Тренерот на Интер, Симоне Инзаги ќе има само уште три натпревари да си ја спаси работата, пишува „Газета дело спорт“.

„Нероаѕурите“ го забележаа третиот последователен пораз во Серија А откако синоќа со 1-0 беа поразени дома од Фиорентина.

По поразот, иднината на Инзаги е сериозно ставена под знак прашалник. За Интер следуваат тешки пресметки со Јувентус во Купот на Италија, со Салернитана во Серија А и со Бенфика во 1/4-финалето на Лигата на шампионите.

„Има само еден спас за Инзаги, а тоа е Лигата на шампиони. Потенцијален триумф може да ги „искупи грешките“. Финалето не е незамисливо и ваквото достигнување можеби ќе биде лек за длабоката горчина која сега ги вознемирува навивачите на Интер“, пишува весникот.

Реал Мадрид е сериозно заинтересиран за аргентинскиот репрезентативец и член на Виљареал, Хуан Фојт, пренесуваат шпанските медиуми.

25-годишниот Аргентинец игра како десен бек, но може да игра и во центарот на одбраната и беше дел од репрезентацијата која го освои Светското првенство.

Меѓутоа, Виљареал не сака да го пушти Фојт и бара да биде платена откупната клаузула која изнесува 54 милиони евра. Минатото лето Барселона долго преговараше за негов трансфер, но Виљареал не сакаше да го пушти.

„Кралевите“ се во потрага по нов десен бек и се спремни да понудат 40 милиони евра за Аргентинецот.

Англиската Премиер лига ја одби понудата на стриминг платформата Нетфликс за создавање серија за животот од зад сцената на познатите фудбалски клубови, пишува весникот „Тајмс“. За овој проект Нетфликс и понуди на Премиер лигата пет милиони фунти, но раководството не сметаше дека оваа сума е доволна за да ги заинтересира клубовите за идејата.

Сепак, според информации од изворот, евентуална серија би можела негативно да се одрази на одржувањето на аукција за продажба на телевизиските права на натпреварите. Радиодифузерите долго време се обидуваат да добијат дозвола од Премиер лигата за слики за време на тренинзите, а дозволувањето на Нетфликс зад сцената може да направи преседан.

Платформата планираше да создаде три сезони од серија за животите на шест до осум клубови од Премиер лигата. Идејата на американската компанија дојде по успехот на документарната серија за Формула 1.

Раководството на фудбалската федерација на Исланд го отпушти досегашниот селектор Арнар Видарсон и тоа откако оваа репрезентација победи со 7-0 против Лихтенштајн.

Очигледно дека во Исланд имале намера да го избркаат Видарсон и пред последните натпревари, па убедливата победа против Лихтенштајн не го променила впечатокот. За Видарсон победата против Лихтенштајн беше само шеста во 31 натпревар колку што беше на клупата.

„Одлуката ја донесовме навистина тешко, но сметаме дека испарвна. Арнар направи добри работи и заслужува пофалба. Сепак, сега тргнуваме во потрага по негов наследник за да ги започнеме подготовките за следните натпревари“, изјави претседателката на федерацијата, Ванда Сигургеирсдотир.

Ливерпул ја предводи трката за потписот на Мејсон Маунт ова лето, бидејќи шпекулациите за иднината на ѕвездата на Челзи продолжуваат – но тој нема да биде евтин.

Според „Атлетик“, Маунт не е блиску до договор со Челзи и постои „растечки сомнеж“ дека ова ќе биде негова последна сезона во клубот во кој игра од шестгодишна возраст.

Има многу клубови заинтересирани за 24-годишниот играч, но наводно Ливерпул е во пол-позиција. Сепак, тие може да се соочат со битка со Баерн Минхен откако поранешниот тренер на „сините“ Томас Тухел беше назначен за нов тренер на германскиот гигант.

Се тврди дека Челзи ќе бара 70 милиони фунти за англискиот репрезентативец од заинтересираните клубови ова лето.

На два дена до големото дерби со Ливерпул, Ерлинг Халанд не беше присутен на тренингот на Манчестер Сити денес, откако со повреда го напушти репрезентативниот собир минатава недела.

Според англиските медиуми, Халанд ќе биде во трка со времето за да биде подготвен за мечот в сабота.

„Бомбардерот“ мораше да го напушти таборот на норвешката репрезентација со повреда на препоните.

Пари Сен Жермен будно ја следи и ситуацијата со дефанзивецот на Манчестер Сити, Емерик Лапорт, пишува „Фудбал Инсајдер“. Се чини дека Шпанецот ќе го напушти „Етихад“ на лето, бидејќи клубот планира многу да инвестира во привлекувањето на Јошко Гвардиол од РБ Лајпциг. Така Лапорт го привлекува вниманието на се повеќе клубови од Европа.

Досега се сметаше дека Барселона е фаворит за потписот на Лапорт. Самиот играч исто така посочи дека негова желба е да се пресели на „Камп Ноу“. Сепак, Каталонците можеби ги немаат потребните финансии за ваков трансфер, бидејќи Манчестер Сити за дефанзивецот постави цена од 50 милиони евра. Така, ПСЖ може да ја искористи ситуацијата и да и го украде Лапорт пред нос на Барселона. Францускиот тим гледа на нов централен бек кој ќе го замени Серхио Рамос, кој се очекува да замине на лето кога ќе му истече договорот. Затоа се насочуваат кон Емерик Лапорт.

И самиот фудбалер сака да го напушти „Етихад“ бидејќи е незадоволен што не игра редовно. Тој оваа сезона забележа само 16 настапи во сите натпреварувања. За него се заинтересирани и Челзи и Јувентус.

Спортскиот директор на Лидс, Виктор Орта, призна дека внимателно ја следи тренерската кариера на легендата на Реал Мадрид, Раул и дека е отворен да го донесе на „Еланд Роуд“ ова лето. 45-годишниот тренер моментално го предводи вториот тим на Реал Мадрид, но ќе си замине на лето кога ќе му истече договорот.

„Раул ми се допаѓа уште од кога беше фудбалер, но исто така сум исклучително импресиониран од неговата работа како тренер. Го следам долго време. Тој успеа да ја освои младинската лига со Реал Мадрид, иако немаше баш талентиран состав.Сигурно тоа не е најсилната генерација во мадридската школа,но ја водеше до титулата.Тогаш сфатив дека има квалитети да биде голем тренер.Сега работи со тренер кој исто така добро го познавам. Гледам сериозна еволуција во неговата работа и навистина сум љубопитен до каде може да стигне“, изјави Орта.

Тимот на Лидс Јунајтед планира д абара нов тренер за следната сезона, а според Орта , Раул може да биде нивниот избор.

Дефанзивецот на ПСЖ, Серхио Рамос би можел да добие поголема плата доколку игра за клубот од Саудиска Арабија.

Според „L’Equipe“, сумата од 30 милиони евра е почетната понуда на саудискиот Ал-Хилал за играчот. Може да се зголеми до 50 милиони евра.

Шпанецот заработува помалку од 10 милиони евра годишно во ПСЖ пред оданочување. Парижаните ќе се обидат да ги намалат платите при преговорите за нов договор. Оваа сезона Рамос има 36 настапи за ПСЖ во сите натпреварувања, постигнувајќи два гола и една асистенција.

ПСЖ со освоени 66 бодови е на првото место на табелата во францускиот шампионат. Парискиот тим испадна од Лигата на шампионите во 1/8 финалната фаза.

Десниот  бек на Челзи и англиски репрезентативец, Рис Џејмс е на врвот на листата желби на Реал Мадрид, пренесува „АС“. Во шпанскиот гигант го гледаат 23-годишниот Џејмс како долгорочно решение за десната бековска позиција и сакаат да го доведат на лето.

Џејмс ги помина сите младински категории на Челзи, каде е од 2006 година и моментално е стандарден во првиот тим на „сините“.

Џејмс има договор со Челзи до 2028 година и Челзи не размислува за негова продажба, но има финансиски проблеми и на лето ќе мора да продава фудбалери.

Доведување на десен бек ќе биде приоритет на „кралевите“ ова лето, а како опција се споменува и Жоао Кансело, кој моментално игра на позајмица во Баерн.