Пеп Гвардиола останува во Манчестер сити и следната сезона, тврдат англиските медиуми повикувајќи се на извори во клубот. Додека трае паузата во клупскиот фудбал, Гвардиола имал успешна средба со челниците на Сити. Наводно бил договорен нов едногодишен договор.

Сè уште ништо не е потпишано, а нема официјални изјави кои навестуваат таков исход, но во вестите кои доаѓаат од Островот се вели дека Гвардиола 99% ќе го потпише договорот до крајот на годината.

По заминувањето на спортскиот директор Аитор Чики Бегерстајн, и ангажманот на Хуго Вијана од Спортинг, се шпекулираше дека Гвардиола сигурно ќе си замине на крајот од сезоната.

Шпанецот пристигна во Сити во 2016 година кога започна доминацијата на „граѓаните“ во Премиер лигата и успеа да ја освои Лигата на шампионите на УЕФА. Во моментов тимот е во криза се наоѓа во серијата од четири порази, што на Сити му се случи прв пат во ерата на Гвардиола.

Германија и Холандија го освоија првите две места во Групата 3, во А дивизијата и се пласираа во четвртфиналето во Лигата на нации. Двете селекции на домашен терен забележаа убедливи победи над Бих, односно Холандија.

Германија ја декласира БиХ со 7-0 и ја испрати назад во Б дивизијата.

Домашните поведоа во втората минута со голот на Џамал Мусијала на асистенција на Џошуа Кимих, кој потоа во 23. минута му аиситираше и на напаѓачот на Борусија Менхенгладбах, Тим Клајндинст.

Во 37. минута Германија го постигна третиот гол, кога Флоријан Вирц му асистираше на Каи Хаверц.

Асот на Баер потоа погоди два пати, во 50. и 57. минута, а дебаклот на БиХ беше комплетиран со головите на Лирој Сане (66′) и Клајндинст (79′).

Холандија убедливо славеше над Унгарија со 4-0. „Лалињата“ по два гола постигнаа во двете полувремиња. Два пенали доби Холандија во првиот дел, стрелци беа Вегхорст и Гакпо. Во второто полувреме по еден гол постигнаа Дамфрис и Копмејнерс.

Новиот менаџер на фудбалерите на Манчестер Јунајтед, Рубен Аморим, изјави дека фактот што ќе работи со релативно млади играчи нема да биде оправдување за евентуален неуспех.

„Не сакам да кажам дека ни треба време бидејќи сме млад тим. Фудбалерите се тука и мораат да бидат подготвени за предизвикот, младоста не смее да ни биде алиби. Секогаш ќе одиме на победа“, вели Аморим.

Тој ќе дебитира на клупата на „црвените ѓаволи“ на 24 ноември на мечот со Ипсвич во рамките на Премиер-лигата.

Омер Топрак кој најголем дел од кариерата помина во Бундеслигата одлучи да стави крај на кариерата на 35 години.

Топрак во кариерата во Германија го носеше дресот на: Баер Леверкузен, Борусија Дортмунд и Вердер Бремен, а во најсилната германска конкуренција одигра вкупно 263 натпревари.

Своевремено Топрак беше и репрезентативец на Турција за која одигра 27 натпревари.

„По 16 години со насмевка и солзи во очите време е да ја завршам кариерата“, објави Топрак.

Последните две години од кариерата ги помина во неговата татковина каде што го носеше дресот на Анталијаспор.

Марио Хермосо, не ја исклучува можноста за враќање во Ла Лига. Централниот дефанзивец го напушти Атлетико Мадрид по крајот на минатата сезона, а во последните денови се зборува дека Реал Мадрид покажува интерес за него.

„Читав дека сум меѓу фудбалерите кои Реал ги следи по повредата на Едер Милитао. Многу пријатели ме прашуваат за тоа. Тоа не е првпат. Секогаш е голема чест кога те поврзуваат со најголемите клубови. Тренирав во академијата на Реал Мадрид и сум благодарен за сè што научив таму“, изјави Хермосо.

„Бев во академијата на Реал Мадрид и сум благодарен за сè што придонесоа за мојот развој“, истакна тој за „АС“.

„Не успеав да се етаблирам на „Сантијаго Бернабеу“, но добив можност да преминам во Еспањол. Горд сум на тој период. Во академијата на Реал има момци со огромен потенцијал. Се надевам дека ќе добијат шанса и ќе ја искористат“, сподели 29-годишниот дефанзивец.

„Најголемиот дел од мојата кариера го минав во Шпанија. Го сакам фудбалот што се игра во Ла Лига. Секогаш е полесно да си во својата земја. Не ја исклучувам можноста еден ден да се вратам“, додаде Хермосо.

Фудбалската репрезентација на Македонија утре на Националната арена го игра последниот натпревар од Лигата на нации. Противник на нашиот национален тим е селекцијата на Фарски Острови, со која единствено ремизиравме (1-1) во овој циклус. На останатите мечеви Македонија оствари победа без примен гол.

Капитенот Енис Барди ја повика и публиката да дојде во поголем број, а мотиви за триумф секако постојат.

„Мислам дека ова ќе ни биде рекорд ако победиме, ќе биде добро за сите нас да го завршиме циклусот во Лигата на нациите со победа. Знаеме дека противникот ќе се брани во најголем тек од натпреварот. Првиот натпревар во Торшавн беше знак дека не смее да се потцени ниту еден противник, мислам дека многу научивме од тој дуел. Нè интересираат само трите бода. Се надевам дека навивачите ќе бидат наша мотивација, да дојдат во поголем број бидејќи ни недостигаа против Летонија. Публиката е наш дванаесетти играч, сакаме полн стадион за добар крај на циклусот“, изјави Барди.

Фудбалерот на Ливерпул кој како позајмен фудбалер ги брани боите на Салцбург, Стефан Бајчетиќ стави крај на сите дилеми кога во прашање е неговата репрезентативна кариера.

Во Србија се надеваа и веруваа дека Бајчетиќ може да ја избере нивната репрезентација, но тоа не се случи. Како што порача самиот фудбалер, тој се чувствува како Шпанец и ќе игра за Шпанија.

„Роден сум во Шпанија, растев во Шпанија, семејството ми е во Шпанија и се чувствувам како Шпанец. Горд сум што ја претставувам Шпанија“, изјави Бајчетиќ.

Бајчетиќ е роден во Виго и шанса да одигра неколку натпревари во првиот тим му даде Јирген Клоп минатата сезона. Сепак, Арне Слот одлучи да го испрати на позајмица и да собира искуство.

23-годишниот германски дефанзивец Јан Аурел Бисек стави потпис на нов договор со Интер според кој ќе остане во Милано до 2029 година.

Бисек оваа сезона игра фантастично, особено се истакна на мечот против Арсенал во Лигата на шампионите на кој беше импресивен.

Брзо по тој меч доаѓа информацијата од Интер дека го продолжува договорот со Бисек.

Тренерот на Арсенал Микел Артета подготвува трансфер-бомба и тоа уште во јануари, а раководството на Арсенал е подготвено да испрати понуда од 100 милиони евра до Вест Хем за нивниот офанзивен фудбалер за врска, Мохамед Кудус.

Кудус оваа сезона има постигнато два гола, но доби и суспензија од три натпревари поради црвен картон, додека за целиот период во Вест хем има постигнато 18 гола.

Македонската фудбалска репрезентација денеска го одработи последниот тренинг пред утрешниот меч со Фарски острови во последната рунда во Лигата на нации.

Мечот со Фараните ќе биде одигран в недела од 15.00 часот на Арената – „ Тодор Проески“ во Скопје. Македонија го обезбеди првото место во групата и се избори за пласман во погорениот сегмент.

Според селекторот, Благоја Милевски, на утрешниот меч поради повреда да настапи нема Eлиф Елмас додека сите други ќе му бидат на располагање.