Напаѓачот на Аталанта, Дуван Запата заработи повреда на натпреварот против Каљари кој екипата од Бергамо го загуби со 1:2.

Колумбиецот се појави на теренот за прв пат по 21 декември,и влезе во игра како резерва во 58. минута, но кратко потоа беше принуден да го напушти теренот. 

По завршувањето на натпреварот беше соопштено дека неговата повреда се покажа посериозна од очекуваното, и фудбалерот може да не игра меѓу три и четири месеци.

Капитенот на Манчестер Јунајтед, Хари Мегвајер, изрази разочарување после ремито со Барнли од 1:1, во 24.коло на Премиер лигата.

„Црвените ѓаволи“ беа многу подобра екипа во првото полувреме, меѓутоа чврстиот тим на Барнли успеа да изедначи на стартот од второто полувреме.

Искусниот дефанзивец е свесен дека навијачите на Манчестер Јунајтед се повторно разочарани од ваквиот резултат.

„Имавме контрола во првото полувреме и моравме да победиме после големиот број на шанси кои ги направивме. Едноставно, моравме да постигнеме втор гол. Вака повторно многу лесно прокоцкавме два бода“, изјави капитенот Мегвајер.

Челзи сака да го продолжи договорот со играчот од средниот ред Мејсон Маунт, објави новинарот Николо Шира на својот Твитер.

Во наредните недели лондонскиот клуб ќе разговара со играчот за продолжување на договорот. Актуелниот договор на Маунт со „сините“ истекува во 2024 година. Челзи е подготвен да му понуди долгорочен договор на играчот од средниот ред и планира да му ја зголеми платата.

Париз Сен Жермен продолжува да се надева дека ќе успее да ја задржи својата ѕвезда Килијан Мбапе и поради оваа причина е подготвен да го направи најплатен играч во тимот, надминувајќи ги Меси и Нејмар.

 Мбапе има договор до крајот на сезоната и е слободен да преговара со други клубови. Се верува дека Реал Мадрид води во трката за неговиот потпис. Минатата недела имаше информации дека „кралскиот клуб“се договорил за неговите лични услови и ќе добива рекордни 50 милиони евра годишно на „Сантијаго Бернабеу“.

Според информациите во некои француски медиуми, ПСЖ е подготвен да го направи Мбапе најплатен играч со тоа што ќе му понуди астрономски, но и краткорочен нов договор. Раководството на Париз не губи надеж дека 23-годишниот напаѓач ќе потпише нов договор и ќе остане во тимот. Оптимизмот доаѓа од тоа што Мбапе никогаш не изјавил дека ќе си замине по крајот на сезоната.

Џорџо Киелини заработи повредан а мускулот поради што ќе биде надвор од терените во наредните 20-тина дена, пренесуваат италијанските медиуми.

Киелини се повреди пред два дена и натпреварот против Верона го заврши на 15 минути пред крајот. Како што стојат работите дефанзивецот ќе ги пропушти натпреварите против Сасуоло, Аталанта и Торино, но и осминафиналето во Лигата на шампионите против Виљареал.

Очекувањата се да се врати на терен на крајот на месецот против Емполи. Имајќи предвид дека и Бонучи е повреден Алегри ќе има проблеми до крајот на месецот со дефанзивата.

Против Сасуоло во четврток најверојатно со Матијас Де Лихт ќе игра Даниеле Ругани.

Филипо Инзаги доби отказ на кормилото на Бреша и претседателот Масимо Селимо ќе бара нов тренер и покрај тоа што Инзаги имаше добри резултати сезонава.

Бреша е трета во Серија Б со само два бода помалку од лидерот Лече, но и во таква ситуација Инзаги доби отказ. Според информациите кои ги објавија италијанските медиуми дошло до недоразбирања во претходниот период помеѓу Селино и Изнаги.

Селино поради тоа чекал само барем некој лош резултат за да има алиби за отказот. Во последните две кола Бреша одигра реми со послаби противници и тоа беше ситуацијата која ја чекаше Селино за да го отпушти славниот Пипо.

Салцбург е познат како клуб кој во последните години лансираше голем број на таленти, а сега има нова ѕвезда за која се „тепаат“ европските гиганти.

Станува збор за 21-годишниот Бренден Аронсон, кој во јануари минатата година пристигна во Салцбург од Филаделфија.

Аронсон е офанзивен играч за врска, кого го карактеризира голема техника и чуство за гол и веќе е стандарден репрезентативец на САД. Неколку клубови од Премиер лигата, Милан, Јувентус и Севиља внимателно ги следат неговите настапи и сакаат да го донесат на лето во своите редови.

Њукасл со богатите сопственици се обидуваше да доведе поголема ѕвезда во зимскиот преоден рок, но сепак не успеаа, поголемиот дел од фудбалерите го одбиваа амбициозниот премиерлигаш.

Еден од оние меѓу кои прифатија да играат за Њукасл е Бруно Гуимараеш од кого се очекува да биде и најголемо засилување за овој тим. За него Њукасл плати 40 милиони евра на француски Лион.

За англиските медиуми Бразилецот откри како го убедиле да ја прифати понудата.

„Во преговорите сопствениците беа искрени со мене. Размислував и на крајот одлучив да дојдам тука. Во овој момент главната цел е да се избориме за опстанок, а во наредните сезони не само што ќе се бориме за настап во ЛШ, туку целта ќе биде да го освоиме тој трофеј“.

Пред да ја прифати понудата разговарал со сонародниците Тијаго Силва, Габриел Жесус и Алекс Телеш кои имаат искуство со играње во Англија.

„Клубот има фантастични фанови, во разговорите моите сонародници ми кажаа колку им е тешко да гостуваат на Њукасл. Ви тврдам дека ќе прераснеме во голем клуб. Њукасл е клуб со убава историја и голема традиција, а сега има и светла иднина. Овој дрес во минатото го носеле многу славни имиња“, изјави Бруно.

Новото засилување на Ливерпул, Луис Дијаз и официјално се најде на списокот на играчи на кои Јирген Клоп може да рачуна за натпреварите од елиминационата фаза во Лигата на шампионите. Колумбиецот го зазеде местото на Натаниел Филипс, кој замина на позајмица во екипата на Бурнмаут.

Луис Дијаз веќе дебитираше за Ливерпул на натпреварот со Кардиф Сити во четвртото коло од ФА Купот, при што асистираше за еден од головите на својот тим.

Според новите правила на УЕФА, тој нема проблеми да игра за Ливерпул во елиминациите од Лигата на шампионите, иако веќе настапуваше за екипата на Порто во  групната фаза на ЛШ.

Напаѓачот на Реал Мадрид, Карим Бензема, побарал средба со претседателот Флорентина Перез во врска со евентуален трансфер на Ерлинг Халанд на „Сантијаго Бернабеу“. 

Францускиот напаѓач изразува загриженост дека ќе го загуби стартното место во тимот доколку Норвежанецот пристигне во Реал.

Бензема е во неверојатна форма оваа сезона постигнувајќи 24 гола на 28 натпревари. Сепак, клубот подготвува сериозно засилување во нападот, со обид за доведување на  Мбапе и Халанд.

Поради овие причини Бензема сака да ја разјасни ситуацијата околу својата позиција во тимот за следната сезона доколку ѕвездата на Борусија Дортмунд пристигне во Реал Мадрид.