Кристал Палас се соочува со растечка неизвесност околу иднината на тренерот Оливер Гласнер, кој наводно нема намера да го продолжи договорот што истекува следното лето. Англиските медиуми пренесуваат дека клубот веќе размислува за наследник, а како сериозен кандидат се споменува тренерот на Хетафе, Хосе Бордалас. Дополнителен притисок донесе и убедливиот пораз од 3 – 0 против Манчестер Сити, кој ја засили т.н. „драма Гласнер“ и ги оголи внатрешните тензии околу амбициите и трансфер-политиката на клубот.

Гласнер остави силен печат од своето пристигнување во Палас во 2024 година, носејќи историски успеси, освојување на ФА Купот токму против Манчестер Сити, како и триумф во Комјунити Шилд. Иако тимот имаше солиден старт на сезоната, зад сцената расте незадоволството поради ограничената поддршка на трансфер-пазарот и нејасната долгорочна визија на раководството. Извори блиски до клубот зборуваат за сè поголем јаз меѓу тренерот и управата, што ја објаснува и раната подготовка за можни промени.

Во потрагата по потенцијален наследник, раководството на Кристал Палас го гледа Хосе Бордалас како практично решение. Тренерот на Хетафе е ценет поради тактичката дисциплина и способноста да извлече максимум со ограничени ресурси. Неговиот договор истекува исто така следното лето, што би ја олеснило евентуалната транзиција. Сепак, неговиот тврд дефанзивен стил значително се разликува од пофлуидниот пристап на Гласнер, што предизвикува поделени реакции кај навивачите и страв од губење на моментумот стекнат во изминатите сезони.

Доколку дојде до разделба, враќање во Германија изгледа како најлогична опција за Гласнер. Клубови од Бундеслигата, како Ајнтрахт Франкфурт, со кого ја освои Лига Европа, или РБ Лајпциг, би понудиле средина со високи амбиции и конкурентност. Иако интерес од Премиер Лигата, на пример од Њукасл, не е исклучен, Гласнер веројатно ќе сака проект што нуди јасна визија и борба за врвот, наместо долготрајно заглавување во средината на табелата.

Челси потврди дека младиот бразилски офанзивец Естевaо добил лесна мускулна повреда и нема да биде во комбинација за претстојниот премиерлигашки натпревар против Њукасл.

Отсуството на 18-годишниот крилен напаѓач од составот за победата од 3-1 над Кардиф во четвртфиналето од Карабао Купот предизвика бројни прашања меѓу навивачите, но тренерот Ензо Мареска по натпреварот ја разјасни ситуацијата.

„Естевaо има мала мускулна повреда. Не е ништо сериозно, но нема да биде подготвен за натпреварот со Њукасл. Ќе видиме за следниот меч, мислам дека тогаш би можел да биде на располагање“, изјави Мареска.

Како најреалистична опција за негово враќање се споменува домашниот натпревар против Астон Вила на 27 декември, доколку рехабилитацијата помине без компликации.

Повредата на Естевaо доаѓа во незгоден момент за Челси, кој се соочува со напорен празничен распоред. Сепак, Мареска изврши значителна ротација против Кардиф, давајќи шанса на млади играчи како Тајрик Џорџ и Џејми Гитенс, додека головите на Алехандро Гарначо и Педро Нето во второто полувреме ја обезбедија победата и пласманот во полуфиналето.

Естевaо настапи од клупата во претходниот дуел со Евертон, а впечатокот беше дека веќе чувствува одреден физички проблем. И покрај турбулентниот период, навивачите на Челси му дадоа силна поддршка на Мареска на гостувањето во Кардиф, скандирајќи го неговото име по, како што самиот рече, „најтешките 48 часа“ пред натпреварот.

Луис Енрике е добитник на наградата „The Best FIFA Men’s Coach“ за сезоната 2024/25, крунисувајќи една исклучителна година на клупата на Пари Сен Жермен. Поранешниот стратег на Барселона и шпанската репрезентација го предводеше ПСЖ до титула во Лига 1, трофеј во Купот на Франција и првиот трофеј од Лигата на Шампионите за клубот.

Со својот препознатлив стил: висок пресинг, контрола на топката и дисциплинирана игра — Енрике го трансформираше тимот во еден од најстрашните во Европа, замолчувајќи ги сомнежите околу реконструкцијата на клубот по заминувањето на Лионел Меси. Особено импресивна беше дефанзивната стабилност: само 22 примени голови во 38 натпревари во Лига 1, показател за неговиот сеопфатен пристап кон играта.

Успесите на ПСЖ беа заокружени со признанието за „The Best FIFA Men’s Goalkeeper“, кое му припадна на Џанлуиџи Донарума. Италијанскиот репрезентативец зад себе има сезона исполнета со клучни интервенции, сигурност и лидерство меѓу стативите.

Донарума запиша 15 „чисти мрежи“ во Лига 1 и имаше решавачки улоги во елиминациската фаза од Лигата на шампионите, вклучително и блескава партија со одбранети пенали против Манчестер Сити. Со процент на одбрани над 82% во сите натпреварувања, тој ги остави зад себе Тибо Куртоа и Давид Раја, потврдувајќи го својот статус меѓу светската елита.

Вечерта беше комплетирана со признанието за најдобар машки фудбалер, кое му припадна на Усман Дембеле. Оваа тројна круна претставува преседан за ПСЖ на доделувањето на „The Best“ наградите, оставајќи ги зад себе гигантите како Манчестер Сити и Реал Мадрид.

Усман Дембеле официјално ја потврди својата доминација во светскиот фудбал, освојувајќи ја наградата ФИФА – Најдобар фудбалер на годината за 2025, со што ја комплетираше престижната двојна круна по освоената Златна топка во септември. Напаѓачот на Пари Сен Жермен во гласањето ги надмина Ламин Јамал од Барселона и Килијан Мбапе од Реал Мадрид, а признанието му беше врачено на свечената церемонија во Доха, Катар.

Гласовите пристигнаа од селектори, капитени, новинари и навивачи од целиот свет, а признанието доаѓа како круна на сезона во која Дембеле блесна во нова улога, како централен напаѓач.

Во сезоната 2024/25, Дембеле забележа 35 голови и 16 асистенции на 53 натпревари, водејќи го ПСЖ до историска тројна круна: Лига 1, Купот на Франција и првата титула во Лигата на Шампионите. Во елитното европско натпреварување постигна осум голови и додаде шест асистенции, меѓу кои и клучни погодоци против Ливерпул и Арсенал.

Со вкупно 14 директни придонеси за голови во Лигата на Шампионите, постави рекорд за француски клуб, а неговите настапи му ја донесоа и наградата играч на сезоната на УЕФА. ПСЖ стигна и до финалето на Светското Клупско Првенство, каде Дембеле постигна два гола, дополнително потврдувајќи ја својата важност во тимот.

Со ова достигнување, Дембеле се најде во одбрано друштво со Лионел Меси и Кристијано Роналдо, станувајќи еден од ретките фудбалери кои ги освоиле и Златната топка и наградата на ФИФА. Тој е и шести Французин во историјата со Златна топка.

На галата во Доха, Дембеле им се заблагодари на соиграчите и стручниот штаб, нагласувајќи дека напорната работа и тимскиот дух биле клучот за успехот. Тој изрази желба повторно да се врати на сцената и во 2026 година, додека ПСЖ се подготвува за Интерконтиненталниот куп против Фламенго.

Неговата трансформација од крилен фудбалер во смртоносен реализатор ги замолкна критичарите и го постави Дембеле како еден од клучните столбови на ПСЖ и француската репрезентација во годините што следат.

ФИФА го објави ФИФПро најдобриот машки тим за 2025 година на свеченоста „The Best FIFA Football Awards“ во Доха, Катар, но наместо пофалби, изборот предизвика лавина реакции и критики меѓу фудбалската јавност.

Тимот е составен од: Џанлуиџи Донарума на голот; во одбраната Ашраф Хакими, Вилијан Пачо, Вирџил ван Дајк и Нуно Мендеш; среден ред Џуд Белингам, Кол Палмер, Витиња и Педри; а во нападот Ламин Јамал и Усман Дембеле.

Најголемо внимание привлече доминацијата на Пари Сен Жермен, кој има дури шестмина претставници во тимот: Хакими, Пачо, Мендеш, Витиња, Дембеле и Донарума (иако во меѓувреме се пресели во Манчестер Сити). Овој избор се поврзува со успехот на клубот во Лигата на шампионите и нормализираниот домашен триумф.

Ливерпул е претставен преку Ван Дајк, додека Барселона има двајца фудбалери: Педри и младиот Јамал. Белингам (Реал Мадрид) и Палмер (Челси), освојувач на Златната топка на Светското клупско првенство, го комплетираат тимот, избран од самите фудбалери врз основа на настапите од август 2024 до август 2025 година.

Реакциите на социјалните мрежи беа жестоки, особено поради изоставувањето на Мохамед Салах, кој ја предводеше Премиер лигата по голови и асистенции, како и на Рафиња, најдобар стрелец и асистент во Лигата на шампионите. Меѓу изоставените се најдоа и Хари Кејн и Жоао Невеш, што дополнително го зголеми незадоволството.

Дел од навивачите го нарекоа изборот на БелингАм „чиста кражба“, имајќи ги предвид колебливите настапи на Реал Мадрид, додека присуството на Палмер беше оспорено поради падот во формата. Особено се дебатираше и за Јамал, за кого критичарите сметаат дека добива признанија повеќе поради потенцијал отколку поради конкретен учинок.

Контроверзијата околу ФИФПро уште еднаш го отвори прашањето дали ваквите награди треба да се темелат на индивидуални бројки, тимски успеси или перцепција меѓу колегите. Додека фудбалерите гласаат според сопственото искуство на теренот, навивачите бараат признание за оние со јасна и мерлива доминација, што ја прави дебатата неизбежна и секогаш жива.

Манчестер Сити е подготвен да разгледа понуди за дефанзивецот Рико Луис пред јануарскиот преоден рок, поради растечката неизвесност околу неговата улога.

Според одредени извори, покрај Луис, напаѓачот Оскар Боб исто така би можел да го напушти тимот на Манчестер Сити оваа зима. Местото на 22-годишникот во тимот моментално е под знак прашалник. Кристал Палас изрази интерес за Норвежанецот, со опција или да го позајми или да го купи.

Луис одигра 12 натпревари во сите натпреварувања оваа сезона, при што имаше две асистенции. Боб одигра 14 натпревари, при што имаше една асистенција.

Поранешниот играч на Јувентус и сегашен селектор на репрезентацијата на Узбекистан, Фабио Канаваро, зборуваше за шансите на „старата дама“ да ја освои Серија А оваа сезона.

„Тие се малку зад своите ривали, но не мислам дека треба да се откажат од својот сон повторно да станат шампиони на Италија. Особено со Спалети како нивен главен тренер. Постои шанса. Спалети е тренер кој ме излудува. Отсекогаш ми се допаѓал и кога ги гледате неговите тимови како играат, секогаш има нешто да се научи. Тој е мојот омилен тренер“, изјави Канаваро за „Тутоспорт“.

Јувентус моментално е на петтото место на табелата во Серија А со 26 бода, 7 бода зад лидерот Интер.

Доаѓањето на Един Џеко во Фиорентина беше најавено како едно од најзначајните засилувања во летниот преоден рок во Серија А. Сепак, како што сега стојат работите „љубовта“ ќе заврши по само шест месеци.

Лошите резултати на клубот и скромните перформанси на босанско-херцеговскиот напаѓач, се доволни Џеко да биде ставен на трасфер листата. Џеко ќе ја напушти Фиренца, но ќе остане во Италија.

Фиорентина, минува низ веројатно најтешкиот период во поновата сторија. „Виола“ се наоѓа на последното место, со само шест бода и без ниту една победа во 15 одиграни натпревари.

Во Фиренца се најавуваат големи промени во зимскиот проеден рок, не само во ростерот, туку и на тренерската позиција и во Управниот одбор на клубот.

На удар се најискусните играчи, меѓу кои е и Џеко. Се очекува најмалку петмина да си заминат од „Артемио Франки“ во јануарскиот преоденр ок.

На 17 официјални настапи за Фиорентина, Џеко постигна само два гола, што е далеку под репутацијата и искуството што го поседува. Поради ова, разделбата стана реална опција за двете страни.

Според информациите што ги објави турскиот „Минет“, Џеко нема да ја напушти Серија А. Џенова се издвојува како најсериозен кандидат за неговиот потпис, која наводно веќе влегла во последната фаза од преговорите со босанскиот напаѓач. Клубот од Џенова е исклучително упорен во намерата да го доведе, а трансферот би можел да биде официјализиран на 1 јануари.

Откако менаџерот на фудбалерите на Челзи, Енцо Мареска, јавно проговори дека нема поддршка од првите луѓе на тимот, со реакција се јави легендарниот Џејми Карагер.

„Јас сум голем обожавател на Мареска но, се чини дека се води борба за моќ и тоа никогаш не носи ништо добро особено за менаџер. Мислам дека Мареска нема да биде во Челзи во наредната сезона.

Не ми се допаѓа кога некој -без разлика дали е тренер или играч ги изнесува работите јавно“, рече Карагер.

Пелистер е долгогодишен прволигаш во ПМФЛ и имаше силен старт на сезоната, но една црна серија од 77 дена без победа му ја искомплицира позицијата на табелата, по што битолскиот клуб се најде во борба за опстанок.

Промената на кормилото вроди плод, па со доаѓањето на Милан Стојаноски, нештата се нормализираа и „зелено-белите“ продолжија да освојуваат бодови и да се прикажуваат во подобро светло, а малку недостигаше во последното коло од есенскиот дел да извојуваат победа на гости кај Арсими.

“Борбата за опстанок ќе се води меѓу неколку квалитетни екипи. Испуштивме победа против Арсими во последното коло, иако на два пати кога имавме водство можевме да обезбедиме сигурна победа. Тие грешки ни се вратија како бумеранг и Арсими изедначи и можеше дури и да направи пресврт. Задоволен сум од натпреварот, им честитав на играчите, но на крајот од сезоната ми недостигаат два бода за мирен сон. Имавме и други испуштени шанси, особено со Македонија ЃП, но има доволно натпревари во пролетниот дел каде што можеме да покажеме што знаеме и умееме. Имам високо мислење за нашите ривали како Тиквеш и АП Брера, па се надевам дека подобрите ќе изборат опстанок.”

Коментирајќи го она што претстои, Стојаноски смета дека имаат солиден план кој ќе им овозможи добри резултати на пролет.

“Во паузата меѓу двата дела на сезоната мора да се размислува и да се поправат слабите точки кои ги забележавме оваа есен. Поради различни причини, клубот не беше во посакуваната позиција на стартот на сезоната, но сега мислам дека ја имаме комплетната слика и ќе собереме сила да излеземе од кризата. Ќе се потрудиме да донесеме неколку засилувања, најмалку четири фудбалери за четири позиции, а потоа да одработиме квалитетни подготовки, со цел да го дочекаме подготвени пролетниот дел. Првиот собир ќе го имаме веднаш по Божикните празници, а во втората половина на јануари ќе продолжиме за Анталија, каде што покрај подготовките ќе имаме и неколку контролни натпревари”.

Тој има и совет околу подигање на квалитетот на играта во првенствените мечеви.

“Ние не успевавме да ја прикажеме нашата најдобра игра главно поради лошите терени во овој период од годината. Мислам дека публиката е ускратена за погледлив и поинтересен фудбал поради терените кои по обилните врнежи изгубија на квалитет. Самото скратување на лигата нема да даде квалитет ако не се подобрат и терените,- укажува шефот на стручниот штаб на Пелистер.”