Иван Перишиќ направи решителен чекор за да се врати на „Сан Сиро“, официјално поднесувајќи барање за трансфер до негвиот сегашен клуб ПСВ Ајндховен.

Според Џанлука Ди Марцио, хрватскиот ветеран е решен да обезбеди враќање во Интер пред да се затвори јануарскиот преоден рок. Сепак, патот во моментов е блокиран од раководството на холандскиот клуб. ПСВ сè уште не е отворен за продажба, главно поради претстојниот натпревар од Ередивизие против Феенорд, кој е многу важен.

И покрај овој почетен отпор од страна на управата на Ајндховен, Перишиќ нема намера да се повлече. Играчот ќе продолжи да инсистира на трансфер во наредните часови.

Играчот од средниот ред на Вест Хем, Лукас Пакета, ќе ја продолжи кариерата во својот матичен Фламенго, потврдија денеска двата клуба.

Финансиските детали од договор не се објавени, но британските медиуми јавија дека лондонски Вест Хем ја прифатил понуда од над 41 милиони евра за 28-годишниот бразилски репрезентативец.
Актуелниот бразилски шампион Фламенго го потврди доаѓањето на Пакета.

„Пакета се враќа. Добриот син се враќа дома … Историски потег. Пресвртница на глобалниот фудбалски пазар, на ниво достојно за Фламенго“, објави бразилскиот тим на својот Инстаграм профил.

Пакета му се приклучи на Вест Хем од Лион во 2022 година, откако претходно настапуваше за Милан, а со лондонскиот клуб имаше договор до 2027 година.

Во јули лани, по долга истрага на Англиската фудбалска асоцијација, Пакета беше ослободен од четири обвиненија за местење натпревари.

Екипата на Интер потврди дека дефанзивецот Аслани до крајот на сезоната ќе го носи дресот на Бешикташ. Според договорот, тој заминува во Турција како позајмен фудбалер со опција за откуп.

До јуни, платата на 23-годишниот албански репрезентативец ќе ја исплаќа турскиот клуб.

Аслани моментално е на позајмица во Торино, каде што одигра 15 натпревари во Серија А оваа сезона без да постигне гол.

Украинскиот интернационалец Александар Зинченко се подготвува за трансфер во Ајакс. Претходно беше објавено дека Арсенал ќе го продаде дефанзивецот, кој моментално е на позајмица во Нотингем Форест. Зинченко ќе потпише договор до крајот на сезоната, под услов да ги помине медицинските прегледи. Доколку партнерството биде успешно, клубот и играчот ќе можат да разговараат за продолжување на договорот.

Украинецот ќе отпатува за Амстердам денеска за да го потпише договорот со Ајакс, кој ќе биде со вредност од 1,5 милиони евра плус бонуси поврзани со настапите.

Германскиот фудбалер Тимо Вернер ги напушти редовите на бундеслигашот Лајпциг и потпиша договор со МЛС лигашот Сан Хозе.

Вернер стави потпис на договор со американскиот клуб до крајот на јуни 2028 година, а финансиските детали не се објавени.
Оваа сезона, Вернер одигра три натпревари за Лајпциг во сезоната 2025/26 на кои влезе од клупата за резерви и на теренот мина скромни 13 минути.

Вернер во кариерата претходно настапуваше за Штутгарт, Челзи и Тотенхем.

Лига Европа синоќа го достигна својот врв за сезонава. Последното коло од групната фаза ги даде одговорите на клучните прашања: кој продолжува директно во елитата, а за кого европската авантура завршува тука. Новиот формат од 36 екипи не остави простор за калкулации, а синоќешните дуели понудија сè — од епски пресврти на Вила Парк до солзи во Глазгов.

Најголемите победници на вечерта се екипите кои обезбедија место меѓу најдобрите осум, со што го избегнаа опасниот плеј-оф во февруари. Лион ја запечати првата позиција на табелата со убедливи 4-2 против ПАОК, но главната приказна сепак беше во Бирмингем.

Унаи Емери, човекот чие име е синоним за овој трофеј, го прослави својот 101. натпревар во Лигата на Европа со пресврт. Астон Вила губеше со 0-2 од Салцбург, но во второто полувреме покажа карактер. Победата од 3-2 ја донесе 19-годишниот Џамалдин Џимо-Алоба со својот дебитантски гол во 87. минута. Покрај нив, директен билет за осминафиналето обезбедија и Мидтјиланд, Реал Бетис, Порто, Брага, Фрајбург и Рома.

Кога станува збор за опстанок во Европа, шкотските гиганти имаа дијаметрално спротивни судбини. Селтик приреди вистинско шоу во Глазгов, демолирајќи го холандскиот Утрехт со 4-2. Со фуриозни 20 минути на стартот, „зелено-белите“ најавија дека нивното место во плеј-офот е апсолутно заслужено.

Од друга страна, синиот дел на Глазгов се соочува со суровата реалност. Оваа сезона во Лига Европа за Ренџерс беше проткаена со апатија и недостаток на квалитет, оставајќи го тимот предвреме да се фокусира единствено на домашните обврски. . Поразот на Ренџерс од 3-1 на Драгао беше само последен чин во низата разочарувања. Во меѓувреме, Нотингем Форест испиша историја, прегазувајќи го Ференцварош со 4-0 за својот прв пласман во нокаут-фазата во модерната ера.

Новиот систем на бодување се покажа како суров за многумина. Данскиот Мидтјиланд е најпријатното изненадување, по победата од 2-0 над Динамо Загреб, тие се искачија на третото место, оставајќи зад себе големи европски клубови.

Најголемиот трагичар е Салцбург. Иако одиграа храбро на Вила Парк, не успеаја да ја задржат предноста од два гола, што ги чинеше директен пласман. Австријците ја продолжуваат црната серија против англиски екипи, која сега трае веќе девет натпревари без победа. Од друга страна, Фрајбург претрпе пораз од Лил во судиското продолжение, но благодарение на гол-разликата, „за влакно“ остана во топ 8 елитата.

Шкотскиот тим Хартс и официјално го потврди трансферот на Роџерс Мато, кој ќе ја продолжи кариерата во оваа земја уште во текот на зимскиот преоден рок.

„ФК Вардар АД ја информира јавноста дека фудбалерот Роџерс Кассим Мато ќе настапува за Хартс (Шкотска) како позајмен играч до крајот на сезоната. Му посакуваме многу успех и среќа во новиот предизвик“, соопштија од Вардар.

Од страна на Хартс преку соопштение беше потврден овој трансфер и со објава на нивната веб страница потврдија дека Мато е веќе нивен играч.

„Хартс со задоволство може да го потврди потпишувањето со Роџерс Мато во овој преоден рок. Офанзивниот фудбалер од Уганда доаѓа на позајмица од Вардар до крајот на сезоната. По крајот на сезоната, откако ќе истече неговиот договор со Вардар, ќе почне перманентниот тригодишен договор на Мато со Хартс“, стои во соопштението на шкотскиот тим.

Според овие информации, Мато до јуни ќе игра како позајмен фудбалер во редовите на Хартс, а потоа ќе започне неговиот договор.

Вардар ќе добие уште еден повратник после Дарко Велковски. Станува збор за Бобан Николов, кој што од среда се приклучува на клубот. Поранешниот репрезентативец беше дел од „црвено-црните“ во периодот од 2015 до 2018 година, а потоа играше во Фехервар, Лече, Шериф, ФЦСБ, Кишварда, Борац Бања Лука.

Тој веќе утре ќе треба да земе раскин на договорот со Фарул Костанца и ќе се приклучи на „црвено-црните“ кога ќе се вратат од подготовките од Анталија. Оваа вест е потврдена и од раководството на „црвено-црните“.

Николов има и репрезентативно искуство со 48 натпревари зад себе, а со Шериф играше и во групната фаза во Лигата на шампионите, а со Вардар избори место во Лига Европа. Николов ќе треба да донесе дополнително искуство во средниот ред на Вардар.

Во Вардар доаѓа и 29 годишниот аргентинскиот интернационалец Хоакин Торес. Станува збор за играч кој настапува на крилната позиција, и доаѓа од бразилската екипа Амазонас.

Претходно бил дел од Филаделфија Унион, Њуелс Олд Бојс, Волос, Монтреал и Универсидад Католика. Тој беше најавен како можно засилување на „црвено-црните“, но ја одби првата понуда, но Вардар беше упорен и успеа да го ангажира.

Во трансфер кој го разбранува јужноамериканскиот пазар, аргентинскиот гигант Ривер Плејт постигна целосен договор со Челси за ангажман на еквадорското „чудо од дете“, Кендри Паез. Договорот беше финализиран доцна синоќа откако лондонскиот клуб ја прифати понудата за едногодишна позајмица, проценувајќи дека преселбата на Монументал е вистинскиот чекор за развојот на овој суперталент.

Паез веќе доби дозвола за лет кон Буенос Аирес, каде во следните 48 часа ќе ги изврши лекарските прегледи пред официјално да го потпише договорот. 18-годишниот плејмејкер, кој важи за еден од најголемите јужноамерикански таленти, веднаш ќе му се стави на располагање на Марсело Галјардо за претстојните предизвици во домашното првенство и Копа Либертадорес.

Патот до Аргентина се отвори откако Челси реши предвреме да ја прекине соработката со францускиот Стразбур. Иако Еквадорецот покажа блесоци во Лига 1, управата на „Сините“ процени дека е неопходна промена на средината за да му се овозможи максимална минутажа.

За Челси, овој потег се смета за „идеалн решение“ за иднината на Паез. По разгледување на неколку европски понуди, клубот од Лондон го избра проектот на Ривер Плејт поради нивната реномирана историја во создавањето елитни играчи и тактичките барања на Галјардо.

Со враќањето во Јужна Америка, Паез ќе стекне драгоцено искуство играјќи во Копа Либертадорес, турнир познат по огромниот интензитет и техничка тежина. Челси верува дека една година како лидер на средниот ред на „Милионерите“ ќе му ја даде потребната физичка и ментална зрелост пред неговата конечна интеграција во првиот тим на Стемфорд Бриџ.

Во потег што го изненади европскиот пазар, Интер официјално ги отвори преговорите со саудискиот Ал Итихад за враќање на Муса Дијаби на „стариот континент“. Францускиот интернационалец, кој пред само 18 месеци ја замени Астон Вила со Џеда, сега е во центарот на трансфер-драмата додека зимскиот преоден рок влегува во својата финална, френетична фаза.

Спортскиот сектор на Интер му претстави конкретна понуда на саудискиот гигант: Шестмесечна позајмица со цел да се засили нападот за завршницата во битката за Скудетото. Клучниот дел од разговорите е вклучувањето на клаузула за откуп на договорот вредна 35 милиони евра.

Иако Ал Итихад во 2024 година издвои речиси 60 милиони евра за неговите услуги, миланскиот гигант игра на картата на желбата на фудбалерот за камбек во елитниот европски фудбал. За Интер, ова е стратегија со низок ризик и огромен потенцијал, добиваат експлозивно крило во тимот без веднаш да го оптоварат буџетот.

И покрај астрономската плата на Блискиот Исток, срцето на Дијаби е веќе во Милано. Извори блиски до преговорите потврдуваат дека 26-годишниот фудбалер веќе дал зелено светло за трансферот, пренесувајќи му ја својата одлука на раководството на Интер.

Французинот е желен да се докаже под светлата на Сан Сиро. Тој верува дека тактичкиот систем на Чиву е совршена средина за да ги врати своите репрезентативни амбиции со „Триколорите“.

Сепак, конечната реализација зависи исклучиво од челниците на Ал Итихад. Саудискиот клуб не сака да ја санкционира разделбата со својата ѕвезда без претходно да обезбеди соодветна алтернатива.

Раководството од Џеда веќе е на пазарот во потрага по нов звучен профил во нападот. Сè додека не се пронајде наследникот, Дијаби останува на чекање. Како што истекува времето, судбината на овој трансфер зависи од брзината на Саудијците да го пополнат празниот простор во својот ростер.