Филип Гачевски би можел да направи трансфер во Турција.

Гачевски во овој момент брани во Кипар во екипата на Енозис која испадна во втората лига во ова првенство. Сега според турските медиуми интерес за македонскиот голман покажал Коачелиспор. Се наведува дека трансферот е блиску до реализација, меѓутоа се додава дека и Бурсаспор покажала интерес. Коачилспор игра во турската втора лига.

Во редовите на Енозис Гачевски пристигна минатото лето после распадот на Вардар, претходно пет години го носеше дресот на најтрофејниот македонски клуб.

Директорот на Сасуоло, Џовани Карневали изјави дека во моментов поголеми се шансите Локатели да биде продаден во странство, отколку во клуб од Серија А.

Јувентус е силно заинтересиран за Локатели, но „старата дама“ не е во можност да ја плати сумата од 40 милиони евра која ја бара Сасуоло.

„Преговараме за Локатели со еден клуб од странство. Преговорите се веќе во напредна фаза. Во следните денови ќе имаме средба со Јувентус, но се уште нема никаков напредок во преговорите со нив. Сите италијански клубови се наоѓаат во многу тешка ситуација“, изјави Карневали.

Иднината на Лука Јовиќ во Реал Мадрид е неизвесна, откако напаѓачот се врати во Мадрид после позајмицата во Ајнтрахт.

23-годишниот напаѓач се надева да остане во Реал Мадрид и да го убеди новиот тренер Карло Анчелоти да му даде шанса. Јовиќ категорично одбива да биде испратен на нова позајмица. Тој верува дека кај Анчелоти ќе има поголеми шанси за настап, зошто Италијанецот го сакаше кога седеше на клупата на Наполи.

Јовиќ пристигна во Реал во 2019 година за 60 милиони евра, но не ги оправда очекувањата, а и не добиваше голема шанса кај Зидан.

Самби Локонга ќе биде ново засилување за Арсенал, пренесуваат медиумите на Островот.

21-годишниот играч за врска може да игра на сите позиции во средниот ред и веќе дебитираше за белгиската репрезентација. Локонга оваа сезона настапи на 31 меча за Андерлехт на кои постигна 3 гола и запиша 3 асистенции, а скаутите на многу европски гиганти го следат веќе подолго време.

Арсенал успеа да ја победи конкуренцијата и веќе го договорил неговиот трансфер. „Топџиите“ за неговиот потпис на Андерлехт ќе му платат 21 милиони евра со вклучени бонуси.

Канадскиот клуб од американсаката МЛС лига, после само пет месеци го продаде напаѓачот Ерик Хуртадо затоа не сакал да се вакцинира против КОВИД-19.

ЦФ Монтреал не ја донел таа одлука поради клупската политика или интерни правила, туку затоа што Хуртадо едноставно не може да игра за тој клуб.

Поради строгите канадски пост-епидемиски мерки, долго не беше возможно да се влезе во земјата без период минат во карантин, што го оневозможи нормалното функционирање на бројни американски клубови кои се натпреваруваат во МЛС лигата. Поради тоа тимот мораше привремено да се пресели во САД, но Онтарио и Квебек сега почнаа да ублажуваат мерките, па на клубовите од Торонто и Монтреал дозволено им е да тренираат во границите на Канада. За мечеви се уште нема одлука.

Меѓутоа, дозвола за враќање во Канада добија само играчи кои се вакцинирани, а Хуртадо одбива да го направи тоа. Бидејќи тој веќе не може да тренира со тимот, на Монтреал не му остана ништо друго, па за 200.000 долари го продаде во Колумбус Кру.

Хуртадо во Монтреал пристигна во февруари како слободен играч, но одигра само седум натпревари, последниот во мај.

Португалскиот фудбалски великан Бенфика го именуваше својот поранешен фудбалер Руи Коста за нов претседател на местото на Луис Филипе Виеира, кој заврши во притвор поради наводни даночни измами и перење пари.

Коста досега беше потпретседател на клубот, а новата функција ја презеде откако доби едногласна поддршка од сите членови на одборот на Бенфика.

„Времињата се доста предизвикувачки, но сакам силна Бенфика. Клубот ќе го водам со гордост, страст и посветеност како првиот пат кога го облеков дресот на Бенфика.“ – изјави Коста.

„Свесен сум за одговорноста која ја презедов и што се очекува од мене. Нашиот приоритет се подготовките за новата сезона, во која влегуваме со големи амбиции. Сакам силна, соединета Бенфика и секојдневно ќе работам на тоа.“ – заклучи Коста.

Лионел Меси во моментов е слободен играч откако му заврши договорот со Барселона минатиот месец.

Во моментов Барселона не може да го потпише новиот договор бидејќи има сериозни финансиски проблеми. Преговорите со агентите на Меси течат добро, но за договорот да биде потпишан, Барселона најпрво ќе мора драстично да ги намали расходите за плати.

Тренерот на Барселона, Роналд Куман призна дека е загрижен за иднината на Меси, но сепак му верува на претседателот Лапорта кој прави се за да го задржи Аргентинецот.

„Кога се не е завршено, мора да бидеме загрижени. Сепак, јас имам верба во претседателот и тој ме уверува дека ќе ја реши оваа тема. Многу е важно за Барселона, но и за Ла Лига останувањето на Меси. Јас не сум инволвиран во преговорите, но му верувам на Лапорта“, изјави Куман.

Селекторот на Бразил Тите одржа прес конференција за медиумите пред финалето на Копа Америка кое се игра сабота према недела вечер.

Финалето ќе се одигра на Маракана, а Тите на новинарите им порача дека има план како да го сопре Меси, но дека истиот нема да го открие.

„Знам како да го сопрам Меси, но нема да ви кажам. Не можеме потполно да го изгасиме, но можеме да го намалиме неговото влијание на играта“– кажа Тите.

Потоа, се осврна на споредбата меѓу Нејмар и Меси.

„Кога говориме за Меси и Нејмар, тогаш говориме за највисоко ниво на фудбалската игра. Двајцата се посебно, но јас сакам мојот тим да биде таков и тоа да пресуди.“

Властите во Рио де Жанеиро дозволија враќање на дел од навивачите на финалето од Копа Америка помеѓу Бразил и Аргентина, кое се игра вечерта сабота кон недела на стадионот Маракана.

Локалните власти дозволија 10 отсто од капацитетот на стадионот Маракана, што изнесува 7.800 гледачи. Тоа ќе биде прв натпревар со гледачи на овогодинешното издание на првенството на Јужна Америка, кое се одржува во Бразил.

Одлуката се темели на тоа што организаторите претставија протокол за „работа и акредитација кој донесува мерки за заштита на здравјето на вклучените, користејќи алатки за спречување на заразата и ширењето на КОВИД-19“, стои во соопштението на градските власти.

На трибините ќе можат само оние со негативен тест на коронавирус кој е направен најдоцна 48 часа пред натпреварот. Пандемијата на КОВИД-19 во Бразил однесе повеќе од 530 илјади животи, а од нив околу 30 илјади во Рио де Жанеиро.

Младата репрезентација на Македонија (генерација 2007 ) загуби од соодветната селекција на Босна и Херцеговина во рамките на меморијалниот турнир „Јосип Каталински – Шкија”.

На тренинг центарот во Зеница, избраниците на селекторот Драган Начевски загубија минимално со 2:1. Противникот одлично го започна натпреварот, искористи невнимание во нашата одбрана и рано уште во 3. минута поведе со 1:0. Стрелец на водечкиот гол беше Андреј Мичиќ. Преку Стефан Младеновски, Македонија успеа да го израмни резултатот.

Во продолжението Босна и Херцеговина подобрата игра ја круниса со втор погодок во нашата мрежа. Фарис Џефахири во 68. минута погоди за предност на противникот од 2:1. Воедно тоа беше и конечниот резултат на денешната средба

Македонија (генерација 2007):Давид Илоски, Окан Ракипи, Милош Спасовски, Даим Кадриовски, Игли Хасани, Хисар Али, Горазд Ристовски, Марко Киш, Александар Грашевски, Стефан Младеновски, Беркај Шаини;

Резерви: Oнур Бешир, Лука Атанасовски, Андреј Мурџевски, Златко Радески, Еранд Зиба, Шефир Мендерез, Каменчо Андоновски, Бобан Кузмановски, Стефан Антонијев;

Предводник: Драган Начевски;