Поранешниот капитен на фудбалската репрезентација на Македонија, Горан Пандев, ја потврди својата одлука за крај на богатата играчка кариера.

Оваа негова одлука беше брзо пренесена низ Балканот и Европа, и истата донесе голем број коментари и реакции. Репрезентативецот и сегашен капитен на селекцијата Стефан Ристовски испрати емотивна порака до Пандев со која тој му посака заслужена пензија.

– Гоки….пораснав со тебе, прво како идол, а подоцна заедно и на терен. Горд сум што бев дел од твоето време. Емоциите се измешани, среќен за тоа што сме поминале заедно и тажен што повеќе нема да бидеш дел од теренот. Фала ти што прв успеа светот да слушне за Македонија и македонскиот фудбал, фала ти што беше инспирација за сите нас. Ти си наша легенда и мој мотив засекогаш, – порача сегашниот капитен на нашиот национален тим кој поради повреда ќе ги пропушти дуелите со Грузија и Бугарија во Лигата на нации.

Екипата на Арсенал размислува да испрати понуда во текот на зимскиот преоден рок за фудбалерот на Ајнтрахт Франфурт, Јеспер Линдстром.

Весникот –  „Билд“, наведува, дека претставниците на клубот стапиле во контакт со 22-годишниот дански интернационалец.Тој во летото во 2021 година го напушти Брондби за 7 милиони евра и се пресели во Бундес-лигата.

Линдстром во дебитантската сезона имаше 5 голови и 4 асистенции. Неговата трансферна вредност е околу 20 милиони евра.

Фудбалерот од средниот ред на Манчестер Сити, Родри, предупреди дека Ливерпул има квалитет да се врати на победничките патеки.

Шампионите во моментов имаат речиси двојно повеќе бодови од „црвените“ пред се поради лошата форма на избраниците на Јирген Клоп. Во последниве неколку години главно двата тима ја водат битката за пехарот во Премиер лигата.

„Ливерпул не е во криза, само е помалку ефикасен. Сепак, англискиот шампионат е таков што не ви дава шанса да се опуштите. Ако го направите тоа, веднаш започнувате да губите бодови“, искоментира Родри.

Претседателот на Европската фудбалска унија (УЕФА), Александар Чеферин изјави дека стадионот Максимир на Динамо Загреб е срамен и дека е чудо какви резултати може да постигне хрватскиот шампион играјќи на таков објект.

„Стадионот е срамен, особено кога една трибина е затворена. Чудно е какви резултати добивате со ваков стадион. Даваме пари за инфраструктура на сите фудбалски федерации. На пример, во Словенија 80 отсто од средствата за стадионите доаѓаа од УЕФА. Имаме средства, но владите, федерациите и локалните власти мора заедно да придонесат“, рече Чеферин, а пренесува Јутарњи лист.

По трите последователни ремија (Борусија Менхенгладбах, Унион Берлин и Штутгарт), Баерн го доживеа првиот пораз (Аугсбург). Одиграни се седум кола, клубот од „Алијанц Арената“ е на четвртото место, со пет бода помалку од лидерот Унион Берлин. Тоа не е ситуација која често се случувала и на која се согласуваат во Баерн.

Како што пренесуваат германските медиуми, тренерот на Баерн, Јулијан Нагелсман, по поразот на гости во Аугсбург ги критикувал играчите и побарал објаснување за лошата игра. Сепак, тој на прес-конференцијата рече дека сноси најголема одговорност.

„Размислувам за се. За мене. За ситуацијата“ изјави Нагелсман.

Искусниот стопер Жерар Пике наскоро би можел да ја напушти Барселона

Тренерот Чави Хернандез се помалку смета на Пике, кој во Барса е од 2008 година и со тој клуб освои се што можеше да се освои.

Договорот на Пике со каталонскиот гигант истекува во 2024 година, но тој ќе си замине многу порано. Така шпанските медиуми веќе почнаа да пишуваат за можна замена за него која Барса се обидува да ја донесе. Во прашање е стоперот на Атлетик Билбао, Иниго Мартинез.

Мартинез е четири години помлад од Пике, влезе во последната година од договорот со Билбао и од 1-ви јануари следната година ќе може слободно да преговара со Барса.

Легендарниот фудбалер на Реал Мадрид и бивш шпански репрезентативец, Мичел, повторно ќе биде тренер на грчки Олимпијакос.

Мичел претходно го водеше Олимпијакос од 2013 до 2015 година, а на клупата ќе го наследи сонародникот Карлос Кобреран кој неодамна доби отказ од клубот поради лошите резултати од стартот на новата сезона.

Екипата од Пиреја се наоѓа на шестата позиција на табелата и заостанува седум бода од лидерот Панатинаикос кој има максимални 15 бода.

Германскиот фудбалски сојуз соопшти дека голманот Мануел Ноер и играчот за врска Леон Горецка се позитивни на вирусот корона, и поради тоа тие нема да играат на наредните два натпревари во Лигата на нации.

Германија во петок ја дочекува селекцијата на Унгарија а три дена подоцна гостува на Вембли со Англија каде ќе го одигра последниот натпревар од групната фаза.

Табелата во групата ја предводи Унгарија со седум бода, Германија има бод помалку, Италија е трета со пет, додека Англија е последна со два освоени бода.

Напаѓачот на Интер, Ромелу Лукаку, продолжи со нормалните тренинзи откако се здоби со повреда на мускулот на левиот бут, објави „Газета дело Спорт“.

Белгиецот поради повредата ги пропушти последните 6 натпревари на својот тим, а во негово отсуство „нараѕурите“ загубија половина од тие натпревари во Серија А и Лигата на шампионите. Се очекува 29-годишниот напаѓач да се врати во игра за дербито против Рома на 1 октомври.

Лукаку има 3 настапи во Серија А од почетокот на оваа сезона, постигнувајќи еден гол и асистенција.

Според информациите кои ги пренесуваат шпанските медиуми, играчот на Барселона Серхио Бускетс по завршувањето на сезоната ќе го напушти клубот од Камп Ноу.

Договорот на 34-годишниот Бускетс со Барселона истекува 2023 година и тој најавува дека нема намера да преговара за продолжување на истиот.

Како негова нова фудбалска дестинација се споменува американската МЛС лига и тимот на Интер од Мајами.

Бускетс своето деби во дресот на Барселона го имаше во 2008 година. Тој со Каталонците има освоено 30 трофеи.