Симон Кјаер е блиску до потпишување на нов договор со Милан, пренесува „Газета дело Спорт“.

32-годишниот дефанзивец игра одлично и е еден од најважните фудбалери во тимот, па Милан сака да го задржи.

Неговиот договор со „росонерите“ истекува на крајот на сезоната, но последните информации се дека ја прифатил понудата на Милан.

Уште еден инцидент со навивачите во Франција се случи на дерби натпреварот помеѓу екипите на Марсеј и Париз Сен Жермен, кој се одигра на Велодром и заврши со резултат 0:0.

Во 72. минута од натпреварот во моментот кога топката се наоѓаше во посед на Меси кој имаше акција кон голот на домаќините, на теренот влета навивач кој ги избегна редарските служби и стигна до звездата на ПСЖ со што направи прекин на натпреварот.

Но за среќа инцидентот и прекинот на натпреварот не траеа долго бидејќи обезбедувањето за многу кратко време стигна до навивачот и го отстрани од теренот.

Долго време навивачите на Барселона се незадоволни од начинот на кој игра нивната екипа под раководство на Роналд Куман. Поразот во Ел Класико од вечниот ривал Реал Мадрид со 1:2 ја прели чашата и навивачите се одлучија да го  изразат незадоволството и да му извршат притисок на тренерот кој го сметаат за најодговорен за лошите игри на Барса.

Куман во неговиот обид да го напушти Ноу Камп со својот автомобил беше пречекан од навивачите кои го опколија и почнаја да испраќаат навреди кон тренерот на Барса, кој едвај успеа да се пробие и да го напушти стадионот.

После инцидентот, од раководството на Барселона излегоја со соопштение дека сите навивачи кои беа вклучени во немилите настани ќе бидат казнети со цел вакви настани да не се повторуваат. 

Познат е фактот дека Кристијано Роналдо е лош губитник и не сака порази во напреварите. Тоа се докажа и во натпреварот во кој неговиот Манчестер Јунајтед беше демолиран од тимот на Ливерпул на сред Олд Трафорд со 0:5

При резултат од 0:3 за Ливерпул кон крајот на првото полувреме,  Роналдо при еден дуел со играчот на гостите Куртис Џонс ја загуби топката по што Португалецот потполно ги загуби нервите и почна да шутира кон топката што се наоѓаше во посед на Џонс, кој во моментот беше паднат на тревата. Роналдо во немоќ продолжи да шутира и за малку не го погоди играчот на Ливерпул во стомакот. Во мешаницата која настана по стартот се вклучија повеќе играчи од двете екипи и за малку беше избегнат поголем инцидент.

За овај старт Роналдо доби само жолт картон, но ако беше искористена помош од ВАР, судијата лесно можеше да му додели и директен црвен картон.

Дивок Ориги најверојатно ќе го напушти клубот во зимскиот преоден рок, пренесуваат англиските медиуми. 26-годишниот напаѓач не добива голема минутажа кај Јирген Клоп, па тоа е причината поради која сака да ја промени средината.

Ориги и во летниот преоден рок беше на излезна врата од „Енфилд“, но никој клуб не сакаше да плати 10 милиони фунти, колку што Ливерпул бараше за неговата слобода.

Интерес за него покажуваат неколку клубови од Премиер лигата и Серија А, а Ливерпул е спремен да го пушти ако пристигне добра понуда.

Јувентус покажува силен интерес за голманот на Челзи, Кепа Аризабалага, пренесуваат италијанските медиуми.

„Старата дама“ бара замена за Шчесни и планира да испрати понуда за 27-годишниот шпански голман.

Кепа е најскапиот голман во светот, но во Челзи го загуби местото во стартниот тим и моментално е резерва на Менди.

Кепа има договор со Челзи уште четири години, но и самиот сака да ја промени средината.

Серхио Бускетс смета дека резултатот во Ел Класико не ја дава вистинската слика на прикажаното. Реал Мадрид победи на Камп Ноу со 2:1, а Бускетс особено ја остакна играта на двајца фудбалери на „кралскиот“ клуб.

„Не мислам дека одигравме слаб меч, сметам дека поразот не е заслужен. Резултатот не одговара на покажаното. Знаевме дека ќе ни остават простор со топката, но со Винисиус и Родриго се многу брзи и ни правеа штета при контрите. Доста добро ги контролиравме, но доволно е еднаш да не го направите тоа и примате гол. Тоа менува се и комплетно го промени текот на мечот. Не заслуживме да загубиме, но таков е фудбалот“, додаде капитенот на Каталонците.

Џошуа Кимих е една од големите фудбалски ѕвезди, кои засега одбиваат да се вакцинираат во обидот да бидат позаштитени од вирусот ковид-19.

Фудбалерот на Баерн Минхен јавно зборувал за својата одлука и зошто засега одбива вакцина.

„Одбив да се вакцинирам затоа што не сум сигурен дека се доволно испитани и безбедни. Свесен сум за мојата одговорност, ги почитувам хигиенските мерки, а на секои два-три дена се тестираме за вирусот. Но, мора да кажам дека не сум од оние кои не ја признаваат опасноста од вирусот, ниту пак сум анти-ваксер. Исто така не велам категорично дека нема да се вакцинирам, постојат реални шанси тоа да се случи во иднина“, рекол Кимих.

Легендата на Арсенал и на холандската репрезентација, Марк Овермарс, започна преговори со екипата на Њукасл за местото фудбалски директор, пренесува англискиот “Мирор“.

Холанѓанецот Овермарс, е високо ценет во светот на фудбалот, благодарение на неговите играчки денови во екипата на Арсенал и на позицијата шеф за развој и регрутирање на млади таленти во Ајакс од Амстердам.

Дони ван де Бек е уморен од чекање шанса да се пробие во првиот тим на „црвените ѓаволи“. 24-годишниот Холанѓанец веќе бара нов клуб за продолжување на кариерата. Интересно, тој се сврте кон Реал Мадрид, тврдат одредени медиуми во Англија.

Ван де Бек никогаш не можеше да го убеди Оле Гунар Солскјер почесто да биде во составот на Манчестер Јунајтед. Минатата сезона одигра само 19 натпревари во Премиерлигата, а од почетокот на тековната сезона забележа скромни шест минути на теренот. Затоа Холанѓанецот веќе гледа кон излезната врата на „Олд Трафорд“.

Тој му наложи на својот агент да се обиде да договори трансфер во Реал Мадрид. Од друга страна Реал Мадрид имаше интерес за Ван де Бек пред да се пресели во Манчестер Јунајтед. Сега играчот се надева дека интересот сеуште постои. Холанѓанецот верува дека може да се бори за поголема минутажа на „Сантијаго Бернабеу“, особено доколку се оствари планот да си заминат Иско и Дани Себаљос.

Од друга страна, конкуренцијата во средниот ред на Реал Мадрид останува доста сериозна, особено по доаѓањето на Едуардо Камавинга, кој стана миленик на Карло Анчелоти.