Според пишувањата во германските медиуми, репрезентативецот на Германија, Лерој Сане, поради проблеми со коленото ќе го пропушти првиот натпревар во групата Е против селекцијата на Јапонија.

Засега не е познато колкав период селекторот Флик ќе биде без еден од своите најдобри играчи, но се чека детален извештај од лекарскиот тим на репрезентацијата. 

Натпреварот помеѓу Германија и Јапонија се игра во среда со почеток во 14.00 часот.

На вториот ден од Светското фудбалско првенство во Катар, беа приметни долгите надополнувања на времето од страна на судиите во однос на вообичаените продолжетоци.

Така на натпреварот помеѓу Англија и Иран имаше судиско надополнување во траење од десет минути, а и на другите дуели имаше слични ситуации.

Претседателот на судиската комисија на ФИФА, Пјерлуиџи Колина, објасни зошто се воведоа построги примени на мерење на времето.

„Веќе на СП во Русија започнавме со прецизно мерење на дополнителното време, а сега ги известивме сите тимови да не бидат изненадени кога ќе го видат четвртиот судија со висок број на надополнување. Било да се работи за шест, седум или осум минути. Ако сакаме да имаме повеќе активна игра, ќе биде потребно и поголемо надополнување. Кога на ова ќе се додаде и прецизното мерење од ВАР тогаш секој натпревар ќе има точно прецизирана активна игра“, објаснува Колина.

Капитените на Англија, Велс, Белгија, Данска, Германија и Холандија, сепак, нема да носат капитенски ленти во боите на виножитите како поддршка за  „OneLove“ кампањата за ЛГБТ правата откако ФИФА потврди дека тие ќе добијат жолт картон ако носат вакви ленти.

Националните федерации беа подготвени да ги платат финансиските казни на ФИФА, но, очигледно проценија дека псотои опасност да останат без нивните капите за продолжението на Мундијалот

„Исфрустрирани сме од одлуката на ФИФА. Нашите играчи и тренери се разочарани“, се вели во нивното заедничко соопштение.

Селекторот на фудбалската репрезентација на Холандија, Луј ван Гал, после победата на неговата селекција над Сенегал, изјави дека е задоволен од играта на својот тим во одбраната, но не е задоволен од играта во средината на теренот.

Ван Гал потенцира дека неговата екипа успеа да направи пет шанси во првото полувреме, но дека застана со креирање на шанси во второто полувреме поради што направи промени во екипата.

Холандија го победи Сенегал со 2:0, во натпревар од првото коло во Групата А. Стрелци за Холандија беа Гакпо во 84.минута и Класен во деветтата минута од судиското продолжение.

Познат е фактот дека Англичаните се огромни љубители и познавачи на фудбалот. Колку тие се заљубени во оваа игра покажува и резултатот од спроведената анкета во Англија кој покажа дека на денот кога репрезентацијата го играше првиот дуел во Катар, дури 11 милиони Англичани зеле слободен ден од работа, годишен одмор или искористиле боледување, само за да можат да го следат преносот од натпреварот со Иран.

Интересен е фактот и дека голем дел од училиштата ја прекинаа наставата за учениците да го следат натпреварот со Иран кој Англија го доби со резултат 6:2.

Селекторот на француската репрезентација, Дидие Дешамп, изјави дека Рафаел Варан е подготвен за првиот натпревар на СП против селекцијата на Австралија. Воедно Дешамп потврдува дека нема причина за загриженост околу Камавинга кој пред еден ден пропушти тренинг со соиграчите.

Рафаел Варан доби повреда на 22.октомври и од тогаш нема одиграно фудбалски натпревар, но во саботата продолжи со тренинзите на Франција. Што се однесува до Камавинга кој претходниот ден не тренираше поради непријатност во бутниот мускул, селекторот Дешамш потврди дека тој е способен за игра.

Франција својот прв натпревар на Мундијалот го игра против Австралија.