Тренерот на фудбалерите на Милан, Стефано Пиоли, изјави дека играчот за врска, Исмаел Бенасер се повредил на првиот натпревар од шеснаесеттина финалето во Лига Европа против Црвена Ѕвезда (2-2). Тоа ќе го спречи да учествува на дербито со Интер од 23. коло во Серија А. „Го изгубивме Исмаил, тој има проблеми со мускулите“, потенцираше кратко Пиоли. Бенасер во сезонава запиша 20 натпревари за Милан и направи 4 асистенции. Градското дерби меѓу Милан и „нероаѕурите“ се игра денес од 15.00 часот.

Драган Стојковиќ ќе биде новиот селектор на Србија. Пикси доби документи од Кина со кои се потврдува дека договорот со Гвангжу ќе биде раскинат. Тој ќе биде селектор на Србија во следните два циклуса, во борбата за пласман на Светското првенство во Катар и за следното Европско првенство. Проблемот со неговото именување за селектор на Србија беше во тоа што поранешниот ас на Црвена звезда имаше активен договор со Гвангжу, кој доби голема компензација за раскинување на договорот. Некои пишуваат дека сумата е близу четири милиони евра.

По минатосезонското срамно испаѓање од ЛШ за Барселона (пораз од Баерн Минхен со 8-2), во вторникот Каталонците во својот фудбалски храм доживеаја тежок удар од ПСЖ, 4-1.
И додека се чини дека актуелниот тренер на Барса, Холанѓанецот Роналд Куман се уште ги бара тактичките решенија и не успева да ја „разбуди“ екипата предводена од Лео Меси, шпанските медиуми наголемо пишуваат за Чави Ернандез кој е кормилар на катарскиот клуб Ал Сад. Иако јасно е дека катарската лига не може да се спореди со Ла Лига, сепак шпанските медиуми се погласно шпекулираат дека Чави ќе е наследникот на Куман на жешкото столче на „Ноу Камп“.

„Лисиците“ и оваа сезона играат фантастичен фудбал во Премиерлигата. Тимот на Роџерс е рамноправен во борбата за топ 4, по 24 одиграни кола се наоѓа на третото место со ист број на бодови како и Манчестер Јунајтед (46). Некогашниот шампион прави одлични потези и во трансфер периодите, а сега е ред за уште еден. Новинарот Фабрицио Романо пишува дека Лестер е на прагот на договор со Бубакар Сумаре, фудбалерот на Лил кој со францускиот клуб има договор до 2022. година. Лил, кој во моментот е лидер во француската лига, во јануари веќе го одбија интересот на Манчестер Јунајтед и Њукасл за нивниот фудбалер, а наводно Њукасл понудил сума од 32 милиони фунти. Раководството на Лил најверојатно ќе мора да го продаде одличниот играч за врска, доколку Сумаре не потпише нов договор наскоро.

Нема сомнежи дека Равел Морисон можеше да постигне многу повеќе во својата фудбалска кариера. Англискиот играч за врска беше дел од фудбалската школа на Манчестер Јунајтед, во генерацијата со Пол Погба. Сер Алекс Фергусон во неколку наврати изјавуваше дека Равел е најголемиот талент кој имал прилика да го тренира, но „лудата“ глава на Морисон имаше други планови. Познат по своето непочитување на клупските правила и дисциплината, Морисон никаде не се задржа подолго. После Манчестер, промени уште 11 клубови, а сега има прилика за соработка со Хадерсфилд. Некогашниот премиерлигаш не стои баш најдобро во Чемпионшип, се наоѓа на пет бода од опасната зона. Морисон веќе некое време тренира со нив, а тренерот Корберан не ја отфрла можноста да го регистрираат до крајот на сезоната. Равел е слободен играч откако ја раскина соработката со холандски АДО Ден Хах во јануари.

Дефанзивецот на Шефилд Јунајтед, Џон Еган, ќе биде надвор од терените осум недели поради повредата на прстот, изјави менаџерот на елитниот англиски клуб, Крис Вајлдер. „Тој ќе биде надвор од игра околу осум недели. Потребна му е операција на прстот. Тоа се случи во ситуација кога се обиде храбро да спречи удар. Загубата за тимот е голема”, рече Вајлдер. Тренерот на Шефил потенцираше дека повредените играчи од средниот ред, Џон Флек и Сандер Берге, ќе го пропуштат утрешниот меч со Фулам во елитата на Англија.

Атлетико Мадрид денеска игра со Леванте, тимот кој ги намачи во претходното коло кога одиграа само 1:1. Денеска се среќаваат повторно, но Атлетико сега не смее да се опушта, бидејќи лидерот во шампионатот два пати ремизираше во последните три кола. Сега следи важен период, после Леванте следи мечот со Челзи во Лигата на шампионите, па средбата со Виљареал и дербито на Мадрид против Реал Мадрид, па тука се поставува прашањето што ќе прави Суарез? Уругваецот е на еден жолт картон од суспензија во Примера, а шпанските медиуми наведуваат дека најдобриот стрелец на лигата ќе настапи против Леванте и во таа прилика намерно ќе добие жолт картон, како би „одморил“ против Виљареал, со што нема да го загрози настапот против Реал Мадрид. Ова знаеше често да го прави Серхио Рамос пред важни натпревари, а останува да видиме каков ќе биде договорот на Симеоне и главниот играч на „јорганџиите“.

Скоро извесно е дека Лионел Меси како слободен играч ова лето ќе ја напушти Барселона. Како и минатото лето, кога се пишуваше за негов можен трансфер, главен фаворит за доведување на Меси е Манчестер Сити. Пеп Гвардиола би сакал повторно да соработува со него и Сити е подготвен да понуди голем износ како тоа би го овозможил. Се пишува дека англиските клуб на Меси ќе му даде плата од дури половина милијарда евра на пет години. Поточно, се работи за 496 милиони, што би значело дека годишната бруто плата ќе биде 99,2 милиони, додека месечната 8,3 милиони евра. Сепак, портпаролот на Манчестер Сити за Дејли Мејл ги демантираше тие информации, велејќи дека Сити не е во преговори со Меси и дека никогаш не била испратена понуда за него.

Штутгарт го обнови договорот со тренерот, Пелегрино Матарацо до 30 јуни во 2024 година. 43-годишниот специјалист пристигна кај популарните „шваби“ на крајот на 2019 година и успеа да го однесе тимот во Бундес-лигата. Штутгарт во тековнава сезона е десетти и далеку од зоната за испаѓање. Матарацо е роден во Њу Џерси, а пред да стане тренер играше во пониските дивизии на Германија. Тој пред да го преземе кормилото на Штутгарт му беше помошник на Јулијан Нагелсман во екипата на Хофенхајм.

Според последните информации на англиските медиуми, Хари Кејн сака да го напушти Тотенхем ова лето! Како што можеше и да се претпостави, Кејн е свесен дека мора да го напушти Тотенхем ако сака да се бори за најголемите клупски трофеи – Премиерлигата и Лигата на шампионите, а иако не е познато каде сака да оди, сите веруваат дека Манчестер Сити ќе биде главен кандидат да го доведе. Даниел Леви ја одреди и цената, астрономски 170 милиони евра, што ќе биде убедливо најголемиот „домашен“ трансфер во Англија и трет најскап на светот уште од Нејмар и Мбапе, за кои ПСЖ плати 222 и 180 милиони евра. Кејн ќе полни 28 години, се наоѓа во најдобриот период од неговата кариера, а јасно е деак со Тотенхем нема да успее да испише историја како најдобар напаѓач во Премиерлигата и Европа. Истовремено, се појави информација и за евентуален „наследник“ на Кејн во Тотенхем, прв на листата е Доминик Калверт-Луин, кој се наметнува и како најлогично решение, а тука е и Дени Ингс од Саутемптон. И двајцата имаат одлични сезони во Евертон и Саутемптон, но прашање е дали можат да го достигнат нивото на Кејн, но сигурно е дека се достојни имиња да се обидат да го заменат.