Локалните избори во Хрватска се ближат, а партиите и коалициите во јавност ги претставуваат своите кандидати.
Така дубровачката Дустра, на чие чело е градоначалникот на Дубровник Жељко Рагуж, како еден од своите кандидати за изборите кои се одржуваат во мај, го претстави Емир Спахиќ, поранешниот капитен на фудбалската репрезентацијата на Босна и Херцеговина.
Спахиќ е роден во Дубровник, ја започна кариерата за тимот ГОШК токму од овој град, па потоа се пресели во Загреб каде ја освои и титулата шампион на Хрватска, по што имаше и повеќе од успешна интернационална кариера.
Во дресот на БиХ запиша 94 настапи, а како капитен ја водеше својата репрезентација на Мундијалот во 2014 година.
„Со години министер за одбрана во најсилните лиги на светот, легендарен капитен и икона, како на теренот, така и надвор од него. Секогаш бескомпромисен и со срце, нашиот гигант Емир Спахиќ.“ – вака партијата ја најави политичката кариера на Спахиќ и кандидатурата за член на градското Собрание на Дубровник.

Пеп Гвардиола по пласманот на Манчестер Сити во четвртфиналето од Лигата на шампионите откри како го смисли еден од своите „специјалитети“.
Гери Линекер, некогашниот фудбалер, а сега телевизиски коментатор, го запраша од каде идејата Жоао Кансело, инаку лев бек, во нападот да го испрати на средината од теренот. Линекер напомена дека Гвардиола тоа го правеше и додека го водеше Баерн, тогаш со Џошуа Кимих.
„Тоа го научив во Германија. Кога таму ќе ја загубиш топката во нападо,те убиваат во контра. Во Барселона ми беше полесно да ја контролирам играта со играчите кои ги имав. Во нив требаше да вперите три пиштоли да ја загубат топката. Практично беше невозможно тоа да се случи.
Во Германија беше комплетно различна ситуација, но основната причина зошто тоа го правам е како на средината би имал повеќе играчи за додавање, комбинирање. Поточно, со кратки пасови да се оствари контрола на средината од теренот.“

Иван Тричковски, фудбалерот на АЕК Ларнака, нема да биде дел од нашата репрезентација на мартовските квалификациски мечеви за Мундијалот откако заработил потешка повреда на мускулот на дуелот со Омонија.
Тоа значи дека селекторот, Игор Ангеловски, се соочува со нов проблем откако беше објавено дека Влатко Стојановски не може да допатува бидејќи Франција им забрани на фудбалерите од Лига 1 и Лига 2 да патуваат во земјите надвор од ЕУ, а Ѓоко Зајков е позитивен на Ковид-19.
Според распоредот, со Романија ќе играме на 25-ти, Лихтенштајн ќе го пречекаме на 28-ми додека кај Германија ќе гостуваме на 31-ви март.

Македонскиот репрезентативци, Аријан Адеми и Стефан Ристовски со Динамо Загреб се пласираа во четвртфиналето во Лига Европа, откако по 120 минути игра славеа на „Максимир“ против Тотенхем со 3:0. Оршиќ беше стрелец на трите гола за екипата која ја предводеше Крзнар за прв пат, по оставката на Зоран Мамиќ. По мечот, несвојствено за него, Мурињо влезе во соблекувалната на Динамо и им го честиташе пласманот во четвртфиналето.

Кошмарот на Еден Азар со повреди продолжува откако пристигна во Реал Мадрид летото 2019 година. Тој доби уште една повреда на мускулот кратко време откако се врати во тренажен процес. Белгиецот ќе биде надвор од теренот од 4 до 6 недели, но се надева дека ќе биде подготвен за настап на Европското првенство. Причината за повредите на мускулите на Азар е проблем во левиот скочен зглоб, од кој страдаше подолго време. Тој размислувал за операција на зглобот за отстранување на метална плочка која била поставена за да обезбеди поголема стабилност. Играчот веруваше дека оваа плочка предизвикува непријатност и е причина за повреди на мускулите. Докторите и медицинските лица од Реал Мадрид и од Лондон, со кои Азар работи одделно, го советуваа да не оди на операција. По консултациите, фудбалерот се откажа од оваа опција и ќе продолжи со опоравување од последната повреда без операција.

Играчот за врска на Борусија Дортмунд, Махмуд Дахуд, може да ја продолжи кариерата во англиската Премиер лига. Според „Дејли мејл“, Манчестер Сити, Челзи, Тотенхем и Евертон го следат фудбалерот. Договорот на Махмуд со германскиот клуб истекува летото 2022 година и тој сè уште не се согласил за негово продолжување. Дахуд потекнува од Борусија Менхенгладбах, а во истоимениот клуб се пресели во 2017 година, потпиша договор на пет години. Од минатата година, играчот кој потекнува од Сирија е повикан во германската репрезентација. Оваа сезона, 25-годишниот играч за врска учествуваше на 12 натпревари од германската Бундес лига, на кои постигна еден гол. Исто така играчот постигна еден гол на четири натпревари од Лигата на шампионите.

Одреден е точниот датум и време на еден од највозбудливите дуели не само во шпанскиот, туку и во светскиот фудбал – „Ел Класико“. Бранителот на титулата од минатата година Реал Мадрид ќе биде домаќин на својот голем ривал Барселона на 10 април (сабота) од 21:00 часот во натпревар од 30. коло на шпанското првенство Меѓу другото, натпреварот може да биде клучен во битката за првото место во „Ла Лига“, бидејќи и Барселона и Реал Мадрид неодамна ја намалија разликата со лидерот на табелата Атлетико Мадрид.Тимот од „Ванда Метрополитано“ има 4 бода предност пред Каталонците и 6 пред Реал Мадрид. Барселона и Реал Мадрид веќе се сретнаа еднаш оваа сезона во „Ла Лига“, Реал Мадрид тогаш победи на „Камп Ноу“ со 3:1, а мечот се одигра во октомври.

Новиот претседател на Барселона, Жоан Лапорта има јасна идеја што да му понуди на Меси, за да го убеди да остане на „Камп Ноу“.
Договорот на капитенот истекува на крајот на сезоната, па Лапорта нема време за губење и веќе направи план. Самиот Меси побарал гаранции дека на „Камп Ноу“ повторно ќе се игра за титули и дека ќе бидат донесени нови врвни фудбалери. На Аргентинецот особено му е важно Барса да биде конкурентна за трофејот во Лигата на шампиони.
Лапорта ќе му понуди на Меси помала плата од актуелната поради финансиската криза, но сепак е оптимист дека Аргентинецот ќе прифати.
На Меси ќе му биде предложена директорска фукција во клубот после завршување на фудбалската кариера. Притоа, Лапорта ќе му вети на капитенот дека клубот ќе продолжи да инвестира во „Ла Масија“ и дека многу млади таленти ќе добиваат шанса во првиот тим.

34-годишниот Хулк оваа зима од Кина се врати во бразилски Атлетико Минеиро.
Поранешниот напаѓач на Порто и Зенит и играч кој за Бразил одигра 48 натпревари, последните четири години настапуваше за кинески Шангај, а со 34 години се врати во својата татковина.
Некогашниот репрезентативец на Бразил е познат по големата снага поради која и го доби прекарот Хулк, а колку е физички посебен сведочи и фактот што по натпревар тој губи дури пет килограми!
Тоа го објасни Роберто Киари, физиотерапевтот на Атлетико. Тој тврди дека Хулк веќе на наредниот натпревар доаѓа со неколку нови килограми со кои ги надокнадува загубените за време на тренинг или натпревар.
„Хулк доста се поти, тоа не е нешто лошо. Дури спортист кој многу поти, се користи со најефикасниот механизам за ослободување на телесната топлина. Тоа се случува при потењето. Таа пот, кога испарува, прави спортистот ефикасно да губи телесна топлина. Тоа значи дека губењето на повеќе килограми со дехидрација преку потење не е проблем. Потребно е само да се посвети внимание на хидратацијата на овој играч.“ – објасни Киари, па додаде:
„Нашите луѓе стојат на работ од теренот со шишенца со вода и кога Хулк ќе застане, веднаш добива шишенц. Тој доста дехидрира за време на натпреварите и тренинзите, па затоа мора прв да дојде по изотонична вода.“

Челзи се пласираше во четвртфиналето од Лигата на шампионите, со одличната одбрана го „архивираа“ Атлетико, победија со нивното оружје, а тимот на Тухел навистина е за избегнување на утрешната ждрепка.
„Сите ќе сакаат да не играат со нас.“ – заклучи Тухел, кој слободно може да се каже дека го „прероди“ Челзи.
Инаку, „сините“ од Лондон се во потрага по нов напаѓач, една варијанта е да го испратат Вернер во Дортмунд за Халанд, но тоа не е реално. Наводно нудеа и 50 милиони на Јувентус за Дибала, но тоа е недоволно.
Она што го планираат го објавија англиските медиуми.
Имено, Челзи ќе му понуди договор на Серхио Агуеро. Според одредени информации, Аргентинецот не сака во Барселона, сака да остане во Премиерлигата, ќе биде слободен играч ,а во Лондон го чекаат со ширум отворени раце. Би бил огромно засилување, не само поради квалитетот, туку и искуството, а би можел да биде и ментор на помладите играчи.