Пјер Емерик Обамејанг, кој постигна два гола на вчерашниот меч со Бенфика и му помогна на тимот да мине во наредната елиминациска фаза во Лигата на Европа, вели дека победата од 3-2 треба да биде пресвртница во тековната сезона. Напаѓачот кој потекнува од Габон вели дека лондончани треба да влезат во победничка серија која ќе им ги донесе посакуваните резулатати. „Покажавме карактер како екипа. Одигравме тежок меч и покажавме дека од тука можеме да градиме позитивен пристап за во иднина“, изјави напаѓачот на „топчиите“.

Капитенот на Ливерпул, Џордан Хендерсон беше опериран по повредата на препоните во градското дерби против Евертон минатиот викенд. Оваа информација ја потврди и се уште актуелниот шампион на Англија, но во моментот со сигурност не може да се каже кога би можел да се врати на теренот. Она што се знаеше е дека шансите да се врати пред репрезентативната пауза се минимални, а сега веќе нема дилема. Хендерсон нема да биде во тимот за првенствените дуели против Шефилд, Челзи, Фулам и Вулверхемптон, како ни за реванш натпреварот против Лајпциг кој се игра на 10. март. Останува неизвесно дали ќе се врати во април, а оваа вест сигурно нема да го израдува и селекторот на репрезентација на Англија, Герет Саутгејт, кого на крајот на март го очекува стартот на квалификациите за Светското првенство. Хендерсон сезонава воглавно беше стартер во тимот на Јирген Клоп, па нема сомнеж дека неговото отсуство ќе биде дополнителен удар за „црвените“ кои цела сезона се мачат со повреди.

Напаѓачот на Вест Хем, Мајкл Антонио, реши во наредниот период наместо во репрезентацијата на Англија, да игра за Јамајка. Тој ја објасни одлуката со желбата да заигра на Светското првенство во Катар во 2022 година. Во неколку наврати, Антонио доби покана да игра за „Гордиот Албион“, но никогаш не доби шанса во првиот тим. Интересно е што тој ја одби поканата на Јамајка во 2016 година со образложение дека сака да се бори за место во репрезентацијата на Англија. Сега ќе игра во репрезентацијата на Јамајка со поранешните премиерлигаши Мајкл Хектор и Боби Декордов. Најзвучното име на тимот е секако крилото на Баер Леверкузен, Леон Бејли.

Клаудио Маркизио се одлучи да се проба и во друг вид на арена.
Играчот за врска кој порасна во Јувентус и помина 13 години бранејќи ги боите на „старата дама“, сака да се испроба и во политиката. Самиот Маркизио отсекогаш бил јасен и гласен околу своите ставови, протестираше против лошиот третман на имигрантите и се залагаше за спас и сместување на оние кои успеаа во намерата да го поминат Медитеранот.
„Да, сакам политика, зборувам за неа со пријателите на вечера или дома. Морам уште многу да учам, но време е да се пробам и надвор од спортот. Прв ќе станам и ќе речам ДА, доколку сум потребен на Пиемонт и Торино.“ – изјави Маркизио.
„Малиот принц“ не е прв од фудбалерите во Серија А кој ќе заплива во политичките води. Џани Ривера долги години беше дел од Сенатот, Кака Каладзе е градоначалник на Тбилиси, а легендарниот Џорџ Веа стана претседател на Либерија.

Рома на домашен терен ја совлада Брага во реванш натпреварот од 1/16 финалето на Лига Европа со 2:1, и со вкупни 3:1 се пласираше во осминафиналето.
Првиот погодок на реванш дуелот беше дело на Един Џеко, кој со овој погодок испиша историја за Рома. Тоа беше 29. европски погодок за него вво дресот на „волчицата“, со кој го престигна легендарниот капитен на римскиот клуб, Франческо Тоти. Италијанецот досега го држеше рекордот со постигнати 28. погодоци.

Ова лето Един Џеко сигурно ќе ја напушти Рома. „Волчицата“ веќе бара замена за 35-годишниот напаѓач, а прва мета е ѕвездата на Бенфика, Дарвин Нуњес. 21-годишниот уругвајски репрезентативец игра одлично, но во договорот има откупна клаузула од 150 милиони евра, а Бенфика сигурно нема да сака лесно да се откаже од него. Бенфика во септември за потписот на Нуњес плати 24 милиони евра, па Рома сигурно ќе треба да понуди 40 милиони евра за неговиот потпис.

Фудбалерот на Шалке 04, Шкодран Мустафи, верува дека екипата од Гелзенкирхен нема да испадне во Втората Бундес лига иако е на дното на табелата со само девет бодови. „Мислам дека клубот има доволно потенцијал да ја поправи ситуацијата, секако, очајно ни требаат бодови. Се надевам дека ќе останеме во Бундес-лигата”, изјави Мустафи за веб-страницата на клубот. 28-годишниот играч пристигна во Шалке во јануари како позајмен од англискиот Арсенал. Неговиот нов состав од почетокот на сезоната има само една победа и вкупно 9 бодови на 22 меча.

Менаџерот на Манчестер Сити, Пеп Гвардиола се изедначи на Жозе Мурињо на четвртото место на листата на тренери со најмногу победи во историјата на Лигата на шампионите. По успехот на „граѓаните“ со 0-2 како гости против Борусија (Менхенгладбах) во првото осминафинале одиграно синоќа, шпанскиот тренер сега е со 81 победа, израмнувајќи со својот португалски колега. Рекордер е легендарниот Сер Алекс Фергусон со 102 победи, а го следат Карло Анчелоти (89) и Арсен Венгер (86). Секако дека со резултатите кои ги постигнува Гвардиола со неговата екипа може да се очекува дека до крајот на сезоната може да го стигне и Арсен Венгер.