Милан по реванш натпреварот со Црвена Ѕвезда се враќа на домашните обврски, а тимот на Пиоли има тешко гостување во Рим кај Рома.
Евентуален пораз би бил трет во низа, што би овозможило Интер уште повеќе да се одлепи на врвот, а и самата Рома ќе се приближи до позицијата број два. Се очекува од почетокот да го видиме Ибрахимовиќ, но излегоа и вести за планот на Малдини за иднина.
Големо прашање е дали Ибрахимовиќ ќе остане во Милан и наредната сезона, негоата замена во видот на Манџукиќ исто така има добар број на години, па спортскиот директор брка нова „деветка“.
Италијанските медиуми пренесуваат дека Чиро Имобиле е мета број еден за подобрување на нападот. Капитенот на Лацио е фантастичен во Рим уште од своето доаѓање во 2016. година, ретко кога не е во трката за најдобар стрелец. Има 31 година, оваа сезона има 14 погодоци на 21 натпревар во Серија А.
Прашање е дали е подготвен за настап во поголем клуб, своевремено во Јувентус не доби прилика, додека не се снајде баш најдобро ниту во Дортмунд и Севиља.

Реал Мадрид ја следи ситуацијата во Париз, веќе подготвува и план „Б“ во Дортмунд, но нема да биде нималку лесно.
Килијан Мбапе и Ерлинг Халанд се одредени како главни мети во новата ера на „галактикос“, а во овој момент ниту еден трансфер не се чини како реален. Мбапе и понатаму се двоуми околу продолжувањето на договорот со Париз Сен Жермен, тековниот му истекува во 2022. година и не е исклучено да го одработи до крај и да си замине како слободен играч.
Халанд од летото 2022. година ќе има откупна клаузула од 75 милиони евра, па во Мадрид веруваат дека со потенцијално засилување на таа понуда ова лето ќе можат да ги искористат одличните односи со Дортмунд и да го „украдат“ норвежанецот.
Шпанските медиуми пишуваат дека во овој момент пореален е трансферот на Халанд, но далеку од тоа дека истиот ќе биде лесно остварен.

Хари Кејн има желба да го напушти Тотенхем, смета дека доволно чекаше, а и дека тимот со овие вложувања не може да се бори за важни трофеи и врвот на табелата. Капитенот на Англија ќе има можност да го освои Лига купот, но на тој пат стои Манчестер Сити. Тотенхем игра и во Лига Европа, но Кејн е заинтересиран за настап во Лигата на шампионите.
Дури и Тотенхем би сакал да го продаде капитенот како би ги покрил загубите, за нив пандемијата дојде во кошмарно време, кога очекуваа заработка од новиот стадион.
И местото на Мурињо не е гарантирано, се зборува за Нагелсман, но засега тоа останува само далечна можност.
Проблемот со Кејн е цената. Тој има договор уште три и пол сезони, а во време на криза никој нема да ја плати сумата која Тотенхем ја бара.
Се работи за 150 милиони фунти за капитенот кој даде 209 голови на 319 натпревари за клубот.

Ливерпул ќе мора да купува ова лето со цел да го прошири тимот и да ги избегне проблемите со кои се соочува оваа сезона. Вистинско чудо е како Клоп успева да „склопи“ екипа, а најнова повреда во низата е онаа на капитенот Џордан Хендерсон. Англичанецот ќе се врати дури во април и ќе пропушти некои важни натпревари, но и репрезентативните обврски.
Германски Билд јавува дека Клоп го има својот „пик“ на играчот за врска на Борусија Менхенгладбах, Флоријан Нојхаус.
23-годишниот фудбалер веќе втора сезона по ред прикажува одлични партии во дресот на клубот од Менхенгладбах, кој по оваа сезона ќе остане без Марко Розе. Нојхаус сезонава одигра 31 натпревар, со учинок од по шест голови и асистенции.
Се работи за квалитетен играч кој има договор до 2024. година, па јасно е дека Клоп ќе мора да го „одврзе“ ќесето за да го доведе на Енфилд.

Етичкиот суд на Меѓународната фудбалска федерација (ФИФА) ја затвори истрагата против германската фудбалска легенда Франц Бекенбауер за наводно подмитување, поради застареност на случајот.
Бекенбауер беше под истрага од 2016 година за наводни финансиски малверзации во 2002 година, заедно со поранешните членови наа Извршниот комитет на ФИФА, Тео Цванцигер и Хорст Шмит, против кои етичката истрага, исто така, е затворена поради застареност.
Случајот беше отворен поради сомнителни финансиски трансакции меѓу организаторите на Светското првенство во 2006 година во Германија, членови на ФИФА и поранешниот претседател на Азиската фудбалска асоцијација, Катарецот Мохамед бин Хамам.
Бекенбауер се товареше дека го поткупил Бин Хамам со десет милиони евра во 2002 година за да лобира Германија да ја добие организацијата на Мундијалот во 2006 година.

Оваа сезона во Премиерлигата екипата на Лидс е омилена помеѓу љубителите на офанзивниот фудбал. Екипата на Биелса не знае за кочница, а затоа и после 25 одиграни кола има гол разлика 43:43 и се наоѓа на 10. место.
Покрај Бамфорд, Рафиња и Далас, во тимот на Лидс се издвојува и Џек Харисон.
24-годишниот фудбалер во својата деби сезона во Премиерлигата има учинок од шест голови и четири асистенции, а англиски „Атлетик“ пишува дека Манчестер Сити е подготвен да го продаде својот позајмен играч за 13 милиони евра.
Харисон од јули 2018. година настапува како позајмен играч во Лидс, а токму тој клуб е прв фаворит да го доведе, што веројатно ќе биде вистински потег за тимот на Биелса.

Хуан Мата после десет години ќе ја напушти Премиер лигата и кариерата најверојатно ќе ја продолжи во Серија А. Договорот на Мата со Манчестер Јунајтед истекува на лето и Шпанецот ќе биде слободен агент. Најсилен интерес за него покажуваат италијанските гигант Интер, Милан и Јувентус, па веќе стапиле во контакт со неговиот менаџер. „Не сум изненаден што тие клубови се заинтересирани за него. Тој е многу квалитетен фудбалер“, потврди Солскјер. Сепак, Манчестер Јунајтед донесе одлука да не му понуди нов договор, па Мата е слободен да преговара со заинтересираните клубови.

Спортскиот директор на Париз Сен Жермен, Леонардо изјави дека е време Килијан Мбапе да донесе одлука за продолжувањето на договорот со клубот. Францускиот клуб сака да ја продолжи соработката со 22-годишниот фудбалер, чиј договор истекува наредното лето, односно на крајот на наредната сезона. Мбапе во последно време се поврзува со неколку клубови, а ПСЖ сака што поскоро да го реши неговиот статус. „Изненаден сум од некои приказни за Мбапе. Тој и понатаму има уште една сезона да одработи со нас. Неговиот статус во клубот е се поважен и тој презема се повеќе одговорност. Некое време зборувавме со него, а сега дојде време за донесување на одлука.“ – вели Леонардо. ПСЖ работи и на продолжување на договорот на Нејмар, кој исто така истекува летото 2022. година, додека веќе ова лето завршуваат договорите на Ди Марија и Бернат. „Зборуваме и со Нејмар. На добар пат сме. Договорот се уште не е потпишан, но сме во добра ситуација. Целта е што поскоро да се финализира.“ – изјави Леонардо.