Напаѓачот Душан Влаховиќ призна дека не е ѕвезда од калибарот на Нејмар или Лионел Меси, но ги истакна своите цели за Јувентус поради извештаите за интерес од Челзи и Пари Сен Жермен.

24-годишниот српски репрезентативец продолжи да импресионира во Торино и покрај неговите борби и честата изолација во шемата на Масимилијано Алегри, постигнувајќи 16 гола во 28 натпревари во Серија А.

Влаховиќ има уште две години од актуелниот договор со Јувентус и се поврзува со потенцијален летен трансфер. Неговата иднина зависи и од тоа кој ќе го води гигантот од Торино следната сезона.

Во интервју за францускиот весник „Л’Екип“, Србинот зборуваше за битката на Јувентус за пласман во Лигата на шампионите следната година и за трофејот во турнирот во Купот на Италија, каде вечерва ќе ги одмери силите со Лацио во реваншот од полуфиналето на ова натпреварување.

„Би било одлично, се разбира, ако успееме во двата потфати, но не можеме да бидеме целосно задоволни. Таква е психологијата на клубот поради барањата на историјата. Имавме можност да се бориме за титулата.

Минатата сезона беше таква бидејќи не бев добар физички и имав потешкотии. Оваа година се чувствувам добро, тоа е единственото нешто што се промени, инаку правам се на ист начин. Работам напорно и концентриран на моето опоравување. Оваа сезона имам 17 гола, вклучувајќи го и Купот на Италија, но можев да направам многу подобро“, додаде напаѓачот.

Легендарниот тренер, Фабио Капело, зборувајќи за Ламине Јамал, младата ѕвезда на Барселона, се осврна на темата фудбалски генијалци и спомна неколку играчи.

Меѓу нив го нема Кристијано Роналдо. Запрашан дали Јамал може еден ден да биде нешто слично како Лео Меси во Барселона, италијанскиот тренер многу јасно објасни како стојат работите.

„Ламин е брилијантен и многу интересен но, нема да биде брилијантен како Меси, Пеле и Марадона. Тие беа генијалци”, вели Капело.

Европската фудбалска унија (УЕФА) ќе им дозволи на селекторите во своите репрезентации за претстојното Европско првенство во Германија да повикаат 26 фудбалери, тројца повеќе од сегашниот лимит, објавија денеска британските медиуми.

Како што објави Скај, Националниот комитет за натпреварување на УЕФА на состанок одржан во понеделник одлучи да им дозволи на селекторите да доведат уште тројца играчи, по предлогот на некои селектори да се зголеми бројот на играчи поради згуснатиот натпреварувачки распоред оваа сезона и можните повреди.

УЕФА и на претходното Европско првенство во 2021 година, дозволи проширување на списокот играчи за ова натпреварување, по пандемијата на коронавирус, а како што објави Скај, се чини дека тоа отсега ќе стане норма за репрезентативните натпреварувања на УЕФА.

Одлуката сè уште не е официјално донесена, бидејќи мора да ја одобри Извршниот комитет на УЕФА, но според извештаите, се очекува тоа да биде формалност и да биде потврдено до крајот на оваа недела.

Европското првенство ќе се одржи од 14 јуни до 14 јули во Германија.

Чави Хернандез, е подготвен да остане на клупата на каталонскиот клуб до 2025 година, објави денеска весникот „Мундо Депортиво“.

Според изворот, Чави во блиска иднина ќе има средба со претседателот на Барселона, Жоан Лапорта и спортскиот директор Деко за да разговараат за можното продолжување на соработката.

Чави во на јануари објави дека ќе ја напушти Барселона на крајот од актуелната сезона.

Неговиот актуелен договор со клубот има важност до лето 2025. Самиот Чави во неколку наврати истакна дека ја донел единствената правилна одлука и нема да ја промени.

Тренерот на фудбалерите на Арсенал, Микел Артета, не крие дека сака да го ангажира членот на Вулверхемптон, Педро Нето.

Португалецот кој игра како крилен напаѓач за премиер-лигашкиот клуб, има стандардно место и во неговата селекцијата. Кариерата ја започна во Брага, која го позајми во италијанскиот Лацио во летото во 2017.

По две сезони поминати на „чизмата“, тој замина во Англија и го облече дресот на „волците“.

Каталонски „Спорт“ пренесува дека примарна трансфер цел на Барселона ова лето ќе биде ѕвездата на Ливерпул, Луис Диаз.

Ливерпул не размислува за трансфер, но самиот фудбалер сака да ја промени средината и да се пресели во Шпанија.

Барселона поради финансиските проблеми тешко дека ќе може да го доведе Колумбиецот, но не се откажува од намерата.

„Спорт“ пренесува дека Барселона е спремна да продаде некој од ѕвездите во тимот како Рафиња и Де Јонг за да го доведе Луис Диаз.

Точно десет години откако ја напушти „Ла Масија“ и замина во Загреб, Дани Олмо би можел да се врати во Барселона.

Шпанецот од Лајпциг е меѓу приоритетите на Барса за сезоната 2024/25 во која ќе има промени и во тимот и на клупата од која ќе се повлече Чави Хернандез.

Во договорот со важност до 2027 година, тој има клаузула од 60 милиони евра и според каталонскиот „Мундо депортива“, ова е сумата што доколку сака ќе треба да ја плати претседателот на Барселона, Јоан Лапорта за него.

Фудбалерот од средниот ред на Барселона и холандски репрезентативец Френки де Јонг ќе отсуствува од теренот до крајот на сезоната поради повреда на скочниот зглоб, пренесува денеска ЕСПН.

Во вчерашното Ел Класико во рамки на 31. коло во Ла Лига во кое Барселона загуби од Реал Мадрид (2-3), Де Јонг беше изнесен од теренот на носилки во финишот на првото полувреме и заменет со Педри.

Според проценките, Де Јонг ќе се закрепне до почетокот на Европското првенство кое ова лето ќе се одржи во Германија и ќе може да се најде во составот на холандската репрезентација. Холандија на Европското првенство е во група со Франција, Полска и Австрија.

Оваа сезона 26-годишниот Де Јонг одигра 30 натпревари и постигна два гола.

Удинезе по последниот пораз од Верона во Серија А го отпушти Габриеле Чофи од тренерската позиција, а на негово место доаѓа легендарниот Фабио Канаваро.

Клубот соопшти дека 50-годишниот Канаваро потпишал договор до крајот на сезоната. Канаваро доаѓа на местото на Габриеле Чофи, кој беше отпуштен од должноста по петочниот пораз од директниот конкурент во борбата за опстанок, Верона.

Удинезе е 17. на табелата во Серија А со 28 бодови, колку што има и Фросиноне, кој е место подолу и во зоната на испаѓање.

Светски шампион со Италија во 2006 година и освојувач на „златната топка“, тренерската кариера ја започна како асистент во саудиски Ал Ахли во 2013 година. Една година подоцна, по препорака на Марчело Липи, тој стана шеф на стручниот штаб на Гуангжу Евергранде во Кина, а ова е негов прв ангажман во Серија А.

Манчестер Јунајтед со победа на пенали против второлигашот Ковентри се пласираше во финалето на ФА Купот каде што ќе игра против Манчестер Сити. Столчето на Тен Хаг веќе подолго време не е сигурно и клубот ги разгледува можните наследници.

Според информациите на новинарот на „Кикер“, Георг Холцнер, „црвените ѓаволи“ веќе стапиле во контакт со Томас Тухел кој на крајот од сезоната заминува од Баерн.

Формата под водство на Холанѓанецот е разнишана во последните неколку недели, а новиот сопственик Џим Ретклиф се очекува сигурно да се раздели со Тен Хаг без разлика каков ќе биде исходот во купот.

Тухел со Баерн не успеа да ја освои титулата во Бундеслигата и тоа е првпат да му се случи на овој клуб по 2012 година.