Францускиот фудбалер Темоје Бакајоко би можел да ја продолжи кариерата во Мец.

Според „Л’Екип“, 31-годишниот Французин, кој стана слободен агент откако го напушти ПАОК минатото лето, е во преговори со клубот за враќање во Лига 1.

Одбранбениот играч претходно во кариерата има настапувано за Милан, Челзи, Лориен, Рен, Наполи и Монако.

Бакајоко одигра 341 натпревар во сите натпреварувања, постигнувајќи 15 гола и девет асистенции.

Египет е последниот полуфиналист на АФКОН. Седумкратните шампиони на Африка го победија актуелниот шампион Брегот на Слоновата Коска во четвртфиналето во Агадир со резултат 3-2, што значи дека „Црниот континент“ ќе добие нов владетел на 18 јануари.

Во полуфиналето, Египќаните за ривал ќе го имаат Сенегал.

БСК влезе во овој дуел како благ фаворит, играа одличен фудбал на турнирот, но оваа репрезентација историски не можеше да се справи со Египет.

Што ќе се случи во овој натпревар навестија Сангаре и Кусуна, двајца премногу сериозни играчи, кои направија ужасни грешки во истата акција и му дозволија на напаѓачот на Манчестер Сити, Омар Мармуш, лесно да постигне гол, за 1-0.

Раниот гол му овозможи на Египет да го направи она што најдобро го знае – да се затвори, да застане во тесен блок и да чека транзиции и контра напади преку Мармуш и Мохамед Салах.

Секако, тие чекаа и прекини и по корнер во 32-та минута, ја удвоија предноста. Салах центрораше од левата страна, а стоперот Рами Рабија беше најдобар во скокот и постигна гол со глава за 2-0.
„Слоновите“ не се предадоа, нападнаа, и се вратија во натпреварот во 40-та минута, кога по остар центаршут од Диоманде, Египќанецот Ахмед Фатих несмасно ја затресе својата мрежа, за 2-1.

Второто полувреме започна со жестоки напади од страна на БСК, кој сепак беше „нокаутиран“ во 52-та минута.

Беше „шах-мат во три потези“, на крајот Мо Салах реагираше во негов стил, беше побрз од голманот и постигна гол, за 3-1. Шампионот не сакаше да се откаже туку-така, па во 73-та минута повторно се приближи до гол заостанување.

Стрелец по корнер и голема гужва во шеснаесетникот на Египет беше левиот бек Гела Дуе, брат на Дезире Дуе, играч на ПСЖ и француски репрезентативец за конечни 3-2 за “фараоните“.

Победата беше најавена уште во првото полувреме, кога резултатот го отвори новото засилување Матео Гендузи. Французинот, кој пристигна од Лацио, со овој погодок го обележа своето деби во дресот на Фенербахче. По паузата, работата беше комплетирана многу брзо, бидејќи Џејден Остерволде погоди по само три минути игра и му донесе голема предност на својот тим.

Галатасарај се обиде да одговори и да внесе неизвесност, но офанзивните обиди останаа без вистински ефект. Ривалот успеа да упати само еден удар во рамките на голот и немаше сила за пресврт во дербито.

Суперкуп дуелот се одигра на олимпискиот стадион „Кемал Ататурк“ во Истанбул, каде Фенербахче славеше нов значаен успех против вечниот ривал.

Валенсија и Елче ги поделија бодовите во натпревар од 19 коло во шпанската Ла Лига, играјќи 1-1 на „Местаља“. Средбата мина мирно во првиот дел, додека сите возбудувања беа зачувани за продолжението.

Македонскиот репрезентативец Столе Димитриевски настапи од првата минута, кој ја доби шансата меѓу стативите поради повредата на Хулен Агирезабала. Голманот немаше многу интервенции, но не успеа да ја зачува својата мрежа недопрена.

Столе доби и блага повреда во првиот дел, делуваше дека ќе биде заменет, ама стегна заби и остана на теренот.

Гостите поведоа во 75 минута, кога Гради Диангана го искористи првиот удар во рамките на голот и го совлада Димитриевски за водство на Елче. Валенсија тргна по израмнување и тоа го доби во самиот финиш. По досудениот пенал, Пепелу беше сигурен од белата точка и погоди за конечни 1-1, со што „лилјаците“ избегнаа пораз пред својата публика.

Напаѓачот на Манчестер сити, Ерлинг Халанд, е прогласен за норвешки фудбалер на годината за 2025 година, објави прес-службата на Норвешката фудбалска асоцијација.

Дваесет и петгодишниот напаѓач ја освои наградата шести пат по ред.

Во сезоната 2024/25, Халанд одигра 48 натпревари за Манчестер сити, постигнувајќи 34 гола и пет асистенции.

За норвешката репрезентација во 2025 година, напаѓачот постигна 17 гола и имаше две асистенции во девет натпревари.

Ливерпул мисли и на иднината, па така сега го доведе 18-годишниот сенегалски дефанзивец Мор Тала Ндиаје, кој на „Енфилд“ пристигнува од клубот Амити ФЦ, чиј сопственик е поранешниот напаѓач на Челси, Демба Ба. Трансферот, според медиумите, изнесува околу еден милион фунти.

Иако сумата не е значајна за англискиот гигант, во Ливерпул веруваат дека добиле фудбалер со голем потенцијал. Ндиаје во почетокот ќе биде дел од У21 тимот на „црвените“, кој го води Роб Пејџ, каде ќе ја започне својата адаптација и развој со цел во иднина да се избори за место во сениорскиот состав.

„Ливерпул го комплетираше трансферот на дефанзивецот Мор Тала Ндиаје. Младиот сенегалски централен бек, кој неодамна наполни 18 години, доаѓа од Амити ФЦ и ќе настапува за нашиот У21 тим. Ндиаје ја претставуваше својата репрезентација на Светското првенство за играчи до 17 години во ноември, каде одигра четири натпревари и стигна до нокаут фазата. Исто така има настапи и за селекцијата на Сенегал до 18 години“, стои во соопштението на Ливерпул.

Она што летоска изгледаше како добар потег за Јувентус, полека се претвора во сериозен проблем за клубот од Торино. Позajмицата на Даглас Луиз во Нотингем форест не оди според планот, бидејќи бразилскиот играч од средниот ред не добива доволно минути во Премиер лигата, што го става под знак прашалник откупот на неговиот договор вреден 28,5 милиони евра, пренесува ,Тутоспорт”.

Да потсетиме, договорот меѓу двата клуба вклучуваше платена позајмица од три милиони евра и обврска за откуп во износ од 28,5 милиони евра, преку фиксен дел и бонуси. Клучниот услов за активирање на откупот беше Луиз да одигра најмалку 15 натпревари во Премиер лига, со минимум 45 минути на терен.

До овој момент, Бразилецот има само пет настапи, што е далеку под потребното.

Ситуајата сериозно го загрижи Јувентус, кој мора брзо да реагира. Во Торино веќе се разгледува ново сценарио, повлекување на Даглас Луиз од позајмица уште во јануари. Оваа можност станува уште пореална доколку продолжат преговорите што Форест ги води со Интер за ангажман на Давиде Фратези.

Во Јувентус се свесни дека 28,5 милиони евра се доведени во ризик и веќе работат на изнаоѓање алтернативно решение, нудејќи го играчот на други клубови од Премиер лигата. Иако Луиз и понатаму има добра репутација на англискиот пазар, засега конкретен интерес нема.

Лондонски Арсенал има намера да му достави понуда на Реал Мадрид за турскиот напаѓач Арда Ѓулер. Договорот би можел да достигне 80 милиони евра, според новинарот и инсајдер Екрем Конур, кој го објави ова на својот профил на социјалните мрежи.

Претходно се шпекулираше дека Ливерпул и Манчестер Јунајтед се заинтересирани за играчот. Сепак од Реал Мадрид не сакаат да го пуштат 20-годишниот напаѓач, гледајќи го како дел од долгорочниот проект на клубот.

Во тековната сезона 2025/26, напаѓачот одигра 27 натпревари, постигна три гола и имаше осум асистенции. Арда Ѓулер игра за Реал Мадрид од јули 2023 година. Договорот на турскиот играч од средниот ред со клубот е до јуни 2029 година, а неговата пазарна вредност се проценува на 90 милиони евра.

Според пишувањата на турските медиуми, екипата на Трабзонспор го насочи вниманието кон Роџер Мато, 22-годишнот лево крилен играч од Уганда кој игра за нашиот најтрофеен клуб Вардар.

Мато, кој е ѕвезда оваа сезона во ПМФЛ со 15 гола и 2 асистенции во 17 настапи, доби позитивни извештаи од скаутинг тимот. Со одобрение на главниот тренер Фатих Теке, раководството започна официјални преговори за трансферот. ФК Вардар вчера излезе со соопштение дека откупната клаузула на Мато ќе биде 1,5 милион евра, но се шпекулира дека тој би можел да ги исполни очекувањата на Трабзонспор.

Турските медиуми исто така пренесуваат дека пред неколку дена шкотскиот тим Хартс му понудил на Вардар 350.000 фунти за Мато, но клубот ја одбил понудата.

Натпреварот од Бундеслигата меѓу Сент Паули и Лајпциг, кој требаше да се игра в сабота, е одложен поради обилен снег и мраз на теренот на стадионот во Хамбург, соопшти денеска Германската фудбалска лига.

Германија е погодена од обилни снежни врнежи и температури под нулата во последните денови, кои се очекува да продолжат и во текот на викендот. Фудбалската сезона во Германија продолжува овој викенд, откако заврши тринеделната зимска пауза.

„Одговорните лица на стадионот Милернтор го затворија објектот по консултација со локалните власти. Ова се должи на обилните снежни врнежи и мраз низ целиот стадион и поврзаните безбедносни ризици за сите учесници на денот на натпреварот, како и критичната општа ситуација во Хамбург. Наскоро ќе биде објавен нов датум за натпреварот“, соопшти Бундеслигата.

Под знак прашалник е одигрувањето и на дуелите Унион Берлин – Мајнц 05 и Вердер Бремен – Хофенхајм.