Микел Артета ќе добие голем буџет за летни засулувања, пренесуваат медиумите на Островот.

Сопственикот Стан Кронке имал состанок со Артета и му ветил дека ќе обезбеди 180 милиони фунти за летни засилувања.

Оваа сума ќе биде распределена на три конкретни цели. Тоа се Напаѓачот на Реал Сосиедад Александар Исак, Напаѓачот на Евертон Калверт Луин и плејмејкерот на Вулверхемптон Рубен Невеш. Минатото лето Арсенал потроши 150 милиони фунти за трансферите  на Бен Вајт, Мартин Одегард, Арон Рамсдејл, Томиасу, Локонга и Нуно Тавареш, а целта на тимот е пласман во Лигата на шампиони.

Дани Алвес е играчот кој не е пријавен за натпреварите на Барселона во Лигата на Европа.

Каталонците играа лошо во групната фаза од Лигата на шампионите, па така европскиот пат го продолжуваат во Лигата на Европа. Во нокаут фазата првата пречка ќе им биде Наполи на нашиот Елиф Елмас.

Според правилата на УЕФА еден клуб има право да пријави тројца нови фудбалери за вториот дел од натпреварувањето. Барселона во претходниот период ги доведе Дани Алвес, Обамејанг, Адама Траоре и Феран Торес.  За сите четворица немаше место во ЛЕ.

На крајот Чави се реши во Европа да не смета на искусниот Дани Алвес.

Од „Скај Италија“ тврдат дека ѕвездата на Милан Златан Ибрахимовиќ, најверојатно ќе го пропушти градското дерби со Интер закажано за во сабота.

Ибрахимовиќ не присуствувал на тренингот со својот тим, но имал индивидуални сесии во теретана.Тој се опоравува од повредата која ја заработи на дуелот со Јувентус на 23 јануари.

Тренерот Стефано Пиоло нема да рачуна ниту на Анте Ребиќ кој исто така е во процес на опоравување, но добра вест е враќањето на Томори кој е спремен за игра.

Горан Пандев на големо изненадување во последниот ден од преодниот рок ја напушти Џенова и се пресели во Парма, каде ќе игра до крајот на сезоната.

Пандев веќе почна да тренира со Парма, а за медиумите изјави дека е среќен што ќе може да игра во ист тим со легендарниот Џанлуиџи Буфон.

„Трансферот се случи набрзина, а мојата желба е да бидам важен дел од тимот. Се надевам дека се ќе биде добро во Парма и дека ќе ги оствариме целите, а тоа е влез во плејофот и пласман во Серија А. Нема да се променат моите планови и на крајот на сезоната ќе означам крај на мојата фудбалска кариера. Големо е задоволството да се игра со Буфон, знаеме што значи тој за европскиот и светскиот фудбал, а кога дојдов ми кажа дека е среќен бидејќи нема да му давам повеќе голови“, изјави Пандев.

Најдобриот стрелец во Првата македонска фудбалска лига, Мартин Мирчевски ја напушти Академија Пандев и стана нов член на српскиот прволигаш ТСЦ Бачка Топола.

Иако 24-годишниот  Мирчевски, претходно се поврзуваше со трансфер во клубови од Турција, тој сепак реши да ја прифати понудата од Србија и да потпише три годишен договор.

Од стартот на сезоната тој во дресот на Академија Пандев постигна 16 погодоци на 18 одиграни натпревари.

Напаѓачот на Бенфика, Дарвин Нуњес ја одушеви фудбалската јавност и е на мета на многу европски гиганти.

22-годишниот уругвајски репрезентативец игра одлично, па Бенфика не сакаше да го пушти на средина од сезоната иако пристигна богата понуда од Вест Хем.

Имено, „чеканите“ испратиле понуда од 50 милиони евра, но Бенфика ја одбила понудата. Сепак, Вест Хем не се откажува и сака уште сега да го договори трансферот за на лето.

Нуњес е еден од најбараните напаѓачи во Европа, па Вест Хем сака да ја победи конкуренцијата. „Чеканите“ ги продолжија преговорите и се спремни да платат 60 милиони евра со вклучени бонуси.

Бенфика не сакаше да го пушти во јануари, бидејќи Уругваецот оваа сезоан постигна 20 гола на 25 натпревари.

Легендата на Јувентус, Алесандро Дел Пјеро, верува дека Душан Влаховиќ и Денис Закариа ќе ја трансформираат екипата во позитивна смисла.

Двајцата фудбалери пристигнаа во Торино во јануарскиот преоден рок. Влаховиќ пристигна од Фиорентина за повеќе од 70 милиони евра додека Закариа беше купен од Борусија Менхенгладбах за 8 милиони евра.

„Влаховиќ има неверојатни квалитети и е многу добро физички подготвен. Ако ја продолжи формата што ја имаше во Фиорентина, ќе биде добро за тимот. Може да постигне гол на секој начин. Овие промени можат да го трансформираат Јувентус, да донесат ентузијазам и чувство на сила во сопствениот потенцијал“, изјави Дел Пјеро.

Легендата на холандскиот фудбал Руд Гулит смета дека за ѕвездата на Борусија Дортмунд, Ерлинг Халанд би било идеално да игра под водство на Јирген Клоп во тимот на Ливерпул.

Се очекува напаѓачот на Дортмунд да биде еден од најбараните играчи кога повторно ќе се отвори трансфер пазарот на крајот од сезоната. 21-годишниот Норвежанец наводно има клаузула во договорот која ќе му овозможи да биде купен за 75 милиони евра.

„Го гледам во Англија, но мислам дека нема да оди во Манчестер Јунајтед. Сити би бил добар за него поради Пеп Гвардиола. Но, одлични би биле и Јирген Клоп и Ливерпул. Она што го направи Јирген со клубот е неверојатно. Не можеш а да не го почитуваш бидејќи тој е секогаш гладен за успех, а тоа би му одговарало на Халанд. Во Шпанија опција е само Реал Мадрид. Ова се трите клуба кои ќе се борат за Ерлинг“, изјави Гулит за германскиот весник Билд.

Медиумите од Англија ја пренесуваат веста дека Рој Кин е блиску до враќање на клупата на Сандерленд.

Некогашниот премиерлигаш Сандерленд, сега се натпреварува во Лига еден и се бори за пласман во Чемпионшип. После последниот пораз од Болтон со резултат 0:6, клубот одлучи да го отпушти тренерот Џонсон, а како негова замена се споменува Рој Кин.

Кин е поранешен играч на Манчестер Јунајтед кој своевремено успешно ја тренираше екипата на Сандерленд и челниците на клубот имаат мислење дека тој би бил најдобро решение за преземање на клупата во овој момент.

Фудбалската рпрезентација на Сенегал е првиот финалист на Африканскиот куп на нации, откако во полуфиналето со резултат 3:1 ја совлада селекцијата на Буркина Фасо.

Сите голови на натпреварот паднаа во второто полувреме, а најдобар играч на теренот беше Садио Мане од Сенегал, кој запиша асистенција и гол.

Во второто полуфинале се среќаваат репрезентациите на Египет и домаќинот Камерун. За Египет настапува еден од најдобрите светски фудбалери, Мохамед Салах, па така можно е финале помеѓу двата напаѓачи на Ливерпул, Мане и Салах.