Напаѓачот на нашата репрезентација Александар Трајковски кој беше во стартниот состав на средбата со Австрија, ден по првиот натпревар и поразот на ЕП 2020 (1:3), направи анализа на натпреварот и најави дека овој неуспех не е крај за Македонија на европското првенство.

„Искрено, мислам дека одигравме квалитетни 70 минути и се боревме до крај. Го имавме тој позитивен резултат, а потоа примивме два гола, по, мое мислење, наивно, по еден центаршут и еден аут. Не можам да кажам дека Австријците беа поквалитетни од нас. Ние создававме шанси и игравме наш фудбал, покажавме дека може да играме со секого и ако продолжиме вака и во наредните мечеви ќе дојдеме до поголем резултат. Оваа Македонија нема никогаш да се предаде. Ќе се бориме до крај, па ќе видиме што ќе биде. Многу е убаво да се игра на големо натпреварување. Драго ми е што дојдоа толку луѓе да не бодрат. На крајот криво ми е што немавме позитивен резултат на првиот меч, но ние нема да се откажеме, ќе се бориме да ја минеме првата група и да ги направиме сите горди да излезат на улица“, изјави Трајковски на денешниот брифинг.

Патрик Шик играчот на Баер Леверкузен со два погодока носии предност на Чешка од 0-2 на дуелот против Шкотска што се игра во Глазгов.
Вториот гол е вистинско ремек-дело, со извонреден удар од половина терен го матираше чуварот на мрежата на Шкотите, Дејвид Маршал.
Погледнете:

Со поразот од Холандија од 3:2, Украина го израмни негативниот рекорд од шест порази во низа на Европските првенства.

Украина на тој начин му се придружи на Југославија, која во периодот од 1968. до 1984. година загуби шест натпревари по ред. Најпрво финалето во 1968. од Италија со 2:0, потоа осум години подоцна од Западна Германија 4:2 и Холандија 3:1, а потоа и во групната фаза во 1984. од Белгија 2:0, Данска 5:0 и Франција 3:2.

Украинците на бодови чекаат уште од 2012. година, кога беа домаќини и кога во првото коло ја совладаа Шведска. Потоа беа поразени од Франција, Англија, германија, Северна Ирска, Полска и синоќа од Холандија.

Шанса за прекин на таа низа ќе бараат против нашата репрезентација во четврток.

Енис Барди и покрај проблемите кои ги имаше со ковид-19 пред ЕП сепак доби шанса од првата минута и учествуваше на дебито на македонската репрезентација.

Според него, ништо не е загубено и дека шансите за пласман во следната фаза и понатаму се присутни.

„Мислам дека ова беше добар натпревар за нас. Беше тешко и очекувавме така да биде. Во некои моменти бевме подобри од нив. Тие подобро ги искористија шансите кои ги имаа. Дадовме сè од себе. Мора да продолжиме, имаме шанси до крајот на првенството. Сега треба да се одмориме добро и да видиме каде ни се грешките. Секој противник ни ги анализира слабите точки. Да ги одмориме главите и телото и да мислиме на Украина. Ќе играме за да дадеме повеќе од овој меч. Ни фали малку за да бидеме поопасни во напад. Им благодарам на сите што дојдоа да не бодрат. Тие се дванаесетти играч за нас“, рече Барди по натпреварот со Австрија.

Фудбалската репрезентација на Македонија го одигра својот прв натпревар на ЕП и секако тоа е големо искуство за секој фудбалер кој настапи на оваа средба.

Македонија загуби со 3-1, а капитенот Горан Пандев по натпреварот истакна дека жали затоа што фудбалерите не ги израдувале навивачите кои беа на стадионот во Букурешт со победа.

„Како за првпат, за прв натпревар на Европското првенство, за нас ова е едно големо искуство. Одигравме одлични 80 минути. Австрија физички е многу посилна од нас, имаат добра клупа, знаевме дека ако издржиме во првите 15 минути, можеме да играме против нив. Примивме еден несреќен втор гол, па натпреварот беше решен. Шансите не се загубени, треба добро да се одмориме. Не чека уште еден тежок натпревар против Украина, на кој мора да играме отворено и да одиме на победа затоа што нема што да загубиме. Најмногу ми е жал за луѓето кои дојдоа тука, им благодарам од срце. Ние го дадовме максимумот, се надевам дека ќе бидеме уште подобри“, изјави Пандев по натпреварот.

Елиф Елмас беше еден од фудбалерите кои зборуваше по вчерашниот пораз од Австрија со 3-1, во кој мора да се каже дека навистина не разочаравме. Сепак, на крајот Австријците го добија натпреварот.

„Одигравме добар натпревар, видовме како е да се игра на едно ЕП. Лекција за сите нас и ќе напоменам дека ништо не е загубено. Со добри резултати во следните два натпревари мислам дека ќе ја обезбедиме толку посакуваната втора фаза. Ќе го оставиме овој натпревар за нас и ќе го анализираме следниот противник“, изјави Елмас.

Следниот натпревар Македонија го игра во четврток против Украина.