Рома го презентираше денеска планот за изградба на нов стадион, вреден 1.5 милијарди евра, кој ќе биде лоциран на периферијата на италијанската престолнина и потенцијално ќе биде домаќин на натпреварите на Евро 2032, чиј заеднички домаќини ќе бидат Италија и Турција.

Градежната дозвола треба да ја одобри италијанската Влада, а изградбата треба да почне идниот декември и да трае две години. Планирано е стадионот да се гради на периферијата на италијанската престолнина, на половина пат помеѓу центарот на градот и аеродромот Леонардо да Винчи.

Проектот на приватниот инвеститор вклучува и изградба на деловни простории, како и разни забавни објекти. Дизајнот е инспириран од Колосеумот, а капацитетот ќе изнесува 52.500 седишта, со можност за проширување на 60.000. Изградбата на стадионот се проценува дека ќе чини околу 300 милиони евра, но вкупната цена вклучува и дополнителна инфраструктура.

Претседателот на Рома, Џејмс Палота, изјави дека детално досие за проектот е предадено на италијанските власти.

„Ако сакаме да се натпреваруваме со најдобрите светски клубови, потребен ни е нов стадион, кој ќе биде во приватна сопственост на Рома“, рече Палота, додавајќи дека тоа ќе биде еден од најголемите проекти во Италија по многу децении.

Тренерот на Челзи, Енцо Мареска, потврди денеска дека Лиам Делап и Естевао се подготвени за претстојниот натпревар од Премиер лигата против Астон Вила.

„Естевао се врати и ќе биде на располагање за натпреварот в сабота. Исто така и Делап. Двајцата се вратија“, рече Мареска на денешната прес-конференција.

Враќањето на Делап е голем поттик за Челзи, бидејќи напаѓачот се враќа порано од очекуваното од повредата на рамото во ремито против Борнмут на 6 декември.

„Не знаевме точно колку долго Лиам ќе биде надвор од игра, но тој се враќа в сабота. Среќни сме што двајцата се тука“, рече Мареска.

Стратегот на Челзи, исто така, објави дека Кол Палмер, кој неодамна се врати на теренот по проблеми со препоните, а потоа и со прстот, е подготвен да одигра цел натпревар.

Поранешниот германски селектор, Јирген Клинсман, оцени дека Германија има шанса да го освои Светското фудбалско првенство кое идната година ќе се одржи во САД, Канада и Мексико.

„Сè е можно. Германија е меѓу фаворитите, заедно со другите големи европски нации. Потоа, тука се и двете големи сили Бразил и Аргентина, кои исто така ќе имаат што да кажат“, изјави 61-годишниот Клинсман, кој како фудбалер ја освои светската титула во 1990 година.

Според Клинсман, Светското првенство во 2026 година ќе биде голем предизвик за сите учесници.

„Овој турнир ќе биде огромен предизвик за сите вклучени тимови – тоа ќе биде маратон. И зошто да не го поминеме овој маратон до крај и да направиме огромно изненадување со освојување на титулата светски шампион“, додаде тој.

Клинсман беше германски селектор на мундијалскиот турнир во 2006 година, кога Германија заврши третопласирана.

Италијанскиот клуб Рома е заинтересиран за потпишување на дефанзивецот на Тотенхем, Раду Драгушин.

Клубот, исто така, ќе продолжи со преговорите во врска со трансферот на напаѓачот на Атлетико Мадрид, Џакомо Распадори, и напаѓачот на Манчестер Јунајтед, Џошуа Зиркзе, објави „Фудбал Италија“.

23-годишниот Раду Драгушин се опоравуваше од скинати предни вкрстени лигаменти на десното колено. Во декември, тој беше вклучен во составот за натпреварот од 17-тото коло од англиската Премиер лига против Ливерпул (1:2).

Претходно се шпекулираше дека Џошуа Зиркзе е на списокот на желби во Рома, но Манчестер Јунајтед сè уште не го одобрил трансферот.

Трансферот на напаѓачот Расмус Хојлунд од Манчестер Јунајтед во Наполи може да пропадне поради финансиски проблеми на италијанскиот клуб, според информациите кои беа објавени воИталија. Данецот моментално е на позајмица во клубот од Наполи.

Позајмицата на Хојлунд е до крајот на тековната сезона. Наполи има обврска да го откупи 22-годишниот напаѓач доколку бидат исполнети одредени услови. Хојлунд одигра 19 натпревари за италијанскиот клуб, постигна седум гола и имаше три асистенции.

Данецот е во Манчестер Јунајтед од летото 2023 година. Во овој период, тој одигра 95 натпревари во сите натпреварувања, постигна 26 гола и имаше шест асистенции.

Италијанскиот тим Рома ја заврши последната финансиска година (која заврши на 30 јуни 2025 година) со загуба од 53,9 милиони евра – најдобар резултат на клубот од сезоната 2018/19, објави „Калчо е Финанца“.

Во пртходната година (на 30 јуни 2024 година), загубите на Римјаните изнесуваа 81,4 милиони.

Се очекува загубите на Рома да продолжат да се намалуваат во тековната финансиска година, но загубата е неизбежна.

Под водство на американскиот бизнисмен Ден Фридкин (од август 2020 година), вкупните загуби на клубот изнесуваат 643 милиони евра.

Манчестер Јунајтед се соочува со сериозни проблеми поради повредите пред натпреварот против Њукасл на Боксинг Деј, откако капитенот Бруно Фернандеш и младиот Коби Мејну се потврдени како изостани. Тренерот Рубен Аморим потврди дека иако Мејну ќе се врати побрзо, нема да ги открие деталите за повредата на Фернандеш. Исто така, дефанзивците Хари Мегваер и Матијс де Лигт остануваат настрана, што дополнително го ослабува составот.

Бруно Фернандеш се повреди во текот на поразот од Астон Вила, по што беше заменет на полувремето. Според извештаите, се очекува да биде надвор од теренот околу еден месец. Коби Мејну, кој има мускулна повреда, ќе го пропушти натпреварот со Њукасл, но се очекува да се врати побрзо од Фернандеш. Аморим даде деликатно интервју, изјавувајќи: “Мислам дека Коби ќе се врати пред Бруно! За Бруно имам идеја кога ќе се врати, но нема да ја откријам.”

Мегваер и де Лигт продолжуваат со рехабилитација од своите повреди, што остава малку опции во централната одбрана. Аморим го опиша ова време како “многу чудно”, со оглед на тоа што се случува во важен период за клубот, со натпревари на секој чекор. Составот ќе мора да се прилагоди брзо за да ја задржи стабилноста и да ја продолжи победничката низа, и покрај комплицираната ситуација со повреди.

Ливерпул се соочува со сериозен проблем во нападот по повредата на Александар Исак. Повредата ги наруши плановите на тренерскиот штаб во клучниот дел од сезоната.

Шведскиот напаѓач заработи сериозна повреда, а првите проценки укажуваат дека ќе биде надвор од терените подолг временски период.

Клубот од „Енфилд“ е принуден брзо да реагира и да најде краткорочно решение кое би го покрило отсуството на Исак.

Според ексклузивни информации од Англија, Ливерпул веќе активно го истражува пазарот и ги разгледува достапните опции. Идејата е јасна, да се доведе играч кој веднаш може да игра и да му помогне на тимот без долгорочни обврски.

Во овој контекст, две имиња се издвоија како најреални опции за зимскиот преоден рок.

Првата е Мемфис Депај, искусен холандски репрезентативец кој во моментов е отворен за краткорочен ангажман.

Дополнителен плус е фактот дека Депај има добри односи со голем број играчи од соблекувалната на Ливерпул.

Второто име на листата е Александар Серлот, напаѓач на Атлетико Мадрид кој е во одлична форма.

Италијанскиот великан Лацио е заинтересиран за купување на српскиот репрезентативец Лазар Самарџиќ.

Со решавањето на финансиските тешкотии, Лацио повторно е активен на пазарот и има намера да донесе сериозни имиња во зимскиот преоден рок.

Според „Газета дело спорт“, Маурицио Сари сака да го засили тимот со играч од средниот ред, а прв пик му е Самарџиќ.

„Сари го посочи потпишувањето на квалитетен играч од средниот ред како врвен приоритет. На тренерот му се допаѓа Лофтус-Чик, но тешко е дека може да му го „украде“ на Милан, а и неговата плата е превисока. Малку помалку комплицирано, а подеднакво привлечно за тренерот, е доведувањето на Самарџиќ од Аталанта. Клубот од Бергамо му плати на Удинезе 20 милиони евра за него и, очигледно, нема да прифатат понуди пониски од тоа“, се вели во текстот.

Лацио е осми на табелата со 23 бода и во случај на добро продолжение на сезоната, може да обезбеди пласман во европските натпреварувања, додека Аталанта е нивен конкурент со бод помалку и позиција подолу.

Лазар Самарџиќ одигра вкупно 18 натпревари оваа сезона за Аталанта во Лигата на шампионите, Серија А и Купот на Италија, постигна три гола и забележа две асистенции.

Аргентинскиот десен бек Факундо Мура ја продолжува својата кариера во Соединетите Американски Држави. Иако Ривер Плата исто така беше заинтересиран за него, Мура наводно се договорил со Интер од Мајами, каде што ќе им се придружи на Лионел Меси и на растечката аргентинска колонија.

Мура ќе го потпише договорот до декември 2029 година, со што ќе заврши неговиот четиригодишен престој во Расинг. Тој ја напушта својата татковина за прв пат.

Ривер Плата се обиде да го задржи Мура во Аргентина со долгорочен договор.

Преговорите со Интер Мајами накратко заглавија поради несогласувања околу условите, па играчот побара време да ги разгледа сите опции. Сепак, откако американскиот клуб испрати подобрена понуда, Мура донесе конечна одлука и пристигна во Мајами како слободен агент.

Мура го напушта Расинг по многу успешни четири години во кои ги освои Копа Судамерикана, Рекопа Судамерикана, Трофео де Кампеонес и Суперкуп Интернационал.

Тој одигра речиси 150 натпревари за клубот од Авељанеда, постигна 12 гола и забележа 15 асистенции.

За Мура, кој претходно играше за Естудијантес и Колон, ова ќе биде prv angaman vo stranstvo. Во Интер, тој им се придружува на актуелните шампиони на МЛС и бројни сонародници, меѓу кои се најголемата ѕвезда Лионел Меси, но и Родриго Де Пол, Томас Авилес и Гонзало Лухан.