Аргентинскиот напаѓач Лионел Меси е единствениот од репрезентацијата кој ќе биде сам во соба во Доха, пишува „Оле“.

Интересно е тоа што ова му се случува на 35-годишниот капитен на аргентинската репрезентација за прв пат на големи натпреварувања. Претходно, на собирот на тимот, тој секогаш бил со Серхио Агуеро, но напаѓачот стави крај на кариерата. После тоа, Меси секогаш беше сам додека е во националниот тим – на пример, за време на квалификациите за Светското првенство во 2022 година.

На Светското првенство во 2010 година, Меси ја делеше собата со Хуан Себастијан Верон, а на следните два турнири – со Агуеро. Во моментов Николас Отаменди и Родриго де Пол ќе бидат во соседната соба со Меси, а Леандро Паредес и Анхел Ди Марија ќе се наоѓаат во собата спроти Меси.

Претседателот на УЕФА, Александар Чеферин, изјави дека дека е сигурен оти Светското првенство во Катар ќе биде одлично организирано, но се надева дека во иднина нема повеќе да има „зимски “ Мундијали.

„Не чека спектакл, еден месец на извонреден фудбал, и верувам дека повторно европска репрезентација ќе биде освојувач на шампионската титула. Од 2006.година шампионите на СП доаѓаат од Европа, а пред четири години во Русија, сите полуфиналисти беа од нашиот континент. Единствени селекции кои можат да парираат се Бразил и Аргентина“, изјави првиот човек на УЕФА.

Андрес Иниеста е човекот кој и донесе најголема фудбалска историја на шпанската фудбалска репрезентација, бидејќи тој беше стрелец на голот кој на „фуријата“ и ја обезбеди толку посакуваната титула на Светските првенства.

12 години по неговиот незаборевен гол во Јужна Африка, Дон Андрес верува дека актуелната селекција на Луис Енрике е зрела за највисоки дострели, но тврди дека на мундијалот ќе навива само за Шпанија и за никој друг.

Во интервјуто за шпанска „Марка“, Иниеста беше директно запрашан дали Лионел Меси и Аргентина ќе бидат негова резервна опција на мундијалот, по што легендата на Барса го дава следниот одговор:

„Ако не победи Шпанија, навистина не ми е гајле кој ќе го освои мундијалот. Имам соиграчи во многу репрезентации и би се радувал за нив“.

Селекторот на Шпанија, Луис Енрике смета дека неговата репрезентација е една од фаворитите за трофеј на Мундијалот во Катар, но ако не се оствари тоа, тогаш има свои фаворити.

Енрике би сакал да ги види Лионел Меси со Аргентина, или Луис Суарез со Уругвај да го подигнат трофејот. Тој им беше тренер на двајцата ветерани во Барселона од 2014 до 2017 година, и смета дека двајцата заслужуваат да заминат во фудбалска пензија со освоена светска титула.

„Ако не победиме ние, тогаш сакам титулата да ја освои Аргентина. Не би било фер за фудбалер како Меси да се пензионира без да го освои Мундијалот. Истото важи и за Уругвај и Луис Суарез“, изјави Енрике.

„Првата цел е да се заврши на првото место во групата. Не се плашиме од никого. Се надевам дека Шпанија ќе биде изненадување на турнирот, но за другите, не за мене, бидејќи ги знам нашите квалитети“, додаде шпанскиот селектор.

Првиот човек на ФИФА, Џани Инфантино, повика на прекин на воените дејствија во Украина за време на одржување на Светското првенство во Катар.

Инфантино својот предлог го истакна за време на одржувањето на самитот Г-20, кој се одржува на Бали, а на кој свое учество зедоа лидерите на најбогатите држави во светот. Претседателот на ФИФА потенцира дека СП е можност да се стопира војната во Украина барем за време на траењето на турнирот во Катар.

Светското фудбалско првенство ќе се одржи од 20 ноември до 18 декември.