Францускиот напаѓач Анж Јоан Бони е нов фудбалер на Интер, објави попладнево италијанскиот гигант.

Според италијанските медиуми, трансферот е вреден 23 милиони евра.

Бони доаѓа во Интер од редовите на Парма и беше еден од клучните играчи минатата сезона.

Францускиот репрезентативец до 21 година во својата дебитантска сезона во Серија А одигра 37 натпревари во дресот на Парма и постигна шест голови.

Бони е 37 француски фудбалер во клупската историја на Интер.

Интер во Бони го донесе третото летно засилување за новата сезона по Петар Сучиќ од загрепски Динамо и Луис Енрике од Марсеј.

Англискиот дефанзивец Кајл Вокер ги напушти редовите на Манчестер Сити и од следната сезона ќе го носи дресот на премиерлигашот Барнли.

Барнли не ја прецизираше вредноста на двегодишниот договор, но англиските медиуми јавија дека Вокер ја смениl клупската средина за пет милиони фунти.

„Воодушевен сум што сум тука. Кога разговарав со Скот (Паркер) и слушнав за неговите планови за следната сезона, тоа беше можност што ја искористив веднаш. Тој заврши неверојатна работа тука, враќајќи го клубот во Премиер лигата, а сега заедно се радуваме на настапите во најсилната лига во светот“, изјави Вокер.

Англискиот десен бек го носеше дресот на Манчестер Сити од 2017 година и оттогаш одигра вкупно 319 натпревари за клубот.

Со Манчестер Сити освои шест титули во Премиер лигата, четири во англискиот Лига Куп, по две во ФА Купот и Комјунити Шилд, и по една во Лигата на шампиони, Светското клупско првенство и европскиот Суперкуп.

Барселона сака да го донесе Дензељ Думфрис, но во моментот не може да си дозволи трансфер на одбранбениот играч на Интер Милано поради своите финансиски ограничувања, известува Мундо Депортиво.

Репрезентативецот на Нидерланд, кој има 29 години, одлично се вклопува во шемата на шпанскиот шампион, но клаузулата за неговото откупување изнесува 25 милиони евра. Оваа сума е превисока за Барса.

Дензељ Думфрис има договор со Интер до крајот на сезоната 2027-2028. Бранителот премина од ПСВ Ајндховен кај “неразурите” во 2021 година. Раководството на Каталонците сака да донесе уште еден голман и крило

Јувентус и официјално го потврди својот нов голем трансфер – канадскиот напаѓач Џонатан Дејвид е нов играч на “Старата дама”. 24-годишниот голгетер доаѓа од редовите на Лил и со клубот од Торино потпиша петгодишен договор, кој ќе трае до 30 јуни 2030 година.

Дејвид, кој е роден во Бруклин (САД) од родители од Хаити, пораснал во Отава, Канада, пред на 17-годишна возраст да се пресели во Европа во белгискиот Гент.

По две импресивни сезони во Белгија, каде што стана и најдобар стрелец во лигата, во 2020 година направи трансфер во Лил и стана еден од најдобрите напаѓачи во француската Лига 1.

За тренерот на Атлетико Мадрид, Диего Симеоне, летниот трансфер период се сведува главно на едно име – станува збор за стоперот на Тотенхем, Кристијан Ромеро, објавија шпанските медиуми. Аргентинскиот репрезентативец има договор со „Спарс“ до јуни 2027 година и лондонскиот клуб бара за него 70 милиони евра отштета.

Преговорите помеѓу двата клуба траат веќе некое време, а медиумите тврдат дека „Колчонерите“ се подготвени да го платат тој износ. Атлетико нуди 55 милиони евра и уште 15 милиони во потенцијални бонуси. Минатото лето, Атлетико донесе од Манчестер Сити играч на цена од 75 милиони евра, Хулијан Алварез, што се покажа како правилна одлука, бидејќи аргентинскиот голгетер постигна веќе 29 голови и седум асистенции во својата прва сезона.

И додека Алварез е клучен играч во нападот на Атлетико, Ромеро би требало да биде столбот на одбраната. Неговото доаѓање силно го поддржуваат претседателот на клубот, Енрике Серезо, и извршниот директор, Гил Марин. Ромеро е во Тотенхем од август 2022 година, а дојде од Аталанта во трансфер вреден 52 милиони евра.

Марио Илиевски има нов клуб. Македонскиот напаѓач ја продолжува интернационалната кариера и од Бугарија се сели во Косово, каде потпиша со Приштина.

Клубот денеска ја потврди соработката, а Илиевски по промоцијата изјави:

„Среќен сум што доаѓам во клуб како Приштина. Ќе дадам сè од себе на секој натпревар, целта е титула и настап во Европа.“

Илиевски има 23 години, настапуваше за сите младински селекции на Македонија, а има и еден меч за сениорскиот состав. Претходно играше за Вардар Неготино, Септември Софија, Тиквеш, Кисварда и ЦСКА Софија.

Челси со 2-1 го совлада Палмеирас и се пласираше меѓу четирите најдобри на Светското клупско првенство.

Англискиот тим рано го отвори резултатот, Палмер постигна гол уште во 16. минута за водство на Челси од 1-0.

По осум минути игра во второто полувреме Естевао го изедначи резултатот на 1-1.

На седум минути до крајот Вевертон си постигна автогол по кој Челси се израдува на победа од 2-1 и пласман во полуфиналето.

Во полуфиналето Челси ќе игра против Флуминенсе кој со 2-1 претходно го елиминираше Ал-Хилал.

Фудбалерот на Галатасарај, Николо Заниоло е казнет со 15.000 евра, откако во мај кога играше за Фиорентина како позајмен играч, присуствуваше на полуфиналниот натпревар од младинската лига меѓу тимот од Фиренца и Рома и направи инцидент.

По натпреварот, тој влегол во соблекувалната на Рома, каде што се случил конфликт по што Заниоло беше обвинет дека удрил двајца млади играчи. Самиот играч го негираше, но одлуката на комисијата е дека треба да плати казна од 15 илјади евра, со предупредување дека ако повторно ги прекрши правилата, ќе се соочи со посериозна казна.

Фиорентина веќе одлучи да не ја искористи опцијата за купување на играчот од Галатасарај.

Фудбалскиот клуб Сараево денес потврди дека Крсте Велкоски се вратил во клубот како технички директор.

Македонецот го носеше дресот на Сараево во два наврати, а го напушти Кошево во летото 2022 година кога се врати во Македонија.

Прво играше за Работнички, а потоа и за Македонија.

„Во својата нова улога како технички директор, Крсте ќе биде клучната врска помеѓу спортскиот директор, стручниот штаб на првиот тим и Академијата на ФК Сараево. Неговата задача ќе биде стратешки да ги поврзе сите сегменти од спортскиот развој на клубот, од младинските селекции до сениорскиот тим, со цел да се изгради јасна, препознатлива и долгорочно одржлива спортска филозофија“, објавија од Сараево и додадоа.

„Исто така, Велкоски ќе биде задолжен за соработка со играчите кои доаѓаат во ФК Сараево, со цел да им помогне да се адаптираат и да го разберат клубот и заедницата во која доаѓаат. Како човек кој изградил длабоки врски со ФК Сараево и неговите навивачи, Велкоски е пример за сите идни играчи.“

Велкоски првпат пристигна во Сараево на почетокот на 2014 година од Работнички. Две години подоцна замина во Јужна Кореја во Инчеон Јунајтед.

Поранешниот фудбалер на Арсенал, Томас Парти, официјално е обвинет за пет обвиненија за силување и едно обвинение за сексуален напад врз три различни жени.

Обвиненијата се однесуваат на настани што се случиле помеѓу 2021 и 2022 година, пишува „Дејли меил“.

Репрезентативецот на Гана, чиј договор со Арсенал истече на 1 јули 2025 година, официјално ќе се појави пред Судот за прекршоци во Вестминстер на 5 август.

Ова сигурно ќе му го отежни наоѓањето нов клуб, ако воопшто продолжи да игра фудбал, по силните обвинувања што се упатуваат против него.

Истрагата започна во февруари 2022 година, кога една од жртвите ја започна „лавината“.

Подоцна ѝ се придружија уште две жени, кои презентираа докази врз основа на кои Обвинителството официјално покрена обвинение против Парти.

„Разбираме дека оваа вест ќе предизвика силни реакции. Наш приоритет останува да ги поддржиме жените кои имаа храброст да се јават“, рече инспекторот Енди Ферфи.

Парти играше за Арсенал во последните четири години, имајќи 130 настапи и постигнувајќи девет гола. Претходно поголемиот дел од својата кариера го помина во Атлетико Мадрид.