Украинскиот фудбалер Олександр Зинченко е нов играч на Арсенал.

25-годишниот фудбалер во Арсенал доаѓа од редовите на актуелниот англиски шампион Манчестер Сити, и потпиша повеќе годишен договор во трансфер вреден 32 милиони фунти.

Зинченко за Сити настапуваше од 2016 година, и одигра вкупно 128 натпревари за клубот, додека за репрезентацијата на Украина има 52 натпревари.

Германскиот весник Билд тврди дека новиот фудбалер на Барселона, Роберт Левандовски, уште не е регистриран како играч на каталонскиот клуб, па поради тоа тој нема право на играње на официјални натпревари.

За информација, професионалната шпанска фудбалска лига има строги правила во врска со регистрација на играчите. Шпанските клубови не смеат неконтролирано да купуваат нови фудбалери.

Според Билд, Барселона засега ги нема регистрирано ни Рафиња, Кеси и Кристенсен, па така новите фудбалери можат да играат само на пријателски натпревари.

Барселона мора прво да продаде неколку играчи за да ги реши проблемите со финансиите и платите на фудбалерите, и затоа каталонскиот клуб планира да се раздели со Френки де Јонг и Мемфис Депај. Барселона има долг поголем од милијарда евра, а примањата на фудбалерите во минатата сезона ги намали од 347 на 97 милиони евра.

Дефанзивецот на Баерн, Бенџамин Павард е предмет на интерес на неколку европски гиганти.. Иднината на 26-годишниот Французин е прилично неизвесна откако Германците потпишаа договор со Матијас де Лихт од Јувентус. Се погласно се зборува дека може да биде продаден, а кандидати за неговиот потпис не недостасуваат.

Според информациите, Јувентус, Челси, Атлетико Мадрид и Манчестер Јунајтед будно ја следат ситуацијата околу дефанзивецот и се подготвени да влезат во битка за неговиот потпис. И самиот фудбалер е свесен за интересот за себе и сериозно размислува за својата иднина.

Павард беше донесен во Баерн од Штутгарт во 2019 година за 35 милиони евра. Досега за Баварците има 119 настапи, 5 гола и 11 асистенции. Покрај тоа, тој е француски интернационалец со 45 натпревари и два гола, а со „петлите“ ја освои светската титула во 2018 година.

Медиумите од Англија објавуваат дека клубот Вест Хем испратил понуда до Ајнтрахт Франкфурт за ангажман на фудбалерот Филип Костиќ.

Српскиот фудбалер веќе подолго време се поврзува со заминување од Бундеслигата, а досега како најсериозен кандидат за негов трансфер се споменуваше Јувентус, кој очигледно се откажа од оваа намера.

Премиерлигашот Вест Хем во Костиќ гледа идеален кандидат за засилување на левата бековска линија на екипата. Минатата сезона Костиќ со Ајнтрахт беше освојувач на трофејот во Лига Европа, откако во финалето славеше над Глазгов Ренџерс. 

Македонскиот фудбалски репрезентативец Бојан Миовски и официјално пристигна во својот нов клуб Абердин.

Миовски ја заврши процедурата околу добивањето на работна дозвола за Велика Британија, и му се стави на располагање на стручниот штаб на шкотскиот клуб.

Претходно македонскиот напаѓач ги одработи припремите со своите соиграчи кои се одржаа во Шпанија, по што чекаше завршување на постапката околу добивањето на виза.

Своето деби во Абердин, Миовски ќе го има во недела  на куп натпреварот против Реит Роверс.

Фудбалерките на Германија се пласираа во полуфиналето на Европскот првенство во женска конкуренција кое се игра во Англија, откако синоќа ја совладаа во четвртфиналето Австрија со 2-0 (1-0).

Головите за Германија ги постигнаа Лина Магул во 25. минута и Александра Поп (89). Германија во полуфиналето ќе игра против подобриот од дуелот меѓу Франција и Холандија.

Во средата пласман меѓу четирите најдобри репрезентации на Европското првенство избори и домаќинот Англија со триумфот од 2-1 над Шпанија, и во полуфиналето ќе игра против победникот од четвртфиналната пресметка меѓу Шведска и Белгија.

Поранешниот фудбалер на Барселона, Бразилецот Дани Алвес во наредната сезона ќе игра во мексиканскиот клуб Пумас.

39-годишниот искусен дефанзивец во Пумас ќе пристигне како слободен играч, откако си замина од Барселона која не му понуди продолжување на договорот.

Алвес во својата кариера има настапувано за голем број клубови и освои 38 трофеи.

Фудбалскиот клуб Рома најавува дека е во завршни преговори со ПСЖ за ангажман на Џини Вајналдум.

Тимот предводен од Жозе Мурињо е на добар пат во период од само неколку дена да добие двајца екстра играчи. Во Рома претходно стигна и Аргентинецот Пауло Дибала.

31-годишниот Вајналдум пред само една година го напушти Ливерпул и се пресели во ПСЖ, каде не доби скоро никаква шанса за редовни настапи со тимот. Неговиот договор со клубот од Париз е до 2024 година, а најверојатно тој во Рома ќе пристигне како позајмен играч.

Англискиот премиерлигаш Брајтон, ја одби понудата од Манчестер Сити за шпанскиот фудбалер Марк Кукуреља, вредна 30 милиони фунти.

Според медиумските информации, челниците на Брајтон бараат дури 50 милиони фунти за својот фудбалер.

23-годишниот Кукуреља е играч на Брајтон од минатата година кога за 15 милиони фунти пристигна од Хетафе. Неговиот договор со актуелниот клуб истекува во јуни 2026 година.

Фудбалерот на Манчестер Јунајтед, Кристијано Роналдо, има само две можности за продолжување на својата кариера. Едната е да остане во клубот од Олд Трафорд, а другата е да замине во Атлетико Мадрид, пренесува францускиот Л`Екип.

Португалскот напаѓач сака по секоја цена наредната сезона да игра во Лигата на шампионите, но тоа не може да го реализира со Манчестер Јунајтед  кој ќе настапува во Лига Европа.

Менаџерот на Роналдо, Жорж Мендеш проба да најде ангажман за својот клиент во Баерн, Интер и Челзи, меѓутоа овие клубови се откажаа од трансфер.

Весникот пренесува дека поголеми се шансите Роналдо да остане во Манчестер Јунајтед отколку да го напушти клубот. Друга варијанта која се споменува е заминување на Роналдо во Атлетико Мадрид, па за таа цел тој бил подготвен и на намалување на износот на платата која би ја добивал. 

Роналдо има договор со Манчестер Јунјатед до јуни наредната година.