Минатата недела, Каталонците на големо изненадување соопштија дека Лео Меси нема да продолжи и покрај тоа што се беше подготвено за Аргентинецот да стави потпис на нов договор.

Барселона прстот го впери во Ла Лига и правилата за финансиски фер-плеј, односно селари-капот кој мора да го почитува секој клуб. Жоан Лапорта на прес конференцијата се правдаше дека со новиот договор на Лео Меси, буџетот за плати ќе биде 110% од приходите.

По ваквиот развој на настаните, Лео Меси за брзо време пронајде заеднички јазик со ПСЖ и потпиша со „светците“.

Но и без Аргентинецот во тимот, Барселона не може да ги регистрира засилувањата. Викендов почнува новата сезона во Ла Лига, и „каталонците“ се една од шестте екипи кои не ги регистрирале новите играчи.

Барса никако не успева да се раздели со фудбалери како Умтити, Пјаниќ или Кутињо, па буџетот за плати останува над лимитот пропишан од Ла Лига. Клубот од Камп Ноу мора да најде начин како да се ослободи од фудбалерите на кои не смета, или да се обиде да преговара со фудбалерите со високи примања, тие да прифатат помала плата.

Доколку во следните 48 часа нема напредок на ова поле, Роналд Куман нема да може да смета на Депај, Емерсон и Ерик Гарсија за дуелот со Реал Сосиедад (Агуеро е повреден па и онака е надвор од комбинација).

На располагање ќе биде само Јусуф Демир, бидејќи тој се води како фудбалер на Барса Б.

Борусија Дортмунд презема драстични мерки со пандемската криза која ја создаде ковид-19. Имено, „милионерите“ нема да дозволат влез на стадионот на невакцинирани.

Во соопштението кое го објавија „милионерите“ објаснија дека негативен тест нема да биде доволен да се влезе на стадионот, туку тоа ќе биде возможно само со сертификат за вакцинација.

„Вакцинацијата е клучот за враќање во нормалноста“, соопшти Ханс Јоаким Вацке, првиот човек на Борусија.

Вакво правило за влез на вакцинирани навивачи воведе и тимот на Келн.

Академија Пандев вчера објави дека потпишан е договор со Осман Маронг кој доаѓа од Црвена Звезда.

Станува збор за 22-годишен фудбалер од Гамбија кој со „пандевци“ потпиша договор на две години.

„Оусман Маронг од Црвена Ѕвезда најново засилување за Академија Пандев. Гамбиецот денеска потпиша двегодишен договор со нашиот клуб и во тек е неговата регистрација за право на настап. Се работи за 22-годишен играч кој подеднакво добро се снаоѓа на позициите офанзивен играч за врска и крилен напаѓач. Му посакуваме многу голови и асистенции во плаво-белиот дрес!“, соопштија од Академија Пандев.

Баерн Минхен го стави Корентан Толисо на трансфер-листата ова лето и е подготвен да прифати обештетување од само 10 милиони евра. 

Повремениот француски репрезентативец не се изнаигра премногу во дресот на германскиот гигант и тоа најмногу поради повредите. Фудбалерот од средниот ред дојде од Лион за 45 милиони евра пред три сезони, но сега новиот тренер Јулијан Нагелсман не смета неговите услуги.

Има доста заинтересирани тимови за трансфер на Толисо особено што неговата вредност е далеку поголема од оние 10 милиони што ги бара Баерн.

Јувентус, Манчестер јунајтед и Арсенал се подготвени да испратат понуда за Французинот.

Фудбалерот за врска на Рома, Лоренцо Пелегрини ќе го продолжи договорот со клубот.

Раководството на римјаните му понудило на 25-годишниот Италијанец договор до 2025 година со можност за продолжување на уште една сезона. Годишната платата на фудбалерот ќе биде 3 милиони евра плус бонуси, вели анонимен познавач на италијанскиот фудбал.

Минатата сезона, Пелегрини одигра 47 натпревари за Рома, на кои постигна 11 голови и направи 10 асистенции.

Напаѓачот на Милан, Златан Ибрахимовиќ може да го пропушти почетокот на новата сезона поради повредата на левото колено, информира „Ла Газета дело Спорт“. 39-годишниот Швеѓанец се повреди на натпреварот од 35. коло од последната сезона на италијанското првенство против Јувентус (3-0).

Клубот не сака да ризикува и ќе му даде повеќе време на играчот да закрепне. Најверојатно, тој ќе се врати на терените во септември, по пауза за репрезентативните настапи, додаваат од „Ла Газета дело Спорт“.

Во првото коло од сезоната 2021/22 во Серија А, Милан ќе се соочи со Сампдорија. Ибрахимовиќ минатата сезона одигра 27 натпревари за Милан, постигнувајќи 17 гола и три асистенции.

Во моментите кога Меси го комплетира трансферот во ПСЖ, Реал Мадрид објави дека ќе го тужи првиот човек на Ла Лига Хавиер Тебас.

„Кралевите“ објавија кратко соопштение после итниот состанок на Управниот одбор на кој се донело одлука дека може да се започне со тужба за Тебас поради криминал, но и за уште неколку други лица.

„УО на Реал Мадрид ќе преземе постапка која ја смета за вистинска со цел да се поништи, неефикасната резолуција која треба да ја освои Собранието на Ла Лига на 12. август во врска со договорот на Ла Лига и ЦБЦ Партнерс“, стои во соопштението.

Ла Лига и ЦВЦ веќе се договорија за 2,7 милијарди евра свеж капитал, на кој Реал Мадрид и Барселона силно се спротивставија и најавија дека ќе се обидат да го урнат замислениот проект на Тебас.

Манчестер јунајтед е подготвен да го продаде напаѓачот Ентони Марсијал ова лето, објави „Би-би-си Спорт“. Според британскиот медиум, тренерот на Манчестер јунајтед, Оле Гунар Солскјер, не смета на 25-годишниот напаѓач во новата сезона.

Претходно беше објавено дека Французинот е во сферата на интересите на Интер. Италијанскиот клуб можеше да го купи за 50 милиони фунти. Минатата сезона Марсијал одигра 36 натпревари на кои постигна седум гола и забележа девет асистенции.

Адис Јаховиќ би можел да направи нов трансфер во турскиот фудбал. Според последните информации од турските медиуми интерес за Јаховиќ покажала Бурсаспор. Како што се пишува Бурса доставила понуда за трансфер на Јаховиќ. Понудата до Јаховиќ била едногодишен договор со опција истиот да биде продолжен на уште една.

Гезтепе за услугите на Јаховиќ бара оштета од 600.000 евра.

И лани Јаховиќ се поврзуваше со Бурса, но до тој трансфер не дојде. Во минатата сезона за Гезтепе, Јаховиќ постигна девет гола и подели две асистенции на 36 натпревари.

Манчестер Сити ќе ги продолжи преговорите со Рахим Стирлинг за продолжување на договорот на играчот. Сегашниот договор на крилото е до летото 2023 година.

Меѓутоа, во последните месеци се појавија гласини дека размислува да го напушти „Етихад“, бидејќи не е задоволен од малата минутажа што ја доби на крајот од минатата сезона. Сепак, се чини дека клубот планира да продолжи да смета на него и ќе се обиде долгорочно да го задржи, пренесува „Сан“. Во медиумите се појавија информации дека Стерлинг бил понуден на Тотенхем како дел од договорот за привлекување на Хари Кејн.

Сепак, 26-годишниот англиски репрезентативец не се согласи да се пресели кај Тотенхем и тоа го уништи трансферот. На крајот, Пеп Гвардиола исто така инсистираше Стирлинг да остане, и се чини дека тоа е желба на самиот играч. Така, двете страни ќе ги продолжат преговорите меѓу себе. Овој пат, сепак, Стерлинг се ќе остави во рацете на своите агенти, откако претходно ги застапуваше сопствените интереси во претходните разговори, но потоа не успеа да постигне договор со газдите на „граѓаните“.