Фудбалерите на Милан се пласираа во финалето на италијанскиот Суперкуп, откако во Ријад, во второто полуфинале го победија Јувентус со 2-1 (0-1).

„Старата дама“ од Торино имаше се во свои раце во поголемиот дел од натпреварот, откако поведе во 21. минута со голот на Кенан Јилдиз.

Во 70. минута Локатели аматерски реагираше, направи пенал, кој Кристијан Пулишиќ го претвори во 1:1.

Пет минути подоцна, Федерико Гати си постигна автогол по центаршутот на Муса од десната страна.

Финалето во Суперкупот ќе се одигра во понеделник, противник на Милан ќе му биде градскиот ривал Интер.

Фудбалерите на Валенсија и Реал Мадрид вечерва на „Месталја“ го одиграа натпреварот од 12. коло, кој беше одложен во октомври поради поплавите кои го погодија овој дел од Шпанија.

Во турбулентен натпревар со многу пресврти, Реал во последните минути дојде до победа од 2-1 со играч помалку.

Уго Дуро го постигна воведниот гол за Валенсија, додека Лука Модриќ израмни во 85.минута, Џуд Белингем направи целосен пресврт во 96.минута, по катастрофалните грешки на Фулкие и Гиљамон.

Столе Димитиревски во првиот дел имаше две брилијантни интервенции, на стартот од мечот кога го сопре ударот на Валверде и во финишот на првиот дел кога му одбрани на Винисиус.

Џуд Белингем во 55.минута не реализираше пенал, топката заврши во стативата, а четити минути подоцна ВАР го поништи голот на Мбапе.

Во 80. минута Винисиус Жуниор доби директен црвен картон. Крилниот напаѓач на Реал Мадрид го удри Димитриевски и беше исклучен по прегледот на снимката.

Валенсија имаше шанса во 100.минута да изедначи, но по соло акцијата на Риоха и ударот што го упати од 20 метри топката заврши во стативата.

На овој натпрвар Лука Модриќ со 39 години и 116 дена стана најстариот играч кој постигнал гол за Реал Мадрид на официјален натпревар. Тој го собори рекордот на Ференц Пушкаш од 1966 година. Тој постигна гол на 39 години и 15 дена.

Реал Мадрид победи и се искачи на првото место во поредокот во Ла Лига со 43 бода, два повеќе и натпревар повеќе од градскиот ривал Атлетико.

Некогашниот македонски репрезентативец Дарко Тасевски е назначен за привремен тренер на бугарскиот прволигаш Левски Софија.

Тасевски ќе работи со тимот и ќе ги води тренинзите се додека раководството не пронајде конечно решение.

Ќе потсетиме, Тасевски најголемиот дел од својата кариера го помина токму во Левски.

Aнглискиот шампион од 2016 година, Лестер Сити, се соочува со сериозен проблем. На клубот Фудбалската асоцијација ќе му одземе бодови, што дополнително ќе влијае во борбата за опстанок во лигата.

Лестер минатото лето се спаси од казна со „измама“, за прекршување на финансиските правила за сезоната 2022/23. Фудбалската асоцијација не ги казни поради тоа што финансискиот извештај го доставија откако веќе испаднаа од лигата.

Клубот сега чека одлука за можна казна за загуби од 92,5 милиони фунти и 90 милиони фунти за финансиските години 2022 и 2023 година. Клубовите од Премиер лигата може да имаат загуби од 105 милиони фунти во период од три години.

Најдоцна до 13. јануари ФА ќе го извести клубот дали е покренато обвинение за прекршување на равилата за одржливост.

Според британските медиуми, клубот се надева дека и овојпат ќе ја избегне најлошата казна (одземање на бодови). Доколку тоа се случи клубот со една нога ќе биде во Втората лига.

Фудбалерот на Манчестер Сити, Бернардо Силва, процени дека неговиот тим нема шанси да се бори за титулата во Премиер-лигата. „Граѓаните“ сега заостануваат 14 бодови од лидерот Ливерпул.

„Во моментов треба само да се помириме со реалноста бидејќи ние сме само шести. Во фудбалот нема невозможни работи но, нема сомневање дека сме надвор од борбата за титулата“, вели Силва.

Манчестер Сити утре ќе го пречека Вест Хем во рамките на 20-то коло во Премиер Лигата.

Фудбалерот на Ливерпул, Федерико Киеза, побарал да биде испратен на позајмица во некој италијански клуб.

Киеза минатото лето се пресели од Јувентус во Ливерпул за 12 милиони евра, но одигра само четири натпревари или 123 минути за клубот од „Енфилд“.

Тој сака поголема минутажа, а како што пренесуваат италијанските медиуми, за него се заинтересирани Милан, Рома и Наполи.

„Мирор“ објави дека управата на Ливерпул ќе му дозволи на 27-годишниот играч да замине на позајмица, но дека голем проблем е што ниту еден италијански клуб не е подготвен да плати ниту половина од неговата годишна плата од 7,5 милиони евра.

Затоа, Ливерпул ќе мора да преземе дел од платата на Киеза.

Киеза во кариерата играше за Фиорентина и Јувентус, за италијанската репрезентација одигра 51 натпревар и постигна седум гола.

Раководството на Милан покажува сериозен интерес за крилниот напаѓач на Лион, Рајан Черки, пренесува „Калчомеркато“.

Черки е офанзивен фудбалер кој може да игра и како плејмејкер, но и по крилните позиции. Тој е продукт на школата на Лион и важи за најголем француски талент во моментов.

Лион има финансиски проблеми и ги стави сите фудбалери на продажба, па Милан сака да ја искористи таквата ситуација.

Меѓутоа, конкуренцијата за потписот на 21-годишниот фудбалер е голема бидејќи интерес за него покажуваат неколку европски гиганти.

Галатасарај е во напредни преговори со ПСЖ за трансфер на дефанзивецот Милан Шкрињар, пренесуваат француските медиуми.

Скринар не е среќен со неговиот статус во ПСЖ бидејќи не игра многу и е спремен да ја промени средината.

Јувентус е заинтересиран за неговиот потпис, но Галатасарај сака да ја добие битката и да го „украде“ пред носот на „старата дама“.

Шкрињар му кажал ДА на турскиот гигант, кој сака да го доведе на позајмица со право на откуп следното лето.

Тренерот на фудбалерите на Реал Мадрид, Карло Анчелоти, не сакаше да ги коментира најавите дека бекот на Ливерпул, Тренд Александар -Арнолд, од наредното лето ќе се пресели во неговиот состав.

„Ќе видиме. Тоа е единственото нешто што можам да го кажам. Сега сме фокусирани на мечевите. Не сакам да зборувам за тоа бидејќи сега не е моментот. Во секој случај, задоволен сум од составот што го имаме“, вели тренерот на „кралевите“.

Поранешниот напаѓач на Атлетико Мадрид и Челси, Диего Кошта го напушта бразилскиот клуб Гремио како слободен играч по истекот на неговиот договор.

Во Гремио се пресели во февруари 2024 година, а во последната сезона од бразилскиот шампионат Бразилеирао БЕТАНО, 36-годишниот напаѓач одигра 14 натпревари, на кои постигна гол и 2 асистенции.

Гремио заврши на 14-то место, со што заработи квота за вториот најмоќен меѓународен турнир во Јужна Америка, Копа Судамерикана.