Македонскиот фудбалски стратег и поранешен селектор, Ѓоко Хаџиевски и официјално ја потврди соработката со екипата на Хаџер од Саудиска Арабија.
Тој потпиша едногодишен договор со клубот кој има за цел пласман во елитата на саудискиот шампионат.
Минатата сезона Хаџиевски беше на чело на екипата на Емирати Клуб во ОАЕ.
Франција во последниот натпревар од групната фаза ремизираше со Португалија со резултат 2:2. Со тоа, ја задржа првата позиција во групата, па во осминафиналето ќе игра против Швајцарија.
Селекторот Дидие Дешамп беше задоволен со расплетот. „Беше тоа голема борба и не беше нималку едноставно. Им подаривме два гола од грешки. Се обидовме да победиме, не ни беше сеедно. На врвот сме во групата, а тоа е најдобра позиција. Треба тоа да го цениме и да се опоравиме. Сега започнува сосема нов турнир.“ – изјави Дешамп.
Францускиот стручњак оствари голем успех, ова за него е четврт голем турнир на кој со репрезентацијата е на првото место во групната фаза.
Титулата за играч на натпреварот ја понесе Карим Бензема, кој постигна два погодоци.
„Никогаш не се сомневав во себе. Знаев дека очекувањата се големи и драго ми е дека се покажав во вистинско светло.“ – заклучи напаѓачот на Реал Мадрид.
Ѕвездата на Ливерпул, Мохамед Салах сака да патува со Египет на овогодишните Олимписки игри во Токио. На фудбалскиот турнир таму може да учествуваат само играчи до 23 години, но дозволено е да има три кои ја надминуваат таа возраст. Египет сака тоа да бидат Салах и Мохамед Елнени од Арсенал, кои и самите сакаат да патуваат за Токио.
Проблемот е што Ливерпул не планира да го пушти Салах, затоа што фудбалскиот турнир на Олимписките игри трае од 22 јули до седми август, додека Премиер лигата почнува на 13-ти август. Салах така би ги пропуштил целите подготовки, а можеби и стартот на сезоната, што на клубот од Англија никако не им се допаѓа. Дополнителен проблем е и Африканскиот куп на нации, кој се игра во јануари 2022. година, а таму ќе оди Салах, па за Ливепрул би бил преголем удар да го загуби својот играч во два наврати во една сезона.
Претседателот на фудбалската федерација на Египет, Ахмед Мегахед потврди дека тие се во разговори со Ливерпул и дека ќе се обидат да го наговорат Ливерпул да му даде дозвола на Салах да игра во Токио, но тоа засега е без успех.
Напаѓачот на Португалија, Кристијано Роналдо, со двата гола на синоќешниот меч против Франција, успеа да го израмни светскиот рекорд по број на постигнати голови во националниот тим.
Ѕвездата на Јувентус синоќа стигна до бројката од 109 гола во дресот на Португалија, со што го израмни рекордот на Иранецот Али Даеи кој досега беше единствен на врвот на оваа листа.
Италијанскиот тренер Антонио Конте потенцира дека постојат четири фаворити за титулата и не очекува изненадување на Европското првенство. Тој не ја вброи Англија меѓу земјите кои треба да се борат за посакуваниот трофеј.
„Мислам дека никој од аутсајдерите нема шанси да го освои првенството. Најсериозни кандидати се Франција и Германија поради составите со кои располагаат и искуството. Тука е Белгија под услов Де Брујне и Витсел да играат во топ форма и секако Италија. Нашите репрезентативци покажаа континуитет и самодоверба, нема љубомора во тимот затоа што некој игра а друг не, заедништвото е многу значајно ако сакате да освоите таков турнир“, изјавил Конте.
Барселона ќе добие обештетување од ФИФА за повредата на играчот за врска Осман Дембеле. Како што објавија медиумите, Французинот поради повреда мораше да ја напушти селекцијата на Франција и сега мора да оди на операција.
Закрепнувањето на Дембеле ќе трае околу четири месеци, а според правилата на ФИФА, клубовите добиваат компензација за повреда на играч додека бил во националниот тим за време на турнирите вклучени во меѓународниот календар.
Плаќањата се вршат ако играчот е повреден подолго од 28 дена. Доколку Дембеле остане четири месеци надвор од терените, Барса ќе добие приближно 2,5 милиони евра отштета.
Синоќа беше завршена групната фаза од Европското првенство и во последните натпревари од тој дел од натпреварувањето беше срушен голем рекорд.
На четири натпревари беа вкупно постигнат 18 погодоци, најмногу во еден ден откако се игра Европско првенство. На првите натпревари Шпанија ја победи Словачка со 5:0, а Шведска со 3:2 ја победи Полска. Вечерните натпревари на Франција и Португалија, односно Германија и Унгарија завршија со резултат 2:2.
На Светско првенство рекорден број на погодоци во еден натпревар паднаа во 1954. година, кога беа постигнати 25 голови на четири натпревари. На ЕУРО рекордот до синоќа беше 14 погодоци и поставен во 2000. година.
Фудбалската федерација на Македонија се соочува со казна од УЕФА за можно кршење на здравствените правила од страна на нејзините играчи на ЕВРО 2020, иако тимот е елиминиран од првенството.
Надлежниот орган на Европската фудбалска асоцијација веќе ја заврши истрагата за наводно „лошо однесување и потенцијално кршење на здравствените протоколи“ од страна на играчите на ЕВРО 2020. Тоа се однесува на земање брис од играчи во Амстердам во саботата (19 јуни) за задолжителни тестови ковид-19, две дена пред мечот со Холандија, објави попладнево Германската новинска агенција (DPA).
Евентуалните санкции на УЕФА ќе бидат против федерацијата на Македонија, а нема да бидат индивидуални, односно нема да бидат изречени кон играчите.
Поранешниот холандски репрезентативец Рафаел ван дер Варт беше воодушевен од емотивното збогување на легендата на македонската фудбалска репрезентација, Горан Пандев.
„Мислам дека беше фантастично и емотивно. Тој е како Јохан Кројф од Македонија”, рече Ван дер Варт, како експерт на холандската национална телевизија.
„Ми дојдоа солзи в очи. Мислам дека е убаво што таквите играчи добиваат такво збогување”, дополни Холанѓанецот.
Италијанскиот фудбалски стратег, Антонио Конте неодамна потврди дека во новата сезона нема да биде на колрмилото на Интер, со кој во минатата сезона стигна до титулата во Серија А.
Конте, кој се поврзуваше и со кам-бек во Премиер лигата, откако доби понуда од Тотенхем е категоричен.
„Не сакам нов ангажман, сакам следната сезона да ја поминам со моето семејство и да учам нови работи. Спортот постојано се развива, јас сакам да гледам фудбал и да напредувам, но една година ќе паузирам од работа.“ – изјави Антонио Конте.
Италијанецот во изјавата за медиумите од Апенините посочи дека се уште е потресен по она што му се случи на Ериксен и побара сите добро да размислат во кој правец оди фудбалот и барањата кои стануваат преголеми и опасни по здравјето на фудбалерите.
