Британските и шпанските медиуми пренесуваат дека фудбалскиот клуб Барселона е подготвен да му го понуди на Ливерпул Холанѓанецот Мемфис Депај во замена за Бразилецот Роберто Фирмињо.

Според информациите ваквиот трансфер би се реализирал на почетокот од следната година.

Депај не се наметна кај тренерот на Барса Чави Ернандез, а оваа сезона за каталонскиот клуб има одиграно само 131 минута. Депај со клубот има договор до крајот на сезоната.

Фирмињо е подготвен за нов предизвик во кариерата, бидејќи не е стартер во тимот предводен од Јирген Клоп. Бразилецот за Ливерпул има одиграно 335 натпревари и постигнато 101 гола, како и 77 асистенции. Неговиот договор со клубот истекува на крајот од сезоната.

Селекторот на фудбалската репрезентација на Македонија Благоја Милевски, посочува дека добро ја анализирал играта на нашиот следен противник во Лигата на нации, селекцијата на Бугарија. Милевски се надева дека екипата нема да ги повтори истите грешки како против Грузија, и ќе слави победа на натпреварот.

Селекторот Милевски за можните политички скандирања на стадионот за време на натпреварот со Бугарија вели дека политиката треба да се остави на страна, и публиката да се однесува спортски и коректно. Мора да се истакне дека македонската селекција немаше никаков проблем на натпреварот одигран во Бугарија и дека на стадионот во Разград имаше одличен прием.

Капитенот на Унгарија, Адам Салаи, во пресрет на натпреварот против Италија од Лигата на нации потврди дека ја завршува својата репрезентативна кариера.

„Отсекогаш сонував да играм за унгарската репрезентација, па учеството на две европски првенства и капитенската лента за мене беше големо искуство. Во последните години заедно со репрезентацијата доживеавме прекрасни моменти“, изјави Салаи за официјалниот сајт на УЕФА.

34-годишниот Унгарец за унгарската репрезентација настапува од 2009 година. Тој досега има 26 гола во 85 натпревари за својата репрезентација.

Играчот од средниот ред на екипата на Евертон, Алан го напушти тимот на „карамелите“ и замина во Обединетите Арапски Емирати.

Ал Вахда објави дека постигнале договор со премиерлигашот за трансфер на Бразилецот. Договорот со играчот е на две сезони.

Алан е во Евертон од 2020 година и има 52 настапи во лигата со 3 асистенции.

Италијанските медиуми пренесуваат дека фудбалерот на Јувентус и репрезентативец на Франција Пол Погба ќе биде подготвен за претстојното Светско првенство кое ќе се одржи од 20.ноември до 18.декември во Катар.

Погба се опоравува од повреда на коленото, а според Тутоспорт Французинот би требало да се врати на теренот во втората половина на октомври, и би можел да заигра за Јувентус на дуелот од Лигата на шампионите против Бенфика кој е закажан за 25.октомври.

Погба се врати во Јувентус во летниот преоден рок како слободен играч од Манчестер Јунајтед.

Американскиот тенисер Френсис Тијафо го совлада Гркот Стефанос Циципас и на тој начин донесе триумф за „Тимот на светот“ против „Тимот на Европа“  од 13:8 на Лејвер купот одржан во Лондон.

„Тимот на светот“ ги освои неопходните 13 поени поради што беше откажан последниот натпревар во сингл кој требаше да се одигра помеѓу Каспер Руд и Тејлор Фриц.

За „Тимот на светот“ова е прва историска победа во Лејвер купот, додека „Тимот на Европа“ досега има триумфирано четири пати.

Директорот на швајцарската фудбалска репрезентација Пјерлуиџи Тами за Клартекст изјави дека провокациите кои се случија на натпреварот против Србија на Светското првенство во Русија во 2018 година не смеат да се повторат на Светското првенство во Катар.

Швајцарија тогаш ја совлада Србија со 2-1, а стрелци беа играчите со албанско потекло Гранит Џака и Џердан Шаќири кои провокативно ги прославија головите правејќи го со раце двоглавиот орел кој се наоѓа на знамето на Албанија.

„Светското првенство не е само за натпреварот со Србија, дури и ако знаеме колку е посебен овој натпревар, со оглед на тоа што се случи во 2018 година. Не сакаме да ги правиме истите грешки, тука сме да играме фудбал и ништо друго. Не, не сакаме да испраќаме некакви политички или религиозни пораки“, изјави Тами.

Фудбалскиот клуб Барселона денес го соопшти степенот на повредите на Французинот Жил Кунде и Уругваецот Роналд Араухо.

Кунде има повреда на тетивата од левата нога и ќе биде надвор од теренот се додека трае опоравувањето кое не се очекува да биде долго. Тој се повреди на натпреварот од Лигата на нации помеѓу Франција и Австрија, поради што беше заменет во првото полувреме.

Араухо беше заменет во петтата минута од пријателскиот дуел на Уругвај со Иран, а од каталонскиот клуб соопштуваат дека тој ја скинал тетивата и ќе мора да паузира најмалку еден месец.

Над 1.700 навивачи на Ливерпул покренале тужба против УЕФА поради хаосот на овогодинешното финале во Лигата на шампионите во кое англискиот клуб во Париз беше поразен од Реал Мадрид со 1:0.

Финалето на стадионот во Сент Дени доцнеше 35 минути поради фактот што голем број на навивачи на Ливерпул не можеа да влезат на стадионот со купените влезници.

Фановите на тимот од Енфилд бараат од УЕФА одштета поради психичките и физичките повреди кои ги доживеаја како резултат на негрижата и пропустите од организаторот.

Манчестер Јунајтед го собори рекордот по трошење пари за плати во Премиер лигата.

Клубот од Манчестер вчера ги претстави резултатите од минатата финансиска година и објави дека потрошиле 384,2 милиони фунти за плати на играчите – 61,6 милиони повеќе од една година претходно.

Според „Гардијан“, Манчестер Јунајтед го собори рекордот во Премиер лигата за трошење на плати. Тој претходно беше во сопственост на Манчестер Сити, чиј платен список изнесуваше 355 милиони фунти.

Зголемувањето на трошоците за плата се должи на трансферот во Манчестер Јунајтед на напаѓачот Кристијано Роналдо, крилниот напаѓач Џејдон Санчо и дефанзивецот Рафаел Варан.