Фудбалерите на Академија Пандев и Силекс со почеток од 19.00 часот ќе ги одмерат силите во финалето од Купот на Македонија. Натпреварот меѓу овие две екипи ќе се одигра на Националната арена „Тодор Проески”.
Тренерот на Академија Пандев, Александар Васовски вели дека неговите фудбалери се максимално фокусирани и подготвени за овој натпревар, очекува добра игра од своите фудбалери и освојување на пехарот.
„Одлично сме подготвени за овој натпревар, се надевам дека и втора година по ред Академија Пандев ќе биде тимот што ќе го освои трофејот. Тоа е наша цел. Шансите се подеднакви за двете екипи. Очекувам да се претставиме во добро светло, се надевам на добра игра и победа.“
Фудбалерот на Академија Пандев, Ѓорѓи Стоилов се надева на победа и освојување на пехарот.
„Играме против противник кој заслужува почит. Ја анализиравме играта на Силекс, подготвени сме за овој предизвик, и се надевам дека повторно ќе се радуваме на победа и освојување на трофеј во купот.“
Тренерот на Силекс, Горан Симов вели дека е време по 24 години пауза, пехарот да се врати во Кратово.
„Се надевам дека по пауза од 24 години, ќе успееме да го освоиме трофејот. Шансите и на двете екипи се подеднакви, во прашање е еден натпревар и се е можно. Добро го анализиравме противникот и подготвени сме за ова финале.“
Капитенот на Силекс, Ангелчо Тимовски се надева дека победникот на овој меч ќе биде решен во регуларниот дел.
„Финалето е посебна инспирација и мислам дека и двата тима имаат еднакви шанси. Лично, посакувам финалната пресметка да се реши пред евентуално изведување пенали”.

Сопственикот на Манчестер Сити, Шеикот Мансур, ќе ги покрие трошоците на фановите кои ќе го поддржуваат тимот во Португалија во финалето од ЛШ. Финалето беше преместено од Истанбул во Порто, па двата финалисти добија по 6.000 билети за своите фанови. Натпреварот ќе се одигра на 29-ти мај.
„Пеп и тимот одиграа фантастична сезона. Пласманот во финалето од Лигата на шампиони претставува историски момент за клубот. Затоа е многу важно колку што може повеќе фанови да присуствуваат на тој специјален меч. Особено тие кои го поддржуваат Манчестер Сити многу години во добро или лошо“, изјави сопственикот на Сити.

Кристал Палас денес и официјално потврди дека Рој Хоџсон ќе го напушти „Селхуст парк“ на крајот од сезоната.
Поранешниот селектор на Англија помина четири години во клубот каде што ја започна својата фудбалска кариера во минатата. Оваа сезона „орлите“ се на чекор да завршат на 14. позиција како и минатата сезона.
Сега следи потрагата за нов тренер, а се издвојуваат две имиња. Тоа се Френк Лампард и Крис Вајлдер.
Лампард остана без ангажман откако Тухел го замени во јануари, додека Вајлдер го напушти Шефилд кон средината на март.

Желбата на Хари Кејн да ја промени средината го примора Тотенхем да бара нов врвен напаѓач. Тотенхем како евентуална замена за Кејн посочил двајца фудбалери од Манчестер, Габриел Жесус од Сити и Марсијал од Јунајтед.
Вчера сите бритинаски медиуми пренесоа дека Кејн побарал трансфер од раководството, откако Тотенхем и оваа година остана без трофеј.
Тотенхем сигурно нема лесно да го пушти голгетерот и ќе бара најмалку 100 милиони евра. Во Жесус и Марсијал гледаат идеална замена со оглед на фактот дека се млади и имаат искуство во Премиер лигата.

Лион не се откажува од Лигата на шампионите, имаат само бод помалку од Монако кој е трет, а Депај и соиграчите ја дочекуваат Ница на домашен терен во последното коло, додека Монако гостува кај Ленс. Руди Гарсија веќе донесе одлука да си замине на крајот од сезоната. Лион веќе некое време активно бара замена за поранешниот тренер на Рома, се споменуава Галтие од Лил и Гаљардо од Ривер Плата, меѓутоа клубот би можел да го пронајде решението во своите редови. Жунињо Пернамбукано би можел да биде новиот тренер на Лион, доколку не се оствари соработка со некој од споменатите тренери. Бразилецот се врати во Лион во 2019. година, во моментот е спортски директор на клуобт, а наскоро би можеле да го видиме и покрај теренот, доколку се вистинити шпекулациите на француските медиуми. Кралот на слободните удари се повлече во 2013. година од активниот фудбал, а би било интересно да го видиме и покрај теренот.

Репрезентативецот на Холандија, Мемфис Депај на крајот од оваа сезона извесно е дека ќе го напушти Лион со кој му истекува договорот во јуни и најверојатно ќе ја прифати понудата од Барселона. Поранешниот напаѓач на Манчестер Јунајтед, подолго време се поврзува со преселба во Шпанија но и во Италија, а тој на социјалните мрежи реши да испрати порака до неговите фанови поврзана со следните чекори. „Време е да ја преземам контролата над мојата кариера. Дојдов до точка кога треба да направам важен избор за својата иднина и решив да преговарам за моите идни зделки со мој тим на лица на кои им верувам поддржан од правни експерти. Јас сам ќе одлучам за мојата следна дестинација. Вие први ќе дознаете.“ – вели Депај.

Кирон Трипие е интересен за Манчестер Јунајтед и Евертон, објавија медиумите на Островот. Англичанецот потекнува од Манчестер Сити и играше за Тотенхем од 2015 до 2019 година. Дефанзивецот играше и за Барнли и Барнсли, а за клубот од Мадрид игра од 2019 година. Оваа сезона, 30-годишниот Трипие одигра 34 натпревари за Атлетико, на кои забележа шест асистенции. Според порталот Трансфермаркт, вредноста на играчот е 20 милиони евра. На едно коло пред крајот на шпанскиот шампионат, Атлетико е на првото место со 83 бода и е со два бода предност пред најблискиот ривал – Реал Мадрид. Атлетико ќе го одигра својот последен натпревар во сезоната на гости кај Ваљадолид на 22 мај.

Напаѓачот на Сасуоло, Џакомо Распадори го доби првиот повик за италијанската репрезентација. 21-годишниот фудбалер е дел од прелиминарниот состав на Италија за Европското првенство ова лето. Селекторот Роберто Манчини го објави списокот на своите избраници од кои седум фудбалери ќе бидат елиминирани на конечниот список од 26 играчи, кој мора да биде објавен до 1 јуни. Распадори е во одлична форма и постигна четири гола на последните пет натпревари во Серија А. Тренинг кампот на Италија ќе биде активен од 24 мај, а првата контрола пред Евро 2020 е против Сан Марино на 28 мај во Каљари. Последната проверка пред почетокот на Европското првенство е против Чешка на 4 јуни во Болоња. Италија на ЕП е во група со репрезентациите на Турција, Швајцарија и Велс.

Во Барселона одлучиле да го отпуштат тренерот Роналд Куман на крајот на сезоната, објавија медиумите во Каталонија. Според истите извори, оваа одлука е донесена по поразот на тимот во мечот од 37. коло на шпанскиот шампионат со Селта (1-2). Со поразот на оваа срдба, Барселона ги загуби шансите за шампионската титула. Тимот е на третото место на табелата со 76 поени. Исто така објавено е дека Куман има шанса да ја задржи функцијата главен тренер само доколку раководството на Барселона не може да најде достојна замена за него. Претходно беше објавено дека Барселона разгледува тројца кандидати во случај на разделба со Куман. Во потесниот избор влегуваат тренерот на Барселона Б, Чави Гарсија Пимиента , поранешниот играч на клубот кој е на чело на катарскиот Ал-Сад, Чави и холандскиот тренер во Ајакс, Ерик Тен Хаг.

Поранешниот младинец на Вардар, а потоа првотимец на Беласица, Бесар Гуџуфи верува дека одлуката да ја прифати понудата за трансфер во турски Бешкиташ е правилна и ќе му донесе развој во неговата фудбалска кариера. „Многу сум среќен што дојдов во најквалитетниот тим во Турција. Од денеска ќе имам само една цел. Ќе се обидам да бидам се подобар и подобар од натпревар во натпревар и верувам дека ќе постигнеме добри резултати заедно.“ – посочи Гуџуфи. Гуџуфи со Бешикташ потпиша петгодишен договор со неделна плата од 8000 евра, а Беласица од трансферот заработи 480 000 евра. Гуџуфи е еден од најголемите таленти, македонски младински репрезентативец и голема иднина, кој во Турција го гледаат како „новиот Елиф Елмас“.