Серхио Рамос е слободен агент откако му истече договорот со ПСЖ и се уште нема нов клуб.

Се поврзуваше со трансфер во Интер Мајами во МЛС, потоа со богатите саудиски клубови, но тој сака да остане во Европа. Силен интерес за него покажува турскиот шампион Галатасарај, кој веќе почнал преговори со неговиот агент.

Галатасарај игра во Лигата на шампиони, гради сериозен тим и Рамос е спремен да ја прифати понудата и да се пресели во Турција.

Манчестер Сити му понудил 70 милиони фунти на Вест Хем за играчот од средниот ред Лукас Пакета, тврди „Глобо“, а пренесоа англиските медиуми.

Фабрицио Романо потврдува дека интересот на европскиот шампион за Бразилецот е многу специфичен и тој се наоѓа на трансфер листата на Пеп Гвардиола. Двата клуба ќе имаат директни разговори оваа недела. Сепак, преговорите нема да бидат лесни за „граѓаните“, бидејќи Вест Хем веќе го продаде Деклан Рајс на Арсенал, а Дејвид Мојс нема да сака да го загуби својот втор клучен играч во средниот ред. Токму поради оваа причина се очекува лондончани да ја одбијат споменатата прва понуда од Манчестер Сити.

„Чеканите“ го потпишаа Пакета пред само една година од Олимпик Лион кога за него платија 53 милиони фунти. Бразилецот имаше многу силна дебитантска сезона и забележа 41 настап во сите натпреварувања, постигна пет гола и имаше седум асистенции.

Тренерот на фудбалерите на Бетис, Мануел Пелегрини, пред стартот на новата сезона остана без услугите на  играчот од средниот ред, Вилијам Карваљо, кој се повреди на пријателскиот меч со Севилја.

„Зелено-белите“ во првото коло во Примера ги чека гостување кај Вилјареал, потоа се домаќини на Атлетико Мадрид а во третото имаат уште едно тешко гостување кај Атлетик Билбао.

Во најдобар случај, Карваљо би можел да биде достапен за пресметката со Рајо Валјекано или за мечот со Барселона.

Репрезентативецот на Шведска, Јенс Каjусте, потпиша договор со италијанскиот шампион Наполи за наредните пет години со плата од еден милион евра по сезона.

Фудбалерот се пресели на Апенините од екипата на Ремс. Неговиот трансфер вреди 12 милиони евра.23-годишниот играч од средниот ред помина година и половина во францускиот тим.

Каусте забележа 42 натпревари со 6 голови и 1 асистенција. Тој има 15 средби за репрезентацијата на „викинзите“.

Милан претстави осум летни засилувања во досегашниот тек на летниот преоден рок и се истакна како најактивен италијански клуб, но тоа автоматски значеше дека ќе нема место за некои првотимци од минатата сезона.

Паоло Малдини си замина од клубот пред стартот на летниот преоден рок, а неполни два месеци подоцна, Милан ги договори и последните детали за заминувањето на Де Кетелар.

Белгиецот оваа вечер ќе отпатува за Бергамо и утре наутро ќе ги мине медицинските прегледи, по што ќе се претвори во второ големо летно засилување за „божицата“.

Јувентус не се расфрла со пари во овој актуелен летен преоден рок и досега позвучно име кое го донесе е само Тимоти Веа, но вечерва се пофали и со ангажман на талентиран стопер кој блескаше на младинското Светско првенство кое се одигра ова лето.

Факундо Гонзалес е ново засилување за клубот од Торино и тој доаѓа од редовите на шпанска Валенсија, каде мина четири сезони во младинскиот тим на „лилјаците“.

Уругваецот не доби шанса да настапува за првиот тим и такво нешто ќе бара во Јувентус, каде на него гледаат како голем фудбалски потенцијал кој во Италија може само да напредува поради фактот што се работи за дефанзивец.

Јувентус го претстави младиот Факундо како талентиран и модерен дефазивец кој најдобрите изданија ги имаше на младинското светско првенство, а позитивна вест е што за неговиот трансфер е издвоена смешна сума.

Микел Артета ќе има далеку поширока клупа во новата натпреварувачка сезона со засилувањата кои ги донесе во летниот преоден рок, а Каи Хаверц ќе биде играчот кој треба да има значајна улога во нападот.

Германецот играше како „лажна деветка“ против Манчестер Сити и одличо одоговори на оваа позиција, но офанзивните квалитети кои ги поседуваат „топчиите“ со играчи како Жезус, Сака, Мартинели и Тросар прави да нема место за Фоларин Балогун.

Напаѓачот кој беше на позајмица во Ремс минатата сезона го сврте вниманието на себе со постигнатиот 21 гол во Франција, а еден од големите клубови кои преговара за него и Интер.

Баерн по само половина година реши да го продаде Јан Зомер, кој вчера и официјално потпиша за Интер, но веќе денеска во Минхен се чешаат по глава поради ваквата одлука бидејќи добија многу лоши вести од лекарскиот тим.

Свен Улрајх ќе биде првиот голман на Баерн до закрепнувањето на Нојер, а од минхенскиот клуб беа сигурни дека ќе бидат потребни само неколку недели, но информацијата која утрово ја доби од лекарскиот тим силно ги погоди.

Билд пишува дека веќе денеска Баерн жали што го продал Сомер бидејќи добил информација дека Нојер нема да се врати на теренот така брзо бидејќи искусниот голман има нови проблеми со коленото.

Нојер мора да оди на операција, а Баерн веруваше дека ќе се врати на теренот за неколку недели, но лекарите рекоа дека закрепнувањето ќе трае неколку месеци и според се, Нојер ќе може да се врати на головите дури на почетокот на следната година.

Кајл Вокер ја донел конечната одлука да остане во клубот, објави познатиот инсајдер Фабрицио Романо на својот Твитер.

Според Романо, во блиска иднина 33-годишниот фудбалер ќе потпише нов договор со „граѓаните“. Претходно беше објавено дека за услугите на Кајл Вокер е заинтересиран Баерн Минхен и лично главниот тренер на Минхен Томас Тухел. За Манчестер Сити, Вокер, кој потекнува од академијата на Шефилд Јунајтед, игра од 2017 година. Со „граѓаните“ пет пати стана шампион на Англија и ја освои Лигата на шампионите.

Во сезоната 2022/2023, Вокер забележа 38 настапи за Манчестер Сити во сите натпреварувања во кои постигна една асистенција. Договорот на играчот со Граѓаните е со важност до крајот на јуни 2024 година. Проценетата цена на фудбалерот, според интернет порталот Трансфермаркт, е 13 милиони евра.

Никола Влашиќ се приклучи на италијанскиот Торино. Ова го соопшти прес-службата на клубот. Претходно, фудбалерот му припаѓаше на лондонски Вест Хем.

Играчот од средниот ред потпиша договор со Торино до 30 јуни 2027 година со опција за продолжување на уште една сезона. Претходно имаше информации дека Италијанците ќе платат 12 милиони евра за трансферот.

Минатата сезона Никола Влашиќ играше за Торино на позајмица. Во италијанската Серија А, Влашиќ одигра 34 натпревари на кои постигна пет гола и постигна шест асистенции. Играчот од средниот ред има и три натпревари во Купот на Италија и две асистенции. 

Фудбалерот одигра шест натпревари за хрватската репрезентација на Светското првенство во Катар 2022 година. Трансфермаркт го цени Влашиќ на 17 милиони евра.