Јувентус оваа сезона беше казнет со 10 бода во Серија А поради финансиски малверзации и заврши на седмото место на табелата.

Со тоа Јувентус избори пласман во Конферециската лига, но УЕФА отвори истрага за целиот случај и на „бјанконерите“ му се закануваше суспензија од европските натпреварувања.

Од Торино побараа сега да бидат казнети за да ја одработат казната следната сезона и да не играат во Конференциската лига.

УЕФА се согласи на таква казна, па следната сезона во Конференциската лига ќе игра Фиорентина на местото на Јувентус. Тоа значи дека „старата дама“ ќе може да игра во Европа во сезоната 2024/25 доколку избори пласман.

Српскиот фудбалски репрезентативец и член на Лацио, Сергеј Милинковиќ-Савиќ, е на чекор до трансфер во Ал Хилал од Саудиска Арабија, пренесуваат италијанските медиуми.

Претседателот на Лацио, Клаудио Лотито, изјави дека би сакал да ја продолжи соработката со српскиот фудбалер, но додава дека нема да го стопира трансферот на Савиќ доколку тој сака да го напушти римскиот клуб.

28-годишниот Србин, има договор со Лацио со важност до 30.јуни 2024.година. Според информациите на медиумите , Ал Хилал е подготвен да му плати на Лацио 40 милиони евра за реализирање на трансферот, а Милинковиќ-Савиќ би добивал 20 милиони евра по сезона.

Ал Хилал минатата сезона го освои третото место во првенството на Саудиска Арабија, а за претстојната сезона како засилувања веќе ги доведоа Рубен Невеш и Калиду Кулибали, а нов тренер на екипата ќе биде Жорж Жезус.

Баерн Минхен е силно заинтересирани за холандскиот репрезентативец и играч на Интер, Дензел Думфрис.

27-годишниот Холанѓанец се етаблираше во еден од најдобрите десни бекови, а одигра одлично и на Мундијалот. Интер е спремен да го продаде доколку пристигне понуда од 50 милиони евра, притоа е заинтересиран за Бенџамин Павар.

Германските медиуми пренесуваат дека Баерн му нуди трампа на Интер и е спремен да го понуди Павар плус одредена сума на пари за потписот на Думфрис.

Галатасарај ќе му плати на ПСЖ солидни 12 милиони евра и ќе го купи Мауро Икарди кој изминатата сезона ја помина како позајмен во турскиот шампионат.

Аргентинескиот фудбалер одигра одлично за Галата и затоа не изненадува одлуката на челниците на тимот да го задржат со перманентен договор.

Напаѓачот ќе остане во екипата од Истанбул во наредните три сезони.

Фудбалерот Гранит Џака, кој деновиве си замина од Арсенал и потпиша за Баер Леверкузен за 25 милиони евра, вели дека почувствувал дека е време за промени.

„Како личност, секогаш ме интересираат нови предизвици. Време е за нешто ново по седум години поминати во северен Лондон. Бундес-лигата не е ново првенство за мене но, клубот е нов“, вели швајцарскиот репрезентативец.

Џака за „топчиите“ одигра 225 натпревари и постигна 17 голови.

ПСВ Ајндховен се пофали со трансферот на Ноа Ланг, што значи сериозно засилување за новата сезона, но и ангажирање на фудбалер кој е производ на младинската академија на најголемиот ривал Ајакс.

Ланг доаѓа од Клуб Бриж, но е поранешен јуниор на Ајакс и фудбалер за кого великанот од Амстердам не најде место во својот тим, дозволувајќи му да замине најпрвин во Твенте, а потоа и во Белгија.

Сега ПСВ го врати Ланг во Холандија за двојно задоволство на своите фанови, а за овој фудбалер ќе плати 15 милиони евра.

Фудбалерите на Англија по трет пат во историјата станаа европски шампиони до 21 година, победувајќи ја Шпанија со 1:0 во финалето одиграно во Батуми, Грузија. Голот вреден трофеј го постигна играчот од средниот ред на Ливерпул, Кертис Џонс, во четвртата минута од судиското надополнување во првото полувреме.

Но, херој на победата беше англискиот голман Џејмс Трафорд, кој во деветтата минута од судиското надополнување на крајот од натпреварот одбрани пенал на шпанскиот капитен Абел Руиз, а потоа и обид на Аимар Ороз, кој беше прво на отфрлена топка.

За најдобар играч на турнирот е прогласен 22-годишниот крилен напаѓач на Њукасл, Ентони Гордон. Тој асистираше за гол против Чешка во групата, постигна гол против Германија во второто коло, а во четвртфиналето постигна гол против Португалија. На почетокот на оваа година Њукасл го донесе од Евертон за 45 милиони евра.

Манчестер Јунајтед нема да го откупи Марсел Сабицер, кој играше како позајмен фудбалер од Баерн Минхен.

Австриецот се врати во Баерн, но јасно е дека за него нема повеќе место на Алијанц Арена, па Баварците го ставија на трансфер листа.

Најсилен интерес за него покажува Рома, која сака да ја искористи ситуацијата и да го доведе на „Олимпико“.

Мурињо е во потрага по квалитетен играч за врска, па верува дека Сабицер ќе биде одлично засилување.

Баерн е спремен да го продаде ова лето за 15 милиони евра, сума која Рома е спремна да ја плати.

Кајл Вокер ова лето ќе го напушти Манчестер Сити, а кариерата најверојато ќе ја продолжи во Баерн Минхен.

Вокер влегува во последната година од договорот, а Гвардиола му порачал дека слободно може да си бара нов клуб.

Силен интерес за него покажува Баерн Минхен, кој веќе постигнал договор со агентот на Англичанецот.

Вокер има договор со Сити до летото 2024 година, а „граѓаните“ за неговата слобода бараат 15 милиони фунти, што нема да биде проблем за Баварците.

Интер го откупи дефанзивецот Франческо Ачерби од Лацио, потврдија од клубот.

Ачерби минатото лето беше исфрлен од тимот на Лацио, па Интер ја искористи ситуацијата и го доведе на позајмица.

Дефанзивецот одигра одлична сезона, па Интер одлучи да го откупи и ја плати сумата која Лацио ја бараше за негова слобода.

Имено, „нероаѕурите“ се согласија да платат 4 милиони евра и да го задржат италијанскиот дефанзивец, кој се етаблираше во клучна фигура на тимот на Инзаги.