случај.

„Ако со истрагата се открие дека Јувентус имал нелегални активности со кои стекнал предност пред останатите клубови во однос на реализација на трансфери со играчи, тогаш е загрозена регуларноста на првенството и одговорните лица во клубот ќе мора да сносат одговорност.

Освен раководните лица, постои можност за казнување на целиот клуб со испраќање во понизок ранг на такмичење и одземање на последната освоена титула во италијанското првенство“, изјави Донецели.

Манчестер Јунајтед започна преговори со агентот на Бруно Фернандеш за продолжување на договорот, пренесуваат медиумите на Островот.

27- годишниот играч за врска би требало да инкасира околу 220.000 евра неделно. Во овој момент неговите примања се 110.000 евра, па е еден од најмалку платените фудбалери на „Олд Трафорд“.

Фернандеш дојде во Манчестер Јунајтед од Спортинг Лисабон пред точно две години за 55 милиони евра, и се етаблираше во клучен фудбалер на „црвените ѓаволи“.

Раководството на Париз Сен Жермен поставило два услови со кои ќе му дозволеа на Почетино да го напушти тренерското место во екипата и да премине во Манчестер Јунајтед пред истекот на неговиот актуелен договор.

Првиот услов на тимот од Париз бил Јунајтед да плати отштета во висина од 15 до 20 милиони евра, а вториот услов се однесувал на добивање повеќе време за клубот да пронајде замена за Аргентинецот. Како негов наследник се споменуваше легендарниот Зинедин Зидан.

По се изгледа дека овие услови не биле прифатливи за тимот од Олд Трафорд, па тие го назначија Германецот Ралф Рангник како привремен тренер до крајот на сезоната. Нивниот обид за ангажирање на Маурицио Почетино ќе продолжи во текот на летото кога се очекува да достават официјална понуда до ПСЖ.

Нејмар ќе паузира меѓу шест и осум недели поради повредата на зглобот што ја заработи на вчерашниот натпревар со Сент Етијен.

Оваа информација беше официјално потврдена од клубот по прегледите на кои денеска беше подложен напаѓачот. Нејмар има истегнување на зглобот, како и оштетување на лигаментите. Од клубот појаснуваат дека по 72 часа фудбалерот повторно ќе биде на преглед.

Нејмар оваа година досега има одиграно натпревари. Сигурно нема да игра повторно до крајот на 2021 година. На Бразилецот му се изврте скочниот зглоб на крајот од мечот откако влезе Макон, по што ѕвездата на ПСЖ беше изваден на носилки со солзи во очите. Добрата вест е што Марко Верати ги обновува тренинзите откако го пропушти натпреварот против Манчестер Сити оваа недела.

Лоренцо Пелегрини се здоби со тешка повреда за време на мечот со Торино.

Денес на Пелегрини му беа направени детални лекарски прегледи и од клубот потврдија дека најмалку шест недели ќе биде надвор од терените. 25-годишниот играч за врска е еден од најважните фудбалери на Рома, па ова сигурно е голем удар за Мурињо.

Пелегрини оваа сезона настапи на 13 меча на кои постигна 5 гола и запиша 2 асистенции.

Според англиските медиуми, Манчестер Сити и Манчестер Јунајтед ќе влезат во сериозна битка за доведување на играчот на Лидс Јунајтед, Калвин Филипс. 

Одличните настапи во дресот на Лидс и во репрезентацијата на Англија, предизвикаа големо внимание кон 25-годишниот Филипс, па голема е веројатноста тој уште во јануари да се пресели во поголем клуб од Премиер лигата.

Според информациите постои  можност и екипата на Тотенхем да испрати своја понуда за играчот од средината на теренот. Тренерот Антонио Конте не ги крие своите симпатии кон фудбалерот и ќе се обиде да го вклучи во ростерот на својата екипа.

Пеп Гвардиола призна дека сака да се испроба во работа со национален тим.

„Кога ќе завршам во Манчестер, ќе ми биде интересно да работам на СП или ЕП. Но, обично тоа не е лесно – има многу малку слободни работни места во такви случаи. Меѓутоа, доколку тоа не се случи, ќе продолжам да го тренирам клубот. Ако зборуваме за работа во Англија, тогаш мислам дека можам да работам само во Манчестер Сити. Знаете, пред многу години никогаш не би помислил дека ќе станам менаџер на Манчестер Сити и ќе бидам во тимот шест сезони. Да видиме што ќе се случи понатаму“, изјави Гвардиола.

За потсетување, 50-годишниот тренер работи во Манчестер Сити од 2016 година. Под негово водство, тимот стана шампион на Англија три пати и играше во финалето на Лигата на шампионите.