Мемфис Депај конечно може да се каже дека „созреа“ како фудбалер. Оној период во Манчестер Јунајтед кога направи трансфер од холандски ПСВ е веќе заборавен, од 2017. година е во Лион каде се пронајде себеси.
Депај е посебно добар на теренот оваа сезона, има импресивна форма во 2021. година бидејќи беше вклучен во 11 погодоци на Лион, постигна шест и додаде пет асистенции, повеќе од било кој друг играч во Лига 1.
Има одлична форма, а со тоа и интересот за неговиот потпис расте. Барселона покажуваше знаци, а останува да видиме кој друг европски клуб ќе се вклучи во трката, бидејќи неговиот договор со Лион завршува на крајот од оваа сезона.

Спортскиот директор на Баер Леверкузен ја одреди цената за дефанзивецот за кој пројавува интерес и англиски Ливерпул.
Едмонд Тапсоба е фудбалерот кој оваа сезона ги привлекува скоро сите великани, помеѓу останатите и Ливерпул предводен од Јирген Клоп.
Тапсоба игра одлично во дресот на „аптекарите“ оваа сезона, па нормално е дека неговата цена достигна одредена висина, која изнесува 70 милиони фунти.
Токму таа е цената која Челзи ја плати минатата година за Хаверц, па Леверкузен уште еднаш сака да ја инкасира истата сума.
Тапсоба е репрезентативец на Буркина Фасо, а има само 22 години.

Тотенхем во Лондон на првиот натпревар од осминафиналето од Лига Европа го совлада Динамо Загреб со 2:0 со головите на Хари Кејн, но во 90. минута, кога средбата веќе беше решена, македонскиот репрезентативец Аријан Адеми со болна гримаса на лицето и помош на лекарите го напушти теренот, откако доби удар во еден дуел.
Капитенот на Динамо тешко се движеше и не можеше сам да се движи, па се стравуваше дека е потешко повреден. Тоа за Динамо би бил голем удар до крајот на сезоната, бидејќи Адеми е еден од клучните, ако не и клучниот играч за клубот.
Тренерот на Динамо по натпреварот изјави дека не ја знае тежината на повредата, но веќе се дозна дека се е во ред со Адеми.
Тој доби само малку посилен удар, но нема никакви последици и нормално ќе продолжи да настапува.
Тоа се одлични вести и за македонската репрезентација.

Како што веќе пишувавме, по испаѓањето од Лигата на шампионите, Јувентус тргнува во реконструкција на екипата, а се уште не се знае каква е иднината на Кристијано Роналдо во Торино.
Италијанските медиуми се впуштија во калкулации, а некои медиуми пресметаа колку Јувентус би требал да заработи од продажбата на Португалецот како не би бил во голема загуба.
Предвид се земаат парите кои Јувентус ги добива од продажбата на дресовите и од спонзорите кои вложуваат исклучиво поради неговото присуство во екипата. Иако би можело да се претпостави дека цифрата е поголема, таа изнесува само 29 милиони евра!
Тоа не би требало да биде препрека за ниту еден сериозен клуб кој би сакал да го доведе, но во случај на трансфер, неговиот нов клуб би морал да ја преземе и неговата годишна плата од 31 милион.
Договорот на Роналдо со Јувентус истекува во 2022. година, а од клубот тврдат дека засега немаат намера да преговараат за продолжување. Кога ќе му истече договорот, Роналдо веќе ќе има 37 години.

Барселона ќе се обиде да го продаде Антоан Гризман во летниот преоден рок. Французинот пристигна како големо засилување, но не ги оптравда очекувањата на „Камп Ноу“. Тој е еден од најплатените фудбалери во тимот, па Барселона сака да се ослободи од неговата видока плата и е спремна да слушне понуди за Гризман. Иднината на Гризман ќе биде една од првите одлуки кои треба да ги донесе новиот генерален директор на Барса, Матеу Алеани. Каталонците се заинтересирани за Ерлинг Халанд и сакаат со продажба на Гризман да го финансираат трансферот на Норвежанецот.

Еден од сопствениците на Манчестер Јунајтед, Аврам Глејзер, најави дека ќе ги продаде своите акции во клубот. Цената на истите во моментов се проценува на околу 100 милиони долари. Ова ќе значи дека семејството Глејзер по заминувањето на Аврам ќе остане со околу 3% помалку акции во Манчестер Јунајтед. Во моментов, Американците поседуваат 78% од имотот, а по раздвојувањето со споменатиот акционер, процентот ќе се намали на 74,9%. Одлуката е донесена само една недела откако клубот ги објави своите најнови финансиски резултати, според кои вкупните долгови на Манчестер Јунајтед се зголемија на 455,5 милиони фунти или за 64,5 милиони повеќе од минатата година.

Аргентинските медиуми јавуваат дека Серхио Агуеро добил понуда од Барселона да и се приклучи пред почетокот на идната сезона. Аргентинскиот напаѓач, кој е најдобар стрелец во историјата на Манчестер Сити, има важечки договор со англискиот клуб до крајот на сезонава, а неговиот евентуален трансфер во Барселона многумина го гледаат како обид на клубот да се задржи Лионел Меси. Агуеро оваа сезона не се наигра, делумно поради повреди и поради тоа што Манчестер Сити и без него има сјајни резултати. Разделбата е на повидок, а и самиот Агуеро неодамна потврди дека би сакал да заигра со Меси. Шпанските медиуми ја продолжуваат оваа приказна и тврдат дека тоа е можно, но само доколку Агуеро се согласи на драстично намалување на платата. Барселона е во финансиски проблеми, се најавуваат нови намалувања на платите и нов голем терет врз буџетот не доаѓа предвид. Агуеро има плата од 15 милиони евра по сезона, а доколку сака да заигра во Барселона, ќе мора да се согласи на намалување на платата од 50 отсто.

Фудбалерот на Интер, Милан Шкринијар изјави дека неговата екипа веќе не е „лудиот Интер“. Интер е во серија од седум победи по ред во италијанското првенство, односно 10 натпревари без пораз и е прв на табелата со шест бодови повеќе од второпласираниот Милан. „Ова веќе не е лудиот Интер. Ова е Интер на Конте. Оваа година Серија А е поизрамнета во однос на минатата сезона. Среќни сме што сме први, но мораме тука да останеме до крајот.“ – изјави Шкринијар. Шкринијар го постигна победоносниот погодок во натпреварот против Аталанта, а Интер сезонава е доста критикуван поради дефанзивната игра. „Не им се допаѓа на сите нашиот стил на игра, но во овој момент најважно е да се победува. Мораме да освојуваме бодови дури и ако играме лошо.“ – наведува словачкиот фудбалер. Тој рече и дека на своето тело ќе го истетовира шампионскиот трофеј доколку Интер го освои. „Мораме да се концентрираме како би правеле што помалку грешки. Ако го освоиме Скудетото, ќе го истетовирам на мојата кожа. Тоа ќе биде момент за паметење.“ – заклучи Шкринијар.

Актуелниот италијански шампион Јувентус пред три години го доведе Кристијано Роналдо во обид да ја освои Лигата на шампионите, а со славниот Португалец во три сезони не стигна ниту до полуфинале. Роналдо во три години за Јувентус постигна 14 погодоци во ЛШ, еден помалку од учинокот во последната година во Реал. Освен тоа, Јувентус до неговото доаѓање во последните десет години два пати играше финале, а со најскапиот играч во клупската историја не отиде подалеку од четвртфинале. Се уште не се знае каква е иднината на 36-годишниот Роналдо во Јувентус, а италијанскиот новинар Фабрицио Романо јавува дека клубот наскоро ќе решава за тоа. Договорот на Роналдо со Јувентус трае до крајот на идната сезона. Романо наведува и дека Јувентус ќе прави „ремонт“ на екипата, а Вестон Меккени, Федерико Киеза, Матијс Де Лихт и Војчех Шчешни ќе бидат играчите околу кои ќе се гради новиот Јувентус. Извесно е дека клубот ќе го напушти Арон Ремзи, кој не се покажа како засилување, а тренерот Андреа Пирло веќе најави дека останува на клупата и нема намера да си замине по неуспехот во Лигата на шампионите.