Преселбата на бразилскиот напаѓач на францускиот ПСЖ, Нејмар во англискиот Њукасл е комплицирана поради барањата на фудбалерот за висината на платата, пренесуваат медиумите во Англија.

Во летниот преоден рок, Њукасл сака да се фокусира на купување играчи кои ќе играат во Лигата на шампионите следната сезона. 

Англискиот клуб веќе стапил во контакт со блиски луѓе на Нејмар за да разговараат за можен трансфер. Ситуацијата со евентуален трансфер се уште е далеку од напредна фаза, но доколку Бразилецот го напушти ПСЖ, тогаш Премиер лигата ќе биде најпогодното место за продолжување на кариерата.

Договорот на 31-годишниот Нејмар со ПСЖ е со важност до 2025 година. Бразилскиот напаѓач има 18 гола и 17 асистенции на 29 натпревари оваа сезона.

Милан е во напредни преговори со играчот за врска на Челзи, Лофтус Чик.

Милан е силно заинтересиран за Рубен Лофтус Чик, кој играше одлично против „росонерите“ во ЛШ и го привлече вниманието на Малдини.

26-годишниот играч за врска не добива голема минутажа во Челзи, па и самиот е спремен да ја промени средината. Челзи на лето ќе прави голема реконструкција, а Луфтус Чик е меѓу фудбалерите ставени на продажба.

„Росонерите“ веќе стапиле во контакт со неговиот агент и двете страни постигнале начелен договор, објави новинарот Фабрицио Романо.

Ливерпул на лето ќе прави реконструкција на средниот ред и приоритет е доведување на најмалку двајца врвни играчи за врска.

Последните информации се дека Ливерпул е пред комплетирање на трансферот на ѕвездата на Брајтон, Алексис Мекалистер.

23-годишиот играч за врска пристигна во Брајтон од Бока Јуниорс за 12 милиони евра и се етаблираше во еден од најдобрите играчи за врска во Премиер лигата. Аргентинецот беше на мета на многу европски гиганти, но Ливерпул ја победи конкуренцијата и постигнал договор со играчот.

Финансиските детали не се познати, но се очекува „црвените“ да платат околу 60 милиони евра за неговиот потпис.

Арсенал денес потврди дека голманот Арон Рамсдејл ставил потпис на нов договор и ја продолжил верноста со клубот од „Емирати“.

Откако ја загубија трката во Премиер лигата, „топџиите“ сега имаат причина за славје бидејќи еден од најважните играчи останува во тимот до 2028 година.

25-годишниот Рамсдејл се етаблираше во еден од најдобрите голмани во Премиер лигата и ќе биде важна алка за „топџиите“ во наредните години. Добрите партии оваа сезона му донесоа нов договор и значително повисока плата.

Англиската Премиер лига на својата официјална веб-страница ги објави имињата на претендентите за титулата најдобар играч во сезоната 2022/2023. На листата на номинирани се најдоа:

Кевин Де Бруин (Манчестер Сити)

Ерлинг Халанд (Манчестер Сити)

Хари Кејн (Тотенхем)

Мартин Одегард (Арсенал)

Маркус Рашфорд (Манчестер Јунајтед)

Букајо Сака (Арсенал)

Киран Трипиер (Њукасл Јунајтед).

Победникот ќе биде одреден со гласање на навивачите и фудбалските стручњаци. Резултатите од гласањето ќе бидат објавени на 27 мај.

Супер-сезоната во Лигата на шампионите и пласманот во финалето ќе го збогати Интер со над 100 милиони евра. „Нероаѕурите“ оваа сезона направија вистинска сензација со пласманот во големото финале и со тоа успеаја значително да ја наполнат касата со бонуси од УЕФА.

Според „газета дело Спорт“, пласманот во финалето на Лигата на шампионите ја донесоа вкупната заработка на Интер од ова натпреварување во висина од 101,1 милиони евра. На таа бројка би се додале уште 4,5 милиони евра доколку го победат Манчестер Сити во финалето.

Голманот на Ајакс, Мартен Стекеленбург ќе се повлече од играњето по завршувањето на актуелната сезона, соопшти клупската прес-служба.

40-годишниот поранешен холандски репрезентативец ќе се прости од навивачите за време на домашниот натпревар од 33. коло против Утрехт на 21 мај. Стекеленбург потекнува од школата на Ајакс. Како дел од клубот од Амстердам четири пати стана шампион на Холандија и го освои националниот Куп.

Голманот во својата кариера настапуваше и за Рома, Евертон, Саутемптон, Фулам и Монако. Мартен Стекеленбург има 63 настапи за репрезентацијата на Холандија. Со составот на „лалињата“ освои сребрен медал на Светското првенство во 2010 година.

Германските медиуми пренесуваат дека Баерн Минхен сака после само една година да го продаде Садио Мане.

Мане е незадоволен во Германија, не се снајде најдобро во Баерн, а после инцидентот во соблекувалната и ударот на Лерој Сане двете страни сакаат да се разделат.

Баварците му соопштиле на неговиот агент дека слободно може да си бара нов клуб, а најсилен интерес за него покажуваат Манчестер Јунајтед и Њукасл. Мане преферира да се врати во Премиер лигата и да игра во Лигата на шампиони, па може да се пресели во најголемиот ривал на Ливерпул.

Фудбалскиот клуб Пелистер денеска соопшти дека нема да ја продолжи соработката со искусниот стратег, Бобан Бабунски.

„Патиштата на клубот и на Бабунски се разидуваат. Пелистер му се заблагодарува на Бабунски за неговата работа, професионалност и посветеност и му пожелува многу успех во натамошната кариера“, стои во соопштението на Пелистер.

Фудбалерите Роберто Фирмињо (31), Наби Кеита (28), Џејмс Милнер (37) и Алекс Окслејд-Чембрлејн (29) ќе го напуштат Ливерпул по истекувањето на нивните договори на крајот на сезоната, соопштуваат од премиерлигашот, додека клубот подготвува терен за реконструкција на екипата за идната сезона.

Четворицата играчи беа дел од тимот што ја освои Лигата на шампионите во 2019 година и му помогнаа на клубот да ја освои својата прва титула во англиската Премиер лига по 30 години во сезоната 2019/20.

„Сите четворица играчи ќе заминат со наша благодарност за придонесот што го дадоа. На Роберто, Наби, Џејмс, Алекс и нивните семејства им посакуваме се најдобро во иднина“, се вели во соопштението на Ливерпул.