Букајо Сака и Арсенал постигнале договор за продолжување на соработаката, пренесуваат медиумите на Островот.

Приоритет на Арсенал беше продолжување на соработката со 21-годишниот Англичанец, кој на лето влегува во последната година од договорот.

Двете страни постигнале начелен договор и Сака ќе потпише петгодишен договор со неделна плата од 200.000 фунти.

Така Сака ќе стане еден од најплатените фудбалери во тимот, но „топџиите“ сметаат дека тој е иднината на кој ќе го градат тимот во следните години.

Тиери Анри изјави дека го предупредил Ромелу Ликаку пред да направи трансфер во Челзи.

Анри тогаш работеше во белгиската репрезентација и имал разговор со Лукаку. Французинот го советувал напаѓачот да не прави трансфер во Челзи, но Лукаку не го послуша. Се пресели на „Стенфорд Бриџ“ и после една лоша сезона се врати во Интер.

„Тогаш имавме дискусија. Му реков дека не треба да оди во Челзи, бидејќи ќе му биде тешко да игра поради начинот на кој игра Томас Тухел. Ромелу сака да биде таму каде што е. Само „нахрани“ го и тој ќе ви врати повеќекратно“.

„Тој е различен тип на играчи од оние што ги сакаат Тухел. Мислам дека и тој не би сакал да се врати кај Потер. Тој сака да остане во Интер“,  изјави Анри.

Тренерот на Манчестер јунајтед, Ерик тен Хаг е среќен што го освои првиот трофеј со англискиот клуб и верува дека ова е само почеток на едно враќање на тимот таму каде што припаѓа. Манчестер јунајтед го прекина постот без трофеј, момците предводени од Ерик тен Хаг ги израдуваа навивачите освојувајќи го англискиот Лига Куп откако го совладаа Њукасл со 2-0.

„Натпреварот го одигравме со голем дух, момците делуваа како тим и се бореа, дадоа се од себе. Не секогаш игравме убаво за око, но беше ефективно. Најважно е што го освоивме првиот трофеј. Овој трофеј ќе ни донесе многу инспирација, но и самодоверба. Ова се уште е почеток на враќањето на Манчестер јунајтед таму каде што припаѓа, што е освојување на трофеи и овој е првиот.

Кажав и пред натпреварот, Рафа Варан, Касемиро, Давид де Хеа, тие знаат како да освојуваат трофеи. Потребни ви се такви момци на теренот, не само од тактичка гледна точка, туку од психолошка. Тие внесуваат победнички менталитет во соблекувалната, и тоа ја прави разлика“, рече Тен Хаг.

Николо Заниоло погоди на пријателскиот натпревар меѓу Галатасарај и Аланијаспор кој заврши со победа од 4-2 за неговиот тим.

Поранешниот напаѓач на Рома, во игра влезе во 80. минута и постигна гол во судиското продолжение поставувајќи го конечниот резултат.

За Заниоло ова беа првите минути во дресот на Галатасарај.

Килијан Мбапе и Лионел Меси го здробија Марсеј во дербито за титула за ПСЖ да триумфира со 3-0, ама „светците“ останаа без нов играч пред реваншот за десет дена со Баерн Минхен, откако францускиот репрезентативец Перснел Кимпембе е загубен до крајот на сезоната.

Кимпембе има повреда на ахиловата тетива што значи најмалку пет месеци пауза, ако не и повеќе (Италијанецот Спинацола паузираше цела година), а оваа вест за потешката повреда на дефанзивецот ја соопшти тренерот на ПСЖ, Кристов Галтие.

Парижаните ќе ги сочекаат лекарските прегледи за точна дијагноза, но малкумина веруваат дека тие би биле поинакви од првичните проценки. Кимпембе веќе подолго време се мачеше со оваа повреда, а поради истата не беше дел од Франција на Светското првенство во Катар лани.

Оваа повреда на Кимпембе доаѓа откако ПСЖ веќе најмалку на еден месец поради оштетувања на скочниот зглоб го загуби и Нејмар, кој сигурно ќе го пропушти реваншот со Баерн во Минхен закажан за 8 март.

Манчестер Сити вчера го победи Борнмут со 1-4, но Пеп Гвардиола не беше во целост задоволен од она што го прикажаа неговите фудбалери.

Шпанскиот стратег испрати јасна порака до своите фудбалери дека мора да се залагаат до последната минута од натпреварот без разлика каков е резултатот на натпреварот.

„Повеќе пати сум им кажал на фудбалерите, дека ќе имаат проблем ако не ме слушаат. Со оглед на тоа колку пари земаат, мора многу да трчаат од почеток до крај. Со нивната заработка мора да играат 100% и кога водиме со 3-0 или 5-0…,

Има луѓе кои патуваат со часови да дојдат на нашите натпревари и да го гледаат најдоброто нив. Тие луѓе кои дошле на стадионот заслужуваат почит на најдобар можен начин“, изјави Гвардиола.

Во следното коло од Премиер лигата Манчестер Сити го чека потежок предизвик во натпреварот против Њукасл.

Напаѓачот на Милан, Златан Ибрахимовиќ, кој по долг период на рехабилитација се појави на вчерашниот меч со Аталанта, стана највозрасниот фудбалер што играл на официјален меч во дресот на „росонерите“.

 „Многу ми недостигаа навивачите, им благодарам што ми дадоа сила, адреналин и мотив да продолжам. Без нивна поддршка ќе беше многу тешко“, вели 41-годишниот Швеѓанец.  

Ибрахимовиќ сега има шанса да стане и највозрасниот играч кој постигнал гол во Серија А. Рекордот го држи Алесандро Костакурта кој погоди на 41 година и 25 денови.

Челзи направи вистински „бум“ на јануарскиот трансфер пазар и потроши повеќе од 300 милиони евра. Откако дојдоа новите сопственици, лондонските „сини“ се рекордери по трансфери во Европа, но не престануваат да трошат.

Англиските медиуми пренесуваат дека Челзи е блиску до реализација на трансферот на 15-годишниот еквадорски талент, Кендри Паез.

Еквадорскиот „бисер“ беше на мета на многу европски гиганти како Барселона, Манчестер Сити, Ливерпул и Баерн Минхен, но Челзи успеа да ја победи конкуренцијата.

Имено, Челзи сега ќе го купи Паез и ќе го остави во матичниот клуб во следните три години, додека не наполни 18 години.

Големиот број голови на Роберт Левандовски за Барселона се одлична вест за тимот, но тоа негативно ќе се одрази на клупската каса.

Во четвртокот против Манчестер Јунајтед, Левандовски го постигна својот 25 гол, а тоа значи дека ќе се активира една клаузула во договорот кој Барселона го има со Баерн Минхен. Радио „Каталонија“ пренесува дека поради тоа Барселона сега на Баерн мора да му исплати сума 1.25 милиони евра.

Во договорот има уште неколку клаузули од кои најбрзо се очекува исполнување на онаа за бројот на постигнати голови, а и за трофеите што може да се освојат до крајот на сезоната и се очекува во јуни Барселона на Баварците да им должи дополнителни 3,75 милиони евра.

Левандовски на Камп Ноу дојде во текот на летниот преоден рок и за него Барселона плати обештетување од 45 милиони евра.

Ливерпул се насочува кон играчот за врска на Интер и италијански репрезентативец, Николо Барела, пренесува „Газета дело Спорт“.

Приоритет на „црвените“ во летниот преоден рок ќе биде засилување на средниот ред, а најголема желба на Клоп е токму Барела. Последните месеци скаутите на Ливерпул во неколку наврати го следеле Италијанецот и веруваат дека идеално ќе се вклопи во стилот на Клоп.

Во Интер се запознати за интересот на Ливерпул за Барела, но нема лесно да се откажат од 26-годишниот играч за врска.

Сепак, Ливерпул не се откажува и спрема понуда од 60 милиони фунти и верува дека тоа ќе ги задоволи апетитите на Интер, кој има финансиски проблеми.