Македонскиот прволигаш Ренова, донесе одлука да се повлече од играњето во Првата македонска лига наредната сезона.

Раководството на Ренова својата одлука за напуштање на лигата ќе ја достави до ФФМ во наредните денови.

Како причина за напуштањето на лигата, од Ренова ја наведуваат слабата инфраструктура на клубот. За таа цел челниците на клубот одлучиле да започнат со изградба на стадион и тренинг центар во Џепчиште, а дотогаш екипата да настапува во најнизок ранг на натпреварување.

Извршниот директор на Интер, Џузепе Марота, призна дека клубот има намера да ги привлече напаѓачите Ромелу Лукаку и Пауло Дибала. Пред радио „Раи“, 65-годишниот Марота откри што е сработено и што треба да се направи до крајот на летниот преоден рок.

„Се обидуваме да потпишеме со Лукаку и Дибала. Сепак, денеска сигурно нема да објавиме договор за Лукаку. Има големи шанси да го вратиме, но има уште работи кои треба да ги решиме. Ќе видиме што ќе се случи “, рече Марота.

Според италијанскиот печат, Интер е подготвен да плати 10 милиони евра за едногодишна кирија на белгискиот напаѓач на Челси и да му ја покрие целата плата. Пред една година миланскиот гигант го продаде Лукаку на Челси за повеќе од 100 милиони евра. Воедно, Дибала е слободен играч, а претставници на Аргентинецот неколку пати биле забележани како разговараат со раководството на Интер.

Вест Хем го ангажираше дефанзивецот на Рен, Наиф Агер со договор до јуни 2027 година, објави англискиот клуб.

„Чеканите“ ќе платат 30 милиони фунти плус бонуси за правата на 26-годишниот Мароканец.

Агер, кој е висок 188 сантиметри, игра како централен дефанзивец. Кариерата ја започна во тимот на ФУС Рабат во својата татковина, а потоа мина низ француските Дижон и Рен.

За тимот од Бретања, Агер запиша вкупно 80 натпревари во две сезони во сите натпреварувања, во кои постигна седум гола и четири асистенции.

Како што пренесуваат германските медиуми, челниците на Борусија од Дортмунд испратија понуда до Ајакс за напаѓачот Себастијан Алер, вредна 40 милиони евра.

Од Дортмунд потенцираат дека доаѓањето на Алер во тимот ќе биде одлична замена за Норвежанецот Ерлинг Халанд кој направи трансфер во Манчестер Сити.

Репрезентативецот на Брегот на Слоновата коска веќе има искуство со играње во германската Бундеслига, бидејќи во минатото настапуваше за Ајнтрахт од Франкфурт.

Минатата сезона во дресот на Ајакс, Алер одигра 65 натпревари, постигна 47 гола и 16 асистенции.

Давид де Хеа е прилично незадоволен од работата со тренерите на клубот во последните години. 31-годишниот Шпанец е еден од најконстантните играчи на „црвените ѓаволи“ во последните сезони, па дури и ја освои наградата за најдобар играч во клубот минатата сезона.

Во исто време, сепак, тој беше предмет на одредени критики за неговата игра, а особено за неговото учество во поседот на топката, одење по високи топки, како и за неговата игра надвор од шеснаесетникот.

Сепак, Шпанецот смета дека тренерите со кои соработувал во последните години на „Олд Трафорд“ се виновни што не ги развил целосно своите квалитети, пишува Атлетик.

Низ Манчестер Јунајтед поминаа некои многу сериозни специјалисти како тренери на голмани. Сепак, Де Хеа има забелешки во работата со нив. Смета дека тоа е причината поради која го загуби стартното место во шпанската репрезентација, бидејќи Луис Енрике претпочита голмани кои се корисни не само за одбранување на ударите на противникот, туку придонесуваат и за другите аспекти на играта.

Некогашниот македонски фудбалски репрезентативец, Мирко Ивановски денеска и официјално е промовиран во романскиот клуб Петролул. Членот на елитната конкуренција денеска го промовираше нашиот интернационалец, кој минатата сезона беше дел од екипата на Динамо Букурешт.

За Ивановски ова ќе биде трет клуб во Романија откако веќе го носеше дресот и на екипата на Клуж во 2014 година.

Јувентус е заинтересиран и спрема понуда за дефанзивецот на Наполи, Калиду Кулибали пренесува „Газета дело Спорт“. „Старата дама“ бара замена за Џорџо Киелини, кој го напушта клубот ова лето после 17 години, а Кулибали е на врвот на листата желби. Сенегалецот најверојатно ќе го напушти Наполи ова лето. Тој влегува во последната година од договорот, а претседателот на Наполи не ја исклучи можноста за негова продажба.

30-годишниот Кулибали сака да го напушти Наполи и верува дека сега е вистинското време да направи чекор напред во кариерата, а покрај Јувентус интерес за него покажува и Барселона.

Јувентус во наредните денови ќе испрати официјална понуда, но Наполи преферира да го продаде надвор од Италија.

Фудбалскиот клуб Реал Мадрид го промовира Антонио Рудигер како свое најново засилување.

Веќе подолг период беше познато дека репрезентативецот на Германија постигна договор со кралскиот клуб за негов трансфер во Мадрид, но неговата официјална промоција се случи откако тој успешно ги заврши лекарските прегледи и останатите формалности.

Дефанзивецот Рудигер во Реал Мадрид пристигна како слободен играч без обештетување откако заврши неговиот договор со Челзи. Фудбалерот потпиша договор на четири години, и во Реал ќе го носи дресот со број 22.

Тренерот на фудбалерите на Ливерпул, Јирген Клоп, сака да го ангажира играчот на Реал Мадрид, Марко Асенсио, како замена за Садио Mане кој деновиве се пресели во екипата на Баерн Минхен.

Младиот фудбалер на „кралевите“ неодамна истакна, дека не е задоволен од минутажата и финансиските услови и затоа сака да го напушти стадинот – „Сантијаго Бернабе“.

Таа ситуација ќе се обидат да ја искористат „црвените“ и да го убедат да се пресели на – „Енфилд“.

Фудбалерите на Џирона од наредната сезона ќе настапуваат во Ла Лига, откако во реванш дуелот од финалниот бараж во плеј-офот беа подобри од Тенерифе со резултат 3:1. Првиот натпревар меѓу двата противници заврши без голови.

Екипата на Џирона повторно ќе заигра во најсилната шпанска лига после сезоната 2018/2019 година. Претходно директен пласман во елитата обезбедија Алмерија и Ваљадолид.