фудбал

Крај на драмата – Роналдо го напушти Манчестер Јунајтед

Конечно се стави крај на драмата во која главни улоги имаа Кристијано Роналдо, Ерик тен Хаг и сопствениците на Манчестер Јунајтед.

Водечките луѓе на клубот од Олд Трафорд преку официјално соопштение ја потврдија разделбата со Кристијано Роналдо. Во соопштението се вели дека е постигната спогодба Роналдо да го напушти Манчестер Јунајтед, и таа одлука стапува на сила веднаш. Клубот му се заблагодари на Роналдо за неговиот огромен допринос во клубот за кој постигна 145 гола на 346 натпревари.

Кристијано Роналдо во својата изјава вели дека е подготвен за нови предизвици во нов клуб, и дека навивачите на Манчестер Јунајтед засекогаш ќе останат во неговото срце.

Бускетс најави крај на својата репрезентативна кариера

Капитенот на шпанската фудбалска репрезентација, Серхио Бускетс, најави дека Мундијалот во Катар ќе биде негов последен на кој ќе учествува како фудбалер.

Првотимецот на Барселона посакува во репрезентативна пензија да замине со титулата на светски шампион.

„Оваа генерација на Шпанија има квалитет и капацитет да се закити со титулата светски шампион и за тоа ни се потребни седум победи. Првата од тие победи треба да ја оствариме против Костарика и ние сме потполно фокусирани на тој тој дуел. Ова е мое четврто светско првенство и сум возбуден што повторно добив прилика да ја претставувам својата земја. Како што стојат работите ова ќе биде мој последен Мундијал“, изјави 34-годишниот Бускетс.

Кеирош: Ако не ја бодрат репрезентацијата, подобро да се вратат дома

Првиот натпревар на Иран на Светското првенство во Катар донесе измешани емоции кај играчите и стручниот штаб, пред се поради високиот и болен пораз, но и поради случувањата во земјата кои направија условите за игра да бидат уште потешки.

Во период кога еден дел од граѓаните во Иран се борат против режимот во оваа земја и се трудат жените да имаат исти права како мажите, фудбалерите го изразија својот револт кон случувањата во татковината такашто не ја пееја националната химна, но поддршката која ја испратија до сонародниците кои протестираат не наидоа на поздрав од сите навивачи.

Фудбалерите на Иран беа исвиркувани од сопствените навивачи по поразот од 6:2, а тоа не му се допадна на искусниот Кеирош кој од неодамна е селектор на оваа селекција.

„Ова за мене не беше пораз, ова за мене беше добар тренинг. Знаевме дека нема што да бараме против Англија, ова беше подготовка за следните натпревари. Резултатот не беше важен, важно е што ќе направиме со Велс и САД. За нас е тешко да мислиме само на натпреварот после тоа што се случува во Иран. Тешко е да се концентрираш, но сигурен сум дека ќе се насочиме на фудбал на следните два меча. Дојдовме тука поради фудбал и мора да ја завршиме нашата работа. Не ми е јасно само едно. Не знам зошто навивачите се свртеа против тимот. Не се бодри тимот само кога победуваш, туку и кога не оди добро. Ако се тука да не исвиркуваат, подобро да останеа дома“, порача Карлос Кеирош.

Гвардиола го продолжи договорот со Сити

Медиумите во Англија пренесуваат дека тренерот на Манчестер Сити, Пеп Гвардиола, го продолжи договорот со англискиот клуб до јуни 2025 година.

Претходниот договор на Гвардиола со шампионот на Англија имаше важност до јуни 2023 година. Шпанецот седна на клупата на Сити во 2016 година, и со клубот има освоено 11 трофеи.

Некои англиски медиуми претходно шпекулираа дека постои можност Гвардиола да стане селектор на Шпанија или да тренира клуб од американската МЛС лига, меѓутоа тој одлучи да остане во Манчестер и како главна цел постави освојување на Лигата на шампиони.

Нкунку за 60 милиони евра на „Стемфорд бриџ“

Челзи го договори трансферот на ѕвездата на Лајпциг, Кристофер Нкунку, кој ќе пристигне на „Стенфорд Бриџ“ следното лето.

Нкунку веќе потпишал преддоговор со Челзи, а „сините“ денес постигнаа договор со Лајпциг. Нкунку во договорот има откупна клаузула од 60 милиони евра, а Челзи се согласил да плати 70 милиони за да ја победи конкуренцијата.

Нкунку минатата сезона беше најдобар фудбалер во Бундеслигата и го привлече вниманието на многу европски гиганти, но сепак реши да остане уште една сезона во Лајпциг.

Немаше среќа и се повреди само три дена пред Мундијалот, а на лето ќе се пресели на „Стенфорд Бриџ“.

Сака и Белингем соборија рекорди во победата на Англија над Иран

Англија одигра одличен натпревар против Иран на отварањето на Светското првенство во Катар, постигнувајќи шест гола.

Три од нив беа од 19-годишниот Џад Белингем и 21-годишниот Букајо Сака, кој постигнаа два гола. Двата таленти на Англија на тој начин испишаа историја бидејќи беше првпат двајца играчи на Англија на возраст од 21 или помалку да постигнат гол во ист натпревар на Светското првенство.

Самиот Белингем стана вториот најмлад фудбалер во Англија кој се пријавил за Светското првенство. Играчот од средниот ред на Борусија Дортмунд има 19 години и 145 дена.

Само Мајкл Овен успеа да го направи тоа на порана возраст. Во 1998 година, напаѓачот на Ливерпул настапи на возраст од 18 години и 190 дена.

Меси: Поразот од Саудиска Арабија е голем удар за нашата репрезентација

Капитенот на аргентинската фудбалска репрезентација, Лионел Меси, изјави дека поразот од селекцијата на Саудиска Арабија на стартот од СП е голем удар за неговиот национален тим.

Саудиска Арабија го направи досега најголемото изненадување на Мундијалот во Катар, совладувајќи ја Аргентина со 2:1.

„Знаевме дека Саудиска Арабија има добри играчи, но нема изговор за поразот. Ќе бидеме поединствени од било кога. Оваа група на играчи е силна и тоа ќе го покажеме на теренот. Долго време не се имаме најдено во ваква ситуација, но сега мораме да покажеме дека сме спремни да се издигнеме над оваа ситуација“, изјави Меси после натпреварот.

Аргентина во следното коло од групата Ц ќе игра против Мексико.

Сергеј Милинковиќ Савиќ во јануари се сели во Јуве?

Играчот од средниот ред на Лацио и српска репрезентација, Сергеј Милинковиќ-Савиќ се договорил со Јувентус, а според договорот ќе заработува 6 милиони евра + бонуси по сезона. Ова го објави новинарот Алфредо Педула на Твитер.

Според изворот, 27-годишниот Милинковиќ-Савиќ одбил да го продолжи договорот со сегашниот тим. Тој сакаше износот на обештетувањето во неговиот договор да не биде поголем од 40-50 милиони евра, но претседателот на Лацио, Клаудио Лотито сака 70 милиони евра за продажба на српскиот играч за врска.

Милинковиќ-Савиќ постигна пет гола и даде седум асистенции на 20 натпревари во сите натпреварувања оваа сезона. Договорот меѓу двете страни истекува во летото 2024 година.

Сопствениците на ПСЖ одбија продажба на клубот

Сопственикот и претседател на Пари Сен Жермен, Насер Ал-Хелаифи изјави дека одбил голема понуда за продажба на клубот, но изразил подготвеност да продаде мал дел од клубот.

„Тие понудија повеќе од 4 милијарди евра. Нема целосно да го продадеме клубот, но мал процент – зошто да не? Размислуваме за различни предлози.

Другите клубови и луѓето секогаш зборуваат за ПСЖ и мислат дека имаме само пари и ги трошиме – тоа не е точно. Ако имате компанија, треба да вложите пари во неа. Ова се однесува на бизнисот и фудбалот. Го купивме клубот за 70 милиони евра и сега вреди над 4 милијарди евра.

Имаме различни понуди. Да, ова е фантастичен бизнис. Дали правиме добар проект? Верувам дека го правиме тоа. Во фудбалот вие ги донесувате одлуките. Може да донесете погрешни одлуки. И ние сме искрени со себе, даваме се од себе. Го однесовме клубот од каде што бевме таму каде што сме денес. Мислам дека треба да бидеме горди на ова“, изјави Ал-Хелаифи.

Проблем за Германија: Сане го пропушта дуелот со Јапонија

Според пишувањата во германските медиуми, репрезентативецот на Германија, Лерој Сане, поради проблеми со коленото ќе го пропушти првиот натпревар во групата Е против селекцијата на Јапонија.

Засега не е познато колкав период селекторот Флик ќе биде без еден од своите најдобри играчи, но се чека детален извештај од лекарскиот тим на репрезентацијата.

Натпреварот помеѓу Германија и Јапонија се игра во среда со почеток во 14.00 часот.

«< 474 475 476 477 478 >»