Пред нешто повеќе од месец дена, Тотенхем се споменуваше како сериозен конкурент за титулата во англиското првенство. Тимот на Жозе Мурињо не играше најубаво, но беше ефикасен и држеше чекор со водечките екипи во лигата. Но, во последните пет натпревари, Тотенхем победи само на еден и падна на деветтото место со исто толку бодови заостанување зад позициите кои водат во Лигата на шампионите. Тотенхем се мачи, не игра добро, а „Телеграф“ тврди дека позицијата на Мурињо е „раздрмана“ и има четири натпревари да го „разбуди“ тимот. Тој весник тврди дека раководството на клубот веќе го пронајде човекот кој треба да го замени Мурињо и кој често се поврзува со големи клубови. Тотенхем е заинтересиран за Јулијан Нагелсман, а клупските претставници веќе го контактирале германецот кој сакаат да го доведат и пред крајот на сезоната. Нагелсман беше желба и на Челзи по отказот на Лампард, но Нагелсман ја одби понудата.
Единствен кој и понатаму стои зад Мурињо е претседателот на клубот Даниел Леви, што би можело да значи дека португалецот сепак ќе остане до крајот на сезоната, па потоа клубот ќе одлучува што понатаму.

ПСЖ планира да го обнови интересот за дефанзивецот на Арсенал, Хектор Белерин. Според изворот, Белерин сака нов предизвик во друг клуб. Во врска со ова, некои европски клубови, вклучително и ПСЖ, размислуваат за потпишување договор со играчот во текот на летниот преоден рок. Ектор Белерин е потекнува од фудбалската школа на Барселона, но Арсенал го купи Шпанецот за 500 илјади евра летото 2011 година на 16-годишна возраст. Неговиот договор со „Топџиите“ е со важност до 30 јуни 2023 година. Во моментов неговата пазарна вредност се проценува на 28 милиони евра.

Анхел ди Марија влезе во последната година од договорот со ПСЖ и на лето би можел да си замине како слободен агент. Англиските медиуми тврдат дека нема најава за продолжување на соработката со „светците“ и дека големи се шансите од следната сезона да се врати во Премиер лигата. Сериозен интерес за Ди Марија покажува Тотенхем, кој веќе стапил во контакт со неговиот агент. Мурињо одлично ги познава неговите квалитети и сака да го донесе во неговиот тим, но сепак се ќе зависи од новиот тренер на ПСЖ, Маурицио Почетино.

Луис Суарез минатото лето беше отпишан од Барселона, а сезонава игра одлично во мадридски Атлетико, водечката екипа на шпанската лига. Суарез во Атлетико го пушти новиот тренер на Барселона, Роналд Куман недолго откако го презеде клубот од Камп Ноу. Уругвајскиот напаѓач, кој неодамна го прослави 34. роденден, во интервју за Франс Фудбал изјави дека не разбира зошто Барселона се одлучи да го ослободи. „Едно нешто најмногу ме погоди – рекоа дека сум престар и не можам да играм на највисоко ниво. Веќе не сметаа на мене, а заслужив почит. Не ја разбирам нивната одлука. Би сфатил доколку ме бркаат по три-четири сезони доколку не покажам ништо, но јас постигнував повеќе од 20 голови по сезона. Само Лионел Меси беше статистички подобар од мене. Заслужив повеќе респект и не го заслужив тоа однесување од клубот.“ – изјави Суарез. „Најтешко ми беше да заминам поради семејството. Шест години беа во Барселона, имаа пријатели, навики… меѓутоа, постои и позитивна страна – среќен сум што не сум во клуб во кој не ме сакаат. Среќна е и фамилијата поради мене и тоа е тоа што е најважно.“ – вели уругваецот. Многумина беа изненадени од неговото заминување во Атлетико. „Зошто го одбрав Атлетико? Сакав да и докажам на Барселона дека греши и дека можам да играм на највисоко ниво. Никогаш не сум се откажал, па нема ни сега.“ – вели популарниот „Пистолеро“. Суарез сезонава во Примера одигра 20 натпревари на кои постигна 16 погодоци, а со Меси е најдобар стрелец во лигата.

Милан во летниот преоден рок сака да донесе лев бек, кој ќе биде алтернатива за Тео Хернандес. Прв на листата желби е Нуно Мендеш. 18-годишниот дефанзивец е младински репрезентативец на Португалија и важи за еден од најголемите таленти во Европа. Мендеш може да игра како лев бек и како стопер, а за него интерес покажуваат многу европски гиганти. Сепак, овој трансфер е тежок за реализација бидејќи Спортинг бара да биде платена откупната клаузула која изнесува 45 милиони евра. Втор на листата желби е левиот бек на Сантос, Матијас Виња. Уругваецот со своите одлични настапи во Копа Либертадорес го привлече вниманието на многу европски клубови, а неговата цена е околу десет милиони евра.

Кристијано Роналдо постигна два погодоци во победата на Јувентус од 3:0 на домашен терен против Кротоне во рамки на 23. коло од Серија А. Вториот погодок беше чудесен, а со првиот влезе во историјата. Со него, Роналдо постигна погодок и против 18. клуб кој игра во Серија А сезонава, што значи дека досега ниту еден клуб не успеа да остане неказнет од португалецот. Освен тоа, Кротоне е дури 78. клуб од петте најсилни лиги во Европа против кој Роналдо постигнал барем еден погодок. Колку и да е оваа бројка на негови „жртви“ во најсилните лиги импресивна, сепак тој не е „најубиствен“. Таа титула му припаѓа на швеѓанецот Златан Ибрахимовиќ, кој постигнал барем еден погодок против 79 клубови од петте најдобри лиги во Европа.

Тимо Вернер дојде како големо засилување во Челзи, но не ги оправда очекувањата.
На 24 натпревари во Премиер лигата постигна само пет голови, а за германските медиуми ја прокоментира целата ситуација.
„Кога имате ваква лоша серија не ве сметаат за добар напаѓач. Во Англија се игра најтешкиот фудбал. Тоа е најдобрата и најсилната лига во светот. Тешко е да се игра против сите екипи. Ме спуштија на земја, но мене ми е да работам и да ги надополнам недостатоците“, изјави Вернер.

Манчестер Сити се вклучил во трката по плејмејкерот на Сасуоло, Мануел Локатели. Италијанецот кариерата ја започна во Милан, важеше за голем талент, но „росонерите“ не му веруваа и го продадоа на Сасуоло за 12 милиони евра.
Плејмејкерот го покажа својот потенцијал во Сасуоло и сега е стандарден член на италијанската репрезентација.
Локатели е голема желба на Андреа Пирло, кој се обидува да го донесе во Јувентус, но сега доби силна конкуренција.
Манчестер Сити веќе стапил во контакт со неговиот агент и сака да го донесе Италијанецот на „Етихад“, па веќе спремиле понуда од 40 милиони евра.