Францускиот Л’Екип го избра тимот на 2020. година, а во идеалните 11 немаше место за Лео Меси.
Аргентинецот за многумина е најдобар играч на сите времиња, но угледниот француски весник смета дека годинава со своите игри не го заслужи своето место во најдобрите 11.
Во формација 4-4-2, во екипата на годината се најдоа: Нојер, Алфонсо Дејвис, Рамос, Ван Дајк, Александер-Арнолд, Тиаго Алкантара, Кимих, Нејмар, Де Брујне, Кристијано Роналдо и Роберт Левандовски.
Актуелниот европски првак, минхенски Баерн имаше пет играчи во најдобриот тим за минатата година.

Барселона официјално потврди дека има двајца позитивни на КОВИД-19, се работи за лица од стручниот штаб, идентитетот не е откриен, а клубот го откажа тренингот и прес -конференцијата пред дуелот со Билбао закажан за утре.
Атлетик Билбао е домаќин на Барса утревечер од 21. часот, но сега е неизвесно дали средбата воопшто ќе се одигра.
Клубот од Каталонија објави официјално соопштение во кое се потврдени двата случаи на позитивни од КОВИД-19 во стручниот тим, информирани се здравствените власти и преземени се сите неопходни чекори за изолација.

Атлетико Мадрид има два бода предност над градскиот ривал Реал, но и два натпревари помалку од тимот кој е единствен досега кој ги победил „јорганџиите“ во Примера.
Диего Коста месецов го напушта Атлетико, а Чоло Симеоне е во потрага по замена за искусниот напаѓач. Прв пик беше Милик, но тешко дека Атлетико ќе пронајде заеднички јазик со Де Лаурентис. Оливие Жиру се чини дека ќе остане во Челзи барем до крајот на сезоната, па Атлетико би можел да се обиде со купување во Шпанија.
Вилијан Жозе е на мета, бразилецот игра одлично во Реал Сосиедад, но бележи променлива минутажа. 29-годишниот напаѓач има четири погодоци на 19 натпревари.
„Деветката“ на Сосиедад има договор со клубот до 2024. година, па останува да видиме колкава ќе биде сумата која Баскијците ќе ја бараат за неговиот потпис.

Италијански Скај Спорт јавува дека Интер размислува за враќање на Едер, 34-годишниот напаѓач.
Едер во Интер помина две и пол години од 2016. до 2018. година, а потоа замина во кинески Џиангсу Сунинг, каде ја освои титулата во домашното првенство. Интер и Џиангсу имаат исти сопственици, па тоа му го олеснува планот на клубот од Милано, бидејќи Едер би дошол бесплатно.
Поранешниот италијански репрезентативец, кого во Европа многумина го заборавија по заминувањето во Кина, е во одлични односи со Антонио Конте, кој во 2016. година како селектор го поведе на Европското првенство.
Минатата сезона, Едер постигна девет голови и запиша шест асистенции, а во две и пол сезони колку што помина во Интер, имаше 14 погодоци во 86 настапи.

Утревечер не очекува дерби на „Сан Сиро“.
Непоразениот Милан на домашен терен ќе го дочека Јувентус. Разликата помеѓу ривалите е десет бодови, со тоа што „росонерите“ имаат натпревар повеќе. Јувентус има само еден пораз, но тимот на Пирло има дури шест нерешени во 14 одиграни натпревари.
„Доколку некој ми кажеше дека Милан ќе биде прв во јануари, немаше да ставам ниту евро на нив. Ако освојат, тоа ќе биде чудо. Фаворит број еден останува Јувентус, но веќе доста заостанува. Ме интересира дали тимот на Милан ќе има потешкотии на овој натпревар. Мислам дека ова ќе биде клучен натпревар и за Милан и за Јувентус. Доколку Јуве е поразен, готово е.“ – изјави Антонио Касано во емисијата на Бобо Виери.
Одговорот ќе го дознаеме утревечер околу 23. часот. Пирло и Јуве не смеат да дозволат зголемување на бодовната разлика во однос на миланските тимови, кои играат одлично сезонава.

ВБА, Њукасл и сега Саутемптон. Скоро 270 минути без даден гол! Натпревари на кои навивачите на Ливерпул би биле незадоволни доколку нивниот тим би освоил седум од потенцијалните девет бодови, а „црвените“ освоија само два! ВБА украде бод на Енфилд, Ливерпул во Њукасл играше доста подобро, но немаше среќа да дојде до заслужената победа. Ако на тој натпревар заслужи победа, тогаш не може да се каже дека поразот од Саутемптон беше незаслужен. Ливерпул играше доста лошо, слично како и против ВБА. Она што секако е главоболка за Клоп е тоа што неговиот тим е веќе 270 минути без постигнат погодок. Откако Садио Мане погоди во 12. минута против ВБА, Ливерпул е без погодок во наредните два натпревари. Статистичарите велат дека тоа е најдолгата низа на Ливерпул без постигнат погодок од доаѓањето на Јирген Клоп. Ливерпул и понатаму е лидер на табелата во Премиерлигата со 33 бодови, но Манчестер Јунајтед има исто толку со натпреваар помалку. Од друга страна, Манчестер Сити има четири бода помалку од лидерите, но со два натпревари помалку. Сигурни сме дека не очекува луда трка за титулата во Премиерлигата!

Поранешниот дански репрезентативец, Бо Свенсон, го презеде кормилото на фудбалскиот состав Мајнц кој има само една победа во 14 кола и се наоѓа на претпоследното место во Бундес-лигата. 41-годишниот стратег во еден период од кариерата (2007-2014 година) играше токму за германскито состав. Интересно е тоа што Свенсон е четвртиот тренер во клубот од почетокот на сезоната. Прв беше Ахим Бајерлорцер потоа Јан-Мориц Лихте додека на неделниот меч со Баерн Минхен на клупата седеше Јан Сиверт. Новиот тренер на Мајнц ќе дебитира в сабота на домашен терен на мечот со Ајнтрахт Франкфурт.

Полската „гол машина“ на Баерн, Роберт Левандовски ја започна 2021 година со нов блесок – со два гола во победата на Баварците со 5-2 на домашен терен против Мајнц. Така Левандовски уште еднаш си најде место меѓу легендарните голгетери, овојпат покрај легендата Герд Милер. После Милер, Левандовски е играчот со најмногу голови по првите 14 кола од германскиот шампионат во историјата на Баерн. Милер е рекордер со 20 погодоци во првите 14 средби, а Левандовски веќе има 19 погодоци по првите 14 кола од сезоната 2020/21 во Бундеслигата. Баерн Минхен е лидер на табелата со 33 поени, а го следи РБ Лајпциг со 31 и Баер Леверкузен со 28 поени.

Еден од приоритетите на Јувентус во овој преоден рок ќе биде централен напаѓач. „Бјанконерите“ имаат намера да доведат некој кој нема скапо да го платат, а во игра се две имиња. Една од опциите е Фернандо Љоренте кој веќе во минатотo го носеше дресот на „старата дама“, а втората е напаѓачот на Каљари, Лука Паволети. Теретот на првиот дел од сезоната на свој грб го изнесоа Кристиjано Роналдо и Алваро Мората, додека Паоло Дибала разочара. Желба на Јувентус е и Оливие Жиру, но според најавите од Италија Французинот во овој момент е прескап за клубот од Торино.

Маурисио Покетино викендов и официјално стана нов тренер на Париз Сен жермен, откако на Божиќ отказ доби германецот Томас Тухел.
Покетино со францускиот шампион постигна договор на една и пол сезона, со можност договорот да биде продолжен на уште една година. Според потпишаното, аргентинскиот стручњак ќе заработува седум милиони годишно, што не го сместува ниту помеѓу десетте најплатени тренери на светот.
Прв на таа листа е тренерот на Манчестер Сити, Пеп Гвардиола кој годишно заработува 23 милиони евра, а десетти е тренерот на Баерн, Ханси Флик кој има годишна плата од осум милиони евра.
Единствените двајца тренери кои се на листата, а не се во Европа, се Рафаел Бенитез и Фабио Канаваро, кои работат во Кина. Тие се четврт и петти на листата најплатени со плата од 13,5 милиони, односно 12 милиони евра годишно.